الموضوع: تجربة شراء سيارة من الخارج من الألف اللي الياء

السلام عليكم اخواني اعضاء نايل موتورز


حبيت أشارك معاكم تجربتي في شراء سيارة تويوتا كورولا 2009 من الإمارات من أول الشراء لحد وصول السيارة لميناء السويس والجمرك والافراج النهائي لعل وعسى يمكن تجربتي تفيد أي حد ناوي يشتري من بره قريب


السيارة هي تويوتا كورولا 1600 كاملة اوتوماتيك مشتراه من التوكيل في الامارات (الفطيم) بسعر 63000 درهم يعني حوالي 100000 جنيه مصري وتاريخ الشراء كان 3/9/2009


الشحن كان عن طريق شركة الباسل للشحن والتفريغ في الإمارات وتكلفة شحن السياره من دبي لميناء السويس كانت 2000 درهم يعني حوالي 3200 جنيه والشركة استلمت السيارة يوم 15/8/2010 وتاريخ وصول السيارة ميناء السويس كان يوم 25/8/2010


رحلة السفر كانت سهلة جدا الحمد لله بعد استشارة اخواني هنا في المنتدى عن أسهل طريقة للسفر وكانت هي السوبر جيت من المحطة الدولية في رمسيس وتكلفة التذكرة كانت 12 جنيه والرحلة اخدت حوالي ساعتين والاقامة كانت في شاليهات جنب الميناء على طول واسعارها كويسة (شالية أوضتين ومطبخ وحمامين وأوضة سفرة – 200 جنيه اليوم - شالية أوضة وصالة وحمام - 130 جنيه اليوم) وطبعا الشاليهات كلها مكيفة وشايفة الغاطس بتاع الميناء وعشان تصل الشاليهات دي هتركب تاكسي وتقوله شاليهات بورتوفيق وهياخد منك 5 جنيه ولو عايز مطاعم أو تعمل شوبينج أو بنوك هتركب تاكسي برده وتقوله حي الاربعين وده برده 5 جنيه



نيجي بقى للكلام المهم


1- هتروح الميناء الصبح بدري عشان تعمل تصريح دخول وده تكلفته 6 جنيه وبيطلع لمالك السيارة بس وده بياخد حوالي 3 أو 4 ساعات عقبال مايطلع

2- عقبال ما التصريح يطلع هتروح تجيب حاجة اسمها مانيفستو الشحن من الشركة اللي تمتلك المركب اللي اتشحنت عليها السيارة وده تكلفته للكورولا كانت 640 جنيه ومحتاجين جواز سفر مالك السيارة وصورة منه

3- هتروح الميناء تاني وتخش على لجنة الفحصوال تتمين معاك المانيفستو وشهادة المالك الاول من مرور البلد اللي شاري منه السيارة وجواز السفر ولو عنوان جواز السفر مختلف عن العنوان اللي في البطاقة الشخصية وعايز ترخص على عنوان البطاقة يبقى كمان البطاقة الشخصية وصورة منها (جمرك الكورولا 2009 كاملة اوتوماتيك بعد خصم 10% استعمال سنة 66500 جنيه)

4- بعد تقدير الجمارك واستلام الاوراق هتروح مكتب المراجعة عشان تراجع وتجيب إذن الدفع في الخزنة وهتروح على الخزنة تدفع

5- بعد الدفع هتروح على إدارة المخازن عشان تدفع الأرضية وتاخد إذن دخول المخزن (الأرضية لأول يوم دخول فيه السيارة 120 جنيه وبعد كده أي يوم زيادة 20 جنيه)

6- هتروح المخزن تستلم السيارة وتطلع بعد كده على مكتب الافراج النهائي عشان تاخد ورقة الإفراج وتعمل كشف مفرقعات)

7- هتخلص وتطلع على البوابة على طول عشان تختم الإفراج بختم النسر وتتوكل على الله ومبروك عليك العربية



نقط توضيح بسيطة


1- بما إن السيارة افراج نهائي هتفضل ماشي بنفس اللوح المعدنية بتاعت التصدير اللي اتعلقت على السيارة قبل شحنها من بلد الشراء لحد ماييجي ورقها من السويس على عنوان البيت

2- من وقت دخول الميناء لحد ماتطلع بره الموضوع كله بياخد حوالي ساعة بالكتير

3- ممكن تتعامل مع شركة تخليص جمركي على أساس إنهم أسرع شوية في تخليص الاجراءات وأريّح بس ده طبعا بتمن عالي شوية (الإفراج النهائي بياخدوا فيه 1500 جنيه والتريب تيكيت 900 جنيه)

4- اتبسط جدا إن مفيش رشاوي جوه ولا حد بيرخم عليك في أي اجراءات عشان يلهفله قرشين

5- وإنت راجع على القاهرة إن شاء الله خليك ماسك الحارة اليمين عشان الشمال فيها شوية نقر وحشة جدا وعلى مهلك عشان الطريق فيه صيانة وحسب من بتوع النقل والميكرو بص عشان بيحبوا يرموا جامد على العربيات اللي شايفينها غريبة عليهم

6- مش معنى إن الرادار مابيصورش غير الللوح المصرية يبقى تجري, خليك ماشي على مهلك ولو لاقدر الله دخلت كمين ولا حاجة محدش هيقولك تقف غير لو أمين رخم بس عادي إنت معاك الافراج الجمركي على طول لحد ما إنشاء الله ترخص

7- ارخص سيارات في الجمرك هي الأوروبي وبالذات الفرنسي

8- حاول لو هتشتري من بره متركبش في السيارة أي اكسسوارات عشان كل حاجة بتتجمرك (دفعنا على الحساسات والزينون والجنوط والجي بي اس)



يا رب ماكونش نسيت حاجة ولو في أي اسئلة أنا تحت امركم

متشكر جدا جدا على المعلومات القيمة ... لو سمحت عندك تليفون للشركة الشحن؟؟ أصل كلهم بيقولوا شهر او اقل شئ 25 يوم والمبلغ 2600 درهم؟؟