نظرا من طلب بعض الاعضاء عمل موضوعات بخصوص الموتوسيكلات الصيني ...النهارده انا هحكيلوا مميزات وعيوب وتجربه ..
من سنتين ونص كنت راكب CBR 900 موديل 1998 وكنت بطلع يوميا حفلات في فيلا كان زمان اللي في شبرا منت فا كنت بروح شغلي في المهندسين بالبايك عادي جدا ولما جد عليا موضوع شبرا منت ده اضطريت اني اروح بالبايك والطريق بقي مقولكوش حاجه كده تلال وهضاب ومرتفعات وفجاه تلاقي جبل انتا طالعه علي هيئه مطب وايه اللي جاب القلعه جمب البحر الله اعلم!! المهم روحت اول يومين واتعذبت بالبايك وحسيت انها هتف عليا من اللي بعمله فيها جربت اروح تاني يوم مواصلات روحت تمام التمام والمشكله وانا خارج مفيش مواصلات الا حسب التساهيل لاني كنت بخرج الفجر او بعده اعدت ادورها شمال يمين مش عارف اعمل ايه لاقيت اصحابي اقترحوا عليا اشتري موتوسيكل صيني ..في الاول عارضت وازاي وصيني وبتاع وقرف وللاسف اقتنعت بالفكره وروحت اشتريت دايون 7 لان شكلها عجبني وحبيت اعمل فيها شوية تعديلات وفعلا روحت اشتريتها زيرو من عند ابو حوا ب4150 وروحت واخدها بقي يامعلم ايه شايل الضهر والحماله والكرسي اللي ورا وروحت مركب علبه شكمان ب950 جنيه ايام المصاري الكتير بقي وروحت جايب امبير هوندا استيد 400 ب 350 جنيه وشيلت الدواسات وحطيت فووت بورد ب 220 جنيه استيراد / رميت الجادون في الزباله وحطيت جادون استيد / رميت الفانوس وركبت فانوس امريكان استايل 375 جنيه والاشارات درك شغاله علطول زي الكروزر كده / دهنت الجنوط اسود / ركبت شنطين جلد برازيلي واخدهم مصلحه من الميكانيكي ب50 جنيه بس / وحطيت نيكل علي الماتور العره ده وحطيت شبك من علي التانك نازل لحد الفووت بورد ومشدود لحد الديل المهم حولتها وشقلبت حالها وكانت اشهر موتوسيكل صيني في المطريه وطبعا بقيت اروح الشغل بيها واكتشفت المميزات الاتيه :
1- الموتوسيكل الصيني حنين بنزين اخر حاجه لدرجه اني كنت بفول كل اسبوع مره .
2- قطع الغيار مرطرطه بتراب الفلوس .
3-بيستحمل في الطرق الرزله والواعره.لانك كده كده مش هتبقي خايف عليه اوي
4- مش بتدفع كتير عند الميكانيكي خاااااااالص.
5- بتاخد كيلو زيت واحد ب 12 جنيه ومينفعش تحطلها زيت نضيف عشان صيني بقي بس كنت بصراحه كام مره كنت بحط موبيل وان الشويه اللي بيبقوا في الجركن باقيين من تغيير زيت العربيه بحطهم فيها
------------------------------------------------
نيجي للعيوب بقي:
1-موتوسيكل صيني دي اول عيب
2- المكنه لو جيبت عليها 80 تلاقيها بترجرج جااااااامد وبتحس انها بتتفكك من تحت منك لو جيبت 100
3- عشان المشوار بتاعي طويل كنت كل اسبوع اروح اربط المكنه كلها وكل مره بلاقي الاكس فاضله لفه ويطلع من مكانه
4- الحكومه كل ما تشوف مكنه صيني توقفها معرفش ليـــــــــــــــــــــــ ـــه؟؟؟
5- ورق الدبرياج بيتهري بسرعه.
6-الفرامل كل شويه عايزه ريجلاش
6- لو شويه ميه جم علي التيل تسمع مزيكا حسب الله وانتا بتدوس فرامل.
7-الكهربا زباااااااااااله.
8- دايما اي حد لو ياخد باله كل مكنه صيني تبص عليها وهي بتجري بص علي العجله الخلفيه هتلاقيها بترقص وده عشان الناس كلها بتقعد تشد في الجنزير وبيقعد يرخي برضه كل شوية.
----------------------
دي تجربتي مع الدايون 7 كلفتها فوق تمنها حوالي 3800 جنيه وفي النهايه بعتها بتراب الفلوس بس بصراحه افادتني في حاجات كتيييييير اوي خصوصا انها وفرت عليا البنزين بتاع مشوار شبرا منت ووفرت معايا الزيت والصيانه لمده كبيره
بس والله كنت عامل فيها خياااااال جامد اوي وكانت مكنه مشهوره جدااااااااا بالشغل اللي كان معمول فيها
المفضلات