الموضوع: == معلومة هامة جداً بخصوص الإشعال الإلكترونى للبيتل !!! ==

السلام عليكم ورحمة الله وبركاته

بفضل الله تعالى ركبت الإشعال الإلكترونى للبيتل من سنة تقريباً و تقييمى ليه إنه ممتاز و الحمد لله
لكن بالخبرة إكتشفت إنه أوقات بيخلى العربية مش مظبوطة و ممكن يفصل مع بعض الأخوة اللى ركبوه لكن ربنا أكرمنى بمعرفة الأسباب و الحل .

الأسباب :

1- عدم صيانة الإسبراتير اللى راكب فيه الإشعال الإلكترونى كل فترة 3 شهور مثلاً.
2- عند تغيير زيت المحرك يتم إضافة كمية أكبر بكتير من المطلوب ( المفروض 2.5 كيلو زيت للبيتل ) و لو زاد عن 2.75 لتر بتظهر مشاكل البوجيهات و تسريب زيت من أولسيه الماتور و دخول زيت على عامود الإسبراتير و بالتالى التأثير على الإشعال الإلكترونى.
3- دخول مياه إلى داخل الإسبراتير عند غسيل السيارة و بالتالى التأثير على الإشعال الألكترونى.
4- التشحيم الذائد لكاوتشة أو مغناطيس الإشعال اللى بيركب تحت الشاكوش على عامود الإسبراتير .
5- وجود عيوب بسلك البوجيهات أو شاكوش الإسبراتير أو فحمة الإسبراتير أو وش الإسبراتير.

الحلول :

1- يتم تجنب جميع النقط السابقة و التى تسبب العطل بقدر الإمكان.
2- بفضل الله توصلت لحل بالخبرة و التجربة هو إنك كل فترة أو لما تظهر الأعراض تقوم بفك الإشعال الإلكترونى بعناية و تجيب قطعة قماش نظيفة جداً و تمسحه كويس هو و قاعدته داخل الإسبراتير و عامود الإسبراتير اللى تحت الشاكوش و الكاوتشة اللى بتركب على عامود الإسبراتير تحت الشاكوش و كذلك تمسح الشاكوش كويس ثم بعد ذلك بقطعة قماش مبللة بقليل جداً من البنزين ( إوعى تغسل الإشعال بالبنزين ) و تمسح كل اللى فات تانى بعناية مع أطراف الإشعال الألكترونى الموجب و السالب اللى بتركب فى الموبينة و كذلك أقطاب الموبينة الموجب و السالب و يفضل إنك تسنفرهم كويس و بعد كده تركبه تانى بعناية و لكن مع وضع قليل جداً من الشحم داخل الكاوتشة المغناطيسية اللى بتركب فى عامود الإسبراتير و تسنفر الشاكوش بالراحة و تركبة ... و إن شاء الله يرجع جديد بنفس الكفاءة و القوة و هذا عن تجربة شخصية.

اللى خلانى أكتب الموضوع ده لأن بعض من إخوانى فى المنتدى اللى ركبو الإشعال الإلكترونى كلمونى و قالولى إنه بيقطع إشارة و بيبرجل العربية مع الوقت و لما قولتلهم الخطوات السابقة بضل الله رجع سليم و جديد زى الأول.

و فى حالة وجود أى إستفسار أنا أخوكم و تحت أمركم فى أى وقت.

و كل سنة و إنتم طيبين جميعاً و كل أعضاء نايل موتورز و إدارة و مشرفين طيبين و بخير

كل سنة و إنتم طيبين جميعاً

أنا أول مرة أعرف إنك ركبت إشعال إلكترونى يا تامر !!!

للأسف غالبية الميكانيكية مش فاهمة فيه عشان كده بيريحو دماغهم و يشيلوه و يقولو العيب منه و إنه قاطع كهربا !!!
لكنه ممتاز بفضل الله و بيزود عزم العربية و السحب و إستهلاك البنزين و عن تجربة.

على العموم قدر الله و ما شاء فعل

و لما نتقابل المرة الجاية بأمر الله إبقى هات الإشعال معاك عشان أجربه بنفسى لو تكرمت.

و نصيحة لوجة الله للى راكب بيتل : لازم تعرفو إزاى تغيرو البوجيهات و تكشفو عليها و كمان الأبلتين و الكوندينسر و كمان يكون معاكم بوجيهات و أبلتين و كوندينسر إحتياطى للظروف الطارئة .
و ربنا يسترها معانا جميعاً