تجربة مع يونيون جروب ( وكيل سامسونج ) ونصيحة فى موبايلات سامسونج ..
كنت فتحت موضوع سابق عن المشكلة اللى حصلت فى تليفونى السامسونج ستار
http://www.nilemotors.net/Nile/17380...post3873006012
والتليفون رجع اتصلح لوحده , وبعدين خلال اسبوع من اخر رد التليفون رجع وقف تانى كما كنت متوقع والمرة دى كنت اخدت Backup والحمد لله ومستعد ابعته التوكيل
طبعا الشركة المحترمة ملهاش غير فرعين صيانة فى مصر كلها , فرع فى اسكندرية فى سموحة والتانى فى القاهرة فى ميدان الحجاز يعنى اللى معاه التليفون فى اسيوط وباظ منه يعلقه فوق التليفزيون اوفر ما يجى يصلحه فى التوكيل
مبدئيا التوكيل اللى انا اشتريت منه هو يونيون جروب وهو التوكيل الوحيد اللى كان متوفر فى فروع موبايل شوب لما اشتريت الجهاز من 8 شهور ودلوقتى سمعت ان موبايل شوب وقفت التعامل معاه وبقت تتعامل مع وكيل تانى اسمه سكاى
السادة يونيون جروب مواعيد عملهم الحقيقة ممتازة من 9 صباحا ل 9 ونصف مساءا , ولكن برغم ال 12 ساعة عمل وال 3 موظفين المختصين فى استلام الاجهزة المعيوبة وبرغم سرعة اجراءات ادخال الاجهزة الضمان كان ليا ملاحظة غريبة جدا فى ال 3 زيارات اللى رحتها المركز
اول مرة رحت المركز لقيت الدنيا زحمة جدا , الاول فكرت ان فى عرض او هدايا وبعدين ذهلت لما عرفت ان كل دول معاهم اجهزة فيها مشاكل ومت من الضحك لما عرفت ان قصادى لسه 32 واحد :))
الكلام ده كان الساعة 8 الا ربع مساءا تقريبا خرجت مع اصحابى اتعشينا ولفينا فى مصر الجديدة لمدة ساعة وربع تقريبا ورجعنا لقينا دخل ورانا اكتر من 25 جهاز تانى ولسه يادوب مشى قبلنا 12 واحد بس , يعنى فى وقت حوالى 4 ساعات دخل قرابة ال 60 تليفون للمركز علشان يعمل صيانة وهو رقم خرافى عمرى ما شوفته فى مركز صيانة تليفونات ابدا فى سابق تعامل مع نوكيا وسونى اريكسون
المعاملة بشكل عام محترمة لكن طبعا من الزحمة والخناق والمكان الصغير بالنسبة للأعداد الكبيرة اللى بتشرف العيار بيفلت كتير والصوت بيعلى على الناس , هو لا ذنب العميل ولا ذنب الموظف لكن ذنب الشركة اللى مش عارفة توفر مكان يليق بعملائها
استلموا منى الجهاز بدون اى ملاحظات ودى حاجة بصراحة تحسب ليهم الجماعة بتوع راية كانوا بيفتحو محاضر ومفاوضات علشان يدخلوا التليفون الضمان !!
ثانى مرة لما رحت قولت اكيد الزحمة كانت مرة عابرة لقيت نفس المنظر بالظبط وكان قبلى المرة دى 26 واحد وعلى ما مشيت كان بعدى فيه حوالى 30 واحد , وبإستدراج الاخ بتاع الامن للسؤال عن الزحمة بطريقة الله يعينكم هو كل يوم كدا !!
قالى يا باشا دا كل يوم بيجى مش اقل من 150 عميل ونصهم بيتخانق علشان تليفوناتهم بايظة واتصلحت وباظت تانى وهى بالمناسبة مشكلة شوفتها بنفسى لما كنت بسلم تليفونى , كان عند الموظف اللى جنبى سيدة كبيرة معاها تليفون من الفئة الغالية لكن معرفش هو ايه تحديدا بيفصل باور ودى المرة الثالثة اللى يتصلح فيها ويبوظ تانى ومش عايزين يبدلوه وقالولها دى اخر مرة لو ما اتظبطش هيتغير البوردة بتاعته لكن مش هتاخد واحد جديد
استلام التليفون كان النهاردة بالنسبة لى , بالطبع الزحام المعتاد لكن علشان انا جاى استلم دخلت على طول واللى عجبنى انى وفقا للميعاد لقيت التليفون جاهز بدون تأخير وهى نقطه تتحسب لهم برده وكان فى رقم اقدر اتابع من عليه التليفون اخباره اصلاحه ايه بكود التليفون المتسجل فى وصل الاستلام
اكتر حاجة كمان اسعدتنى هى ان التليفون متعملوش فورمات والبيانات عليه زى ما هى حتى بدون ما اطلب وقالولى مبنغيرش السوفت غير لو محتاج بس علشان بيانات العملاء متروحش
تقييم الوكيل : جيدا جدا فى المعاملة وجيدا جدا فى مواعيد العمل وجيد جدا فى الاستماع للعميل وفى الموافقة على ادخال التليفون الضمان بدون جدال
عيوبه : فرعين فى الجمهورية كلها بس ودى مصيبة لباقى الناس اللى اشترت فى المحافظات , المكان ضيق جدا فى الفرع الرئيسى
بعيدا عن التوكيل , انا اول مرة اشترى تليفون ويبوظ منى
كنت بتعامل قبله مع النوكيا والسونى بمنتهى العنف وابدا محصلش ان تليفون منهم باظ فيه حاجه وبرغم ان الستار كنت مدلعه على الاخر فى المعامله لكن باظ
الناس كلها اللى داخلة الصيانة من الدردشة معاهم اجمعوا ( مش هشترى سامسونج تانى ابدا ) , الكل بيعانى من عيوب كبيرة يعنى محدش مثلا جاى بيتدلع ده بجانب ان الزحام الدائم ده وكم التليفونات اللى بيدخل الضمان يوميا شئ لا يطمئن بالمرة وبالنسبة لى بيعبر عن مدى جودة التليفونات السامسونج اللى ايقنت انه زبالة الغالى منها والوسط زى اللى معايا
نصيحة !! , اللى عايز يجيب سامسونج بلاش من يونيون جروب او الافضل بجد بلاش سامسونج خالص