السلام عليكم يا أعضاء المنتدى الكرام
حضراتكم انا عايش فى الكويت
و كنت فى اجازة فى مصر من 25 يونيو الى 2 أغسطس 2010
و كنت نازل مصر بعربيتى شيفروليه كابريس 2004 و انا من طنطا
المهم .. قبل ما انزل مصر بكام يوم غيرت زيت وفلتر للعربية و انا باستخدم زيت فيسكو 3000 و الزيت ده بيمشى 5000 كيلو ... المهم وصلت مصر الحمد لله بالسلامة و فضلت ماشى بالزيت ده لحد ما وصلت 4500 كيلو و بعدين رحت علشان اغيره علشان ميعاد تغييره جه و قلت اغيره بزيت موبيل1 لأن فيه ناس كتير نصحت بيه و بصراحة مكنتش اعرف مكان بيبع زيت فيسكو فى طنطا فا رحت بنزينة موبيل فى طنطا تحت الكوبرى العلوى و هى كمان قريبة من البيت و للعم الزيت اللى نزل مكنش محروق للدرجة ...
المهم نصحنى الاخ بتاع تغيير الزيت بموبيل1 اللى بيمشى 10000 كيلو حيث انى كنت مسافر بعدها بكام يوم من مصر للكويت و كنت ناوى اروح اعمل عمرة كمان فا كان قدامى سفر مسافة بتاعت 4000 كيلو غير الكام يوم اللى فاضلينلى فى مصر و غيرت زيت و فلتر برده .. و جبت الزيت (6 لتر) بحوالى 400 جنيه مصرى
و عدى كام يوم و سافرت و عملت عمرة الحمد لله و وصلت الكويت بالسلامة الحمد لله بعد ما وصلت بفترة بسيطة لقيت صوت العربية خشن و عالى شوية ... المهم بصيت على المسافة اللى مشيتها بالزيت كانت 5800 كيلو و شيكت على الزيت تخيلوا لقيته محروق تماما و كمان ناقص .....و للعلم انا عندى مفيش تسريب ولا حاجة
و طبعا اضطريت اغيره فورا علشان مايضرش الموتور .. و الحمد لله بعد التغيير العربية رجعت كويسة
السؤال بقى ....
لييييه ؟؟؟
هل الزيوت فى مصر مغشوشة؟؟؟
هل المشى مسافات طويلة على سرعات عالية بيحرق الزيت اسرع ؟؟؟ مع ان الفيسكو ماتحرقش يعنى ....
هل ... هل.... هل....
يا ريت اعرف آراءكم
و لكم منى جزيل الشكر
المفضلات