هو فلا حاجة اسمها رش زى الفابريكا .؟؟

**myself112** · 27-08-2010 04:28 AM

هو فى حاجة اسمها رش فابريكا ؟؟!!!
و هل الرش فى التوكيل غير الرش بره , لانى قريت فى موضوع للعضو bloody _ stone انه كان رش فى التوكيل و العربية بتطلع فابريكة ؟؟؟ انا بقى مش فاهم الحته دى , يعنى هو مثلا لما يجى يبيع العربية هيبيعها على اساس انها فبريكة بره وجوه , و لو ايه النظام ......؟ و لا ده مجرد تعبير عن نظافة الرش والمصتعية وخلاص ....

**tamer_a7** · 27-08-2010 05:00 AM

لا تعبير عن النظافه
بس طبعا هما في التوكيل عندهم نفس نوعيه الدهان بتاعت المصنع (مش هم التوكيل)
وبما انهم بيغيرو ما بيصلحوش يبقي ما فيش معجون يبقي هتعرف منين انها رشه :)

**grumby78** · 27-08-2010 08:15 AM

عن تجارب كتير مع اصحابي مش كل التوكيلات بتسمكر وترش حلو . لانه في الاخر ده مش مصنع عربيات ده ورشه بس على كبير شويه . وفيه صنايعيه معروفين بيكونوا احسن واوفر من التوكيلات اما موضوع البويه فنوعها ده في ايدك ممكن تجيب حاجه تمشيت حال وممكن تجيب حاجه الماني او هولندي محترمه . انا واحد صاحبي في مره عمل حادثه ودخلنا عربيته c3 ستروين التوكيل اللي هوا عز العرب . العربيه واللهي خلصت بعد حوالي شهرين عشان علبة الفيوزات جت من بره وكانت العربيه كلها عيوب في السمكره والدوكو وكانت فضيحه ومشكله كبيره .

**BLOODY_STONE** · 27-08-2010 08:37 AM

هو فعلا مش كل التوكيلات شغلها حلو ... بس انا كان كلامي عن توكيل تويوتا
رشة الفبريكة بتكون نفس خامات البوية اللي العربية جاية بيها من المصنع و بتترش عالصاج او الفيبر عالطول من غير معجون .. بس لازم يكون الفيبر اصلي عشان البوية تمسك فيه و بتكون بنفس كود اللون الاصلي طبعا.. يعني مثلا انا كان ليا واحد صاحبي جايب مرايات للكورولا و مكنتش اصلي و معرفاش نرشها .. البوية مكنتش بتمسك في الفيبر ....
في ناس طبعا بترش برة التوكيلات رشة فبريكة .. بس انا اللي انا اعرفهم في الموضوع ده كانوا شغالين فترة في التوكيلات و سابوها .. و بتفرق طبعا حسب التوكيل ..
و طبعا لو حضرتك نويت تبيع مش بتبان لان مفيش معجون و نفس الاصلي بالظبط .. و يعيبها التكلفة طبعا .. بس انا عملت كده عشان عندي تأمين

**yoko** · 27-08-2010 09:21 AM

لأ أعتقد لإن رش المصنع بيستخدم الغلكتروستاتيك
فحتى لو القطعة جديدة بتاخد معجون بس بيبقى خفيف جدا

**eslam_wega** · 27-08-2010 09:08 PM

يريت لو حد يعرف حد بيرش كويس يقولى وبلاش حد يقولى العقيد

**SeaShark** · 27-08-2010 09:33 PM

الفكرة كلها في السمكرة مش في الدوكو
يعني الدوكو الكويس و اللي زي الفابريكة ده بيدأ من عند السمكري مش من عند اللي بيرش
مصانع العربيات اللي بتقفل عربيات في مصر بتستخدم دهانات عادية جدا زي كابسي مثلا لكن الفكرة ان الصاج بيبءي خارج من المصنع و مظبوط تماما و مش محتاج معجون و بيسموه دوكو الفابريقة عشان اول بوية تترش علي الصاج
لكن بعد السمكرة الصاج مش بيظبط عادة مع السمكري بالظبط زي ما كان و بيضطر بتاع الدوكو انه يحطله معجون عشان يظبطه
لانه لو معملش كده و سمكر و رش علي طول البوية الجديده بتلمع جدا و بتكون نضيفه و هيبان اوي فيها مع الاضاءة عيوب السمكرة
يعني اهم حاجة انك تدور علي سمكري كويس قبل ما تدور علي دوكو كويس
الا بءي اذا كنت هترش مثلا الاكصدامات نظافة و مفيش شغل سمكرة دي تبءي قصة تانية.
بالنسبة للدوكو نفسه انت ممكن تجيب دوكو احسن من بتاع المصنع كمان لكن الفكرة في طبقات الاساس و الصاج السليم اللي خارج من المصنع مش في مواد و ونوعية الدوكو نفسه

بالنسبة للأماكن الحرفيين مليانة بتوع دوكو و سمكرة من المبتدأ للمحترف روح هناك و اسال كده و شوف مين سمعته كويسه في مراكز هناك كويسه اوي و شغلها كويس جدا و لازم تروح تبص عليهم كتير و تشوف السمكرة اخبارها ايه و تروح مع بتاع الدوكو و هو بيجيب الدوكو عشان ميجيبش حاجة اي كلام.