== تجربتى مع زيت فيسكو ngv للبيتل ==

**ahit** · 30-08-2010 11:04 PM

السلام عليكم ورحمة الله وبركاته

من فترة و أنا بستخدم زيت شيل x100 و بصراحة هو ممتاز مع البيتل و خاصة فى الصيف لكن بعد تغيير شكل العبوة من الأبيض إلى الأحمر حسيت إن جودته قلت بالرغم من إنه سعره زاد و وصل إلى 65 جنية أحادى الدرجة 50 و ل 69 جنية ثنائى الدرجة 20-50.
و كنت بغيرة على 1200 إلى 1500 بالكتير جداً فى الشتا و فى الصيف على 1200 بالكتير.

و بعد كده جربت زيت التعاون البرتقالى سوبريكس 10000 و بصراحة ممتاز لكن بعد الألف أو 1100 صوت الماتور بيعلى و لونه بيسود جداً و بينقص.

لغاية لما قريت فى المنتدى العظيم بتاعنا عن زيوت فيسكو و قررت أجربة و الحمد لله جربته أول مرة و قعد لغاية 2000 كيلو و بعد كده غيرت زيت و إن شاء الله هاغيره على 3000 كيلو بالكتير.

مميزات زيت فيسكو ngv الفسفورى الخاص بمواتير الغاز :

1- يحتوى على مادة تعمل على تبريد المحرك و الحفاظ علية من الحرارة العالية و ده إحنا محتاجينه بشده فى البيتل لأن تبريدها بيعتمد على الزيت.
2- يحتوى على رائحة عطرية جميلة جداً بحس إنها بتنعش المحرك و خاصة لما الماتور بيسخن.
3- ثنائى الدرجة 20-50 يعنى أمان فى الصيف و الشتا و خاصة عند بداية تشغيل المحرك.
4- توفير لأن سعره 56 جنية للجالون 4 لتر بدون تغيير لأنى بغير زيت العربية بنفسى و الحمد لله و بالتالى لما يقعد معايا بأقل تقدير 2000 كيلو وفرلى ثمن جركن زيت تانى من التعاون البرتقالى اللى كل يوم سعره بيغلى لغاية لما وصل 49 جنية يعنى جركنين من زيت فيسكو يقعد معاك 3 غيارات و يفيض نص لتر كمان و ال 3 غيارات يعملو على الأقل 7000 كيلو.
5- صوت الماتور أهدى و أنعم من الأول بفضل الله.

و بصراحة أنا ماكتبتش الموضوع ده غير لما جربته أول مرة 2000 كيلو و دى تانى مرة و عامل 800 كيلو تقريبا حتى الآن.

و أتمنى إنه يفضل بنفس الجودة و السعر
و بيتباع عند مراكز تغيير الزيت ب 58 جنية أو بنزينات كار جاز ب 56 جنية
و إن شاء الله هادور على لينكات المواضيع الأساسية اللى بتتكلم عنه و أحطهالكم

**ahit** · 30-08-2010 11:09 PM

دى لينكات المواضيع الأساسية اللى بتتكلم عن زيوت فيسكو

http://www.nilemotors.net/Nile/124594-a.html

http://www.nilemotors.net/Nile/153782-a.html

http://www.nilemotors.net/Nile/119963-a.html

http://www.nilemotors.net/Nile/171887-a.html

http://www.nilemotors.net/Nile/170274-a.html

و فيه مواضيع كتير فى المنتدى بتتكلم عن زيوت فيسكو

**smsmxxxxxx** · 31-08-2010 06:56 AM

احمد باشا اخبارك ايه واحشنا والله

اشكرك على مشاركتك لينا لتجربتك

انا ان شاء الله المرة الجاية هجيب فيسكو وهغيره بنفسي زيك برضه

لان فعلا حساباتك فيها توفير لو هجيب جركنين فيسكو وهغير زيت ثلاث مرات و هعمل 6000 كيلو خلال الثلاث غيارات هتكون التكلفة 112 جنيه

يعنى تكلفة الالف كيلو 19 جنيه

ولو هنمشي 6000 كيلو بس بزيت التعاون يبقي هتحتاج اربع جراكن بحوالى 200 جنيه لان فعلا صوت الموتور بيعلي بعد الالف

يعنى تكلفة الالف 33 جنيه

-----------
محمد سالم

**mazagngi2010** · 31-08-2010 11:55 AM

انت انسان محترم

**ahit** · 31-08-2010 08:13 PM

انت انسان محترم

و الله إنت اللى زى العسل و واحشنا مشاركاتك
كل سنة و إنت طيب

ياترى ربنا كرمك بالعربية اللى بتحلم بيها ولا لسه ربنا شايلك الخير ؟
ربنا يرزقك بالحلال الطيب و يوسع رزقك و رزقنا

**hosamsief** · 01-09-2010 12:31 PM

فعلا انا جربت زيت فيسكو مع الاستاذ احمد حسن و طلع زي الفل صوت الموتور وطي جدا و السحب ممتاز و فعلا بيوفر ............... رابطه البيتلز تنصح بأستخدام زيت فيسكو