ارجو المشورة من اهل الخبرة

**mah_almasry** · 24-08-2010 03:11 AM

النهاردة وانا ماشي بالعربية سامع صوت جاي ليا من الشباك . صوت تكتكة زي صوت صاعق النموس بس بيزيد مع زيادة السرعة . لما وصلت البيت قلت ابص علي العجل . لقيت حاجة خوفتني . ان العجلتين الاماميتين سخنين بشكل غريب حتي الطاسات مولعة . هو ده طبيعي ان العجل الامامي يكون سخن اوووي كده ولا كده في مشكلة وهل اتحرك بالعربية ولا كده غلط اروح بيها الشغل الصبح . انا ليا جار ميكانيكي بسأله من غير ما يبص علي حاجة قالي طبيعي العجل الامامي يسخن وتلاقيها طوبة في الكاوتش بس انا خايف لان شغلي علي طريق مصر اسكندرية الصحراوي يكاد يكون سفر . ارجوكم افيدوني وكل عام وانتم بخير واهلا للخير

**AlGazar2** · 24-08-2010 03:23 AM

لو السخونية بزيادة قوى عن العادى ممكن يكون التيل قفش و الحالة دى هتلاقى ريحة شياط و الطنابير حمرا

**SAMEH_FOUAD** · 24-08-2010 05:49 AM

طيب اول حاجة اكشف على بلى العجل ودة ممكن تروح لواحد بتاع ترصييص فى اى محل ظبط زوايا يكون عندة جهاز ترصيص العجل بالتروكسيل وهو هيحطلك العجل على الجهاز دة وهيقولك اذا كان فية عيب بلى ولأ

والعجل بيبقى سخن بس مش للدرجة انك اول ماتحط ايدك تتلسع

**cOrn** · 24-08-2010 07:36 AM

ممكن ظلطة فى الجنط و ممكن البلية و احتمال كبير تكون البلية و لا قدر الله لو هي يبقى مينفعش تعدى ال 60 عشان غلط ..او حاول تمشى اعلى سرعة يكون فيها الصوت مش عالى اوى وانت فاتح الزجاج و تثبت السرعة دى بحيث انك متعديهاش لحد لما تحل المشكلة دى ان شاء الله
والله اعلم

**karimfahmy99** · 24-08-2010 07:45 AM

المشاركة الأصلية كتبت بواسطة matrixco

ممكن ظلطة فى الجنط و ممكن البلية و احتمال كبير تكون البلية و لا قدر الله لو هي يبقى مينفعش تعدى ال 60 عشان غلط ..او حاول تمشى اعلى سرعة يكون فيها الصوت مش عالى اوى وانت فاتح الزجاج و تثبت السرعة دى بحيث انك متعديهاش لحد لما تحل المشكلة دى ان شاء الله
والله اعلم

للتاكد من انها بلية لازم العربية تترفع عند الميكانيكى و هو يلف العجلة و بيعرف من صوت و خشونة العجلة اذا كانت بلية تعبانة و لا لأ , بس فى حل تانى برضة حل بسيط صاحب المشكلة يمشى بالعربية مسافة و بقدر الامكان مايدوسش فرامل و ينزل يشوف اذا فى سخونة و لا لأ لان 90% من السخونة دى فرامل نتيجة احتكاك التيل بالطمبورة و دا طبيعى جدا

**cOrn** · 24-08-2010 07:46 AM

عربيتك هيونداى النترا؟

**cOrn** · 24-08-2010 07:49 AM

المشاركة الأصلية كتبت بواسطة karimfahmy99

للتاكد من انها بلية لازم العربية تترفع عند الميكانيكى و هو يلف العجلة و بيعرف من صوت و خشونة العجلة اذا كانت بلية تعبانة و لا لأ , بس فى حل تانى برضة حل بسيط صاحب المشكلة يمشى بالعربية مسافة و بقدر الامكان مايدوسش فرامل و ينزل يشوف اذا فى سخونة و لا لأ لان 90% من السخونة دى فرامل نتيجة احتكاك التيل بالطمبورة و دا طبيعى جدا

بس يا باشا هو بيقول ان فى صوت تكتكة زى صاعق الناموس و دة صوت البلية و الصوت بيعلى اوى لما يعدى ال 60

و الله اعلم

**karimfahmy99** · 24-08-2010 08:01 AM

المشاركة الأصلية كتبت بواسطة matrixco

بس يا باشا هو بيقول ان فى صوت تكتكة زى صاعق الناموس و دة صوت البلية و الصوت بيعلى اوى لما يعدى ال 60

و الله اعلم

احنا نروح القسم احسن هههههههههه

لازم ميكانيكى يكشف الكلام عميانى مينفعش احنا بس بنقول الاحتمالات . بس للعلم البلية متعملش تكتكة زلطة فى الكاوتش هى اللى تعمل تكتكة . البلية تعمل صوت نحرة و مستمرة

**A.Saad** · 24-08-2010 10:35 PM

بلية او زلطة
الزلط هيبان
بص على النقشة وشوف الفرد كلها
الزلط شيله بمفك سنه رفيع
وبعدين فك فرامل اليد وزق العربية سنة علشان تشوف الجزء اللى كان دايس على الارض