ما معنى شرخ فى البلوك ؟؟

**wahba87** · 03-09-2010 05:08 PM

السلام عليكم

اثناء تصفحى لموضوع قديم فى الورشة , كان فى حد كاتب ان لو فيه "شرخ فى البلوك" ممكن المياه الخضراء تتحرق و تطلع دخان ابيض من الشكمان

انا مش فاهم بصراحة ايه اللى جاب الريدياتير للشكمان

نص المشاركة :

المشاركة الأصلية كتبت بواسطة zarkoor

الدخنة البيضه دى يا اما (ميه خضراء بتتحرق بسبب شرخ فى البلوك و ده الحمد لله مش عندك علشان الميه عندك مش بتنقص) ... او زيت بيتحرق ... اللى فهمته من كلامك ان زيت الموتور مش بينقص ... و اكيد الميكانيكى لما ظبطلك التكيهات بص على كاوتش دلايل الصباب

**Adham** · 03-09-2010 05:24 PM

مالهاش دعوة لا بالرادياتير و لا الشكمان

دة بيبقى شرخ جوة الموتور بيخللي مياة دورة التبريد تدخل غرف الحريق و التسمية الصحيحة له هي "شرخ في وش السلندر" او "شميز مشروخ" لو الشرخ في احد الشمايز

و دة يبهدل الدنيا و الكبس يطلع في المياة و المياة تدخل في الكبس ومياة تيجي في الزيت و تعمل طحينة وممكن بسببها الموتور يقفش فوراً

وهنا الموتور كلة بيتغير لو الشرخ في البلوك ولو الشمايز ما بتتغيرش, بعض السيارات كالبيجو ال 504 ممكن تغيير الشميز المشروخ فقط
اما شرخ وش السلندر بيتغير وش السلندر بس

شرخ البلوك (شرخ في جسم الموتور) بيخللي الزيت يطلع برضة من الموتور او المياة تطلع من الشرخ

كل دة يتوقف على مكان الشرخ

هل هو شرخ في قمصان المياة او في مجاري الزيت

**Eng_Mostafa_89** · 03-09-2010 05:28 PM

المية بتبقى فى الريداتير وبعد كدة بتخش على الموتور بتاع العربية علشان تبردة
والبلوك دة بيبقى فية الاسطوانات وحوليها المية بتاعت التبريد اللى جية من الريداتير
فلو فى شرخ فى جسم الاسطوانة كدة طبيعى ان المية تدخل على الاسطوانات من جوة

**hugan** · 03-09-2010 05:33 PM

كان عندي شرخ في البلوك في سيارتي 125
المشكله ان السياره كانت لسه شاريها وكانت عامله عمره جديده
الخراط لما جه يركب الشمايز كان مقاسها اكبر من الفتحه في البلوك ضغط عليها الي ان دخلت فشرخت البلوك
كنت لسه شاري العربيه جديد ومش عارف
واخذت الاولاد وكنت مسافر راس البر
سحبت بالعربيه
الي ان وصلت عند كوبري اجا السرعه 120
فجاءه زي الافلام
ادوس بنزين مفيش والناس ماشيه جانبي عماله تشاور علي دخنه من الخلف
وقفت افتح الكبوت وفتحت الردياتير
نافوره مياه خضراء علي مياه مصديه
الميكانيكي شافها
قالي الموتور باي باي
المشكله ان العمره لسه جديده
جبت موتور بولونيز استيراد.