انا برة مصر حاليا وراجع أول ابريل ان شاء الله. هازورها واجيب لحضراتكم كل التفاصيل
عرض للطباعة
انا برة مصر حاليا وراجع أول ابريل ان شاء الله. هازورها واجيب لحضراتكم كل التفاصيل
و الله يا جماعة فيه تجربة التعليم المتميز في اسكندرية حتي الان ممتازة زي مدارس زهران اللي في سموحة
مدارس بتاخد مميزات التعليم الخاص في الاهتمام و نوعية المدرسين الاكفاء و كثافة الفصول اللي ما بتتعداش 26 طفل في الكلاس و في نفس الوقت تتبع وزارة التربية و التعليم مباشرة
انا اللي شجعني ابن اختي بصراحة الولد مستواه بسم الله ما شاء الله و دايما الاول علي المدرسة و هو حاليا في grade 3 يعني سنة تالتة و ما فيش مدرسين خصوصين لكن اختي بتبذل مجهود معاه خرافي ربنا يعينها عليه و علي اخوه
الولد بمستواه بينافس ابن اخوي اللي في سنة رابعة و مدرسة دولية في السعودية و معلوماته اغزر بكتيير
لكن لازم الاب يهتم بالدين خارجيا لانه تحت بند الوحدة الوطنية يتم اغفال الناحية الدينية يعني انا جايب محفظة قرآن لمازن ابني في البيت و بسم الله ما شاء الله قرب يختم جزء عم
محمد فهمي
انا اللي اعرفه ان مدرسة حياة غالية اوي ال كي دي ب 25000 جنيه.. يعني دبح.. بس عن مستوى الدراسة بيها فسمعت انها جامدة اوي.
طيب ليه ما سألتش عن منارة الفاروق كله بيشكر فيها و ما أظنش ان مصاريفها غالية اوي.. ده غير انهم بيعلموا الولاد السلوكيات من منظور اسلامي.
بما إن رقية إن شاء الله قربت أوي على موضوع المدرسة ده
عندي كام سؤال كدة ياريت تساعدوني في إجابتهم
أولاً فين منارة الفاروق دي؟
ثانياً تنصحوني بمدرسة معينة في المهندسين بس تكون ادارة حازمة وبتهتم بالدين ومستوى الانجليزي فيها كويس؟
ثالثاُ والأهم
أنا جالي استبحس خلاص من مدارس أكتوبر خلاص
كل ما أسأل حد عن مدرسة "س" يقوللي كلام شكل
ناس تقوللك كويسة وناس مش بطالة وناس زفففففففففت
والمصروفات نفس الشئ
تاخد من كل واحد رقم شكل لمصروفاتها
نفسي أعرف اللي باقابلهم وبيفتوا ويقولوا على مدرسة كويسة أو مش كويسة بيبنوا كلامهم على ايه؟
كل ما أسأل يقولوا مفيش بس هي مش كويسة كإنها أسرار
حاسس إن كله كلام قهاوي
تعرفوا فعلاً مدرسة كويسة في أكتوبر؟؟
المدارس الكويسة في نطاق مدينة نصر والتجمع ( أسعار السنة دي للكي جي والسنة الجاية منعرفش هتغلى قد إيه في ظل هذا الغلاء الرهيب ) :
تعليم أجنبي دون اهتمام بالدين : طلائع المستقبل . المصاريف 5500 شاملة الباص
تعليم متميز واهتمام عادي بالدين (مش دولية ) : الرواد أمام بيتزا هت 2 مصطفى النحاس 5000
تعليم متميز (دولية ) واهتمام يعني أعلى من العادي شوية بالدين ، يعني احتفال بالمناسبات الدينية ومناسك للحج ...الخ القاهرة الدولية للغات أو Cis وهي جنب الرواد ومصاريفها 5000 بالباص . ودي اللي فيها بنتي أميرة
تعليم متميز نسبياً واهتمام متميز بالدين : منارة القاهرة للغات بين عباس العقاد ومكرم عبيد أول تقاطع شمال من عباس العقاد .. 4000 ، 800 باص .. وقائمة انتظار طويلة شوية .
تعليم متميز واهتمام عالي بالدين : منارة الفاروق الإسلامية للغات ( التجمع الأول بجوار أكاديمية مبارك للأمن ) عند الربوة للي حضر المقابلات .. 6500 بالباص ، وقائمة انتظار طويلة برضة .
غير كدة مستويات أعلى دون تميز حقيقي زي زوسر برنسز والبريطانية ومصر 2000 ، أو مستويات شبه الحكومية القديمة بالضبط زي العلا ، أو مستوى زفت زي الألسن وغيرها كتييير .
اللي عايز دين أكثر تعليم متميز فعليه بمدرسة الغد المشرق الأزهرية 5000 غير الباص ، والرحيق المختوم 4000 بدون الباص .
وده اللي أعرفه بناء على لف ودوران كتيييير وقت التقديم لأميرة .
وينبغي التقديم والتربيط والتظبيط مع بداية شهر مايو وإلا لن تجد مكاناً لأولادك ..
لأبو رقية : المدرسة الوحيدة في أكتوبر اللي أعرف إن مستواها كويس هي نيو مانور هاوس ومصاريفها 7000 جنيه بالباص .. واهتمامها بالدين عادي يعني .
ومن أفضل المدارس سمعة في مصر الجديدة مدارس العروبة قديمة ومحترمة .
ومن أفضل المدارس مستوى في التعليم عموماً المدرسة الألمانية في باب اللوق ، ومدرسة السفارة الفرنسية بوسط البلد ، ولكن الاهتمام بالدين منعدم إضافة إلى تشكيلة عجيبة من الطلاب الأجانب .
تقبلوا جميعاً خالص مودتي
انا كنت فى عروبة المعادى, و بعد كده دخلت Igcse فى العروبة برده
الناس كانت محترمة جدا, و المدرسين على اعلى مستوى صراحة و التلاميذ كذلك
و كان فيه اهتمام جيد بالدين و تشجيع عليه
لكن فى السنين الاخيرة بدأ الحال يتبدل, المدرسين مستواهم نص نص, و الطلبة بقى مستواهم اوحش (اخلاقيا) و الواحد بقى مش عارف اخواته يكملوا فين
العائلة بتاعتنا فى العروبة من سنة 1987, يعنى من المؤسسين, و من اشهر العائلات فى مدرسة المعادى, علشان كده مش عارفين نغير, او نروح مكان و نبدأ من اول السلم تانى
لكن نصيحة, حاول تشوف مستوى الناس اللى فى المدرسة, هل لهم نفس او فكر مشابه لك, اتجاهاتهم ايه, و ده بيبان من حاجات كتير, علشان اولادك هيقضوا معظم اليوم هناك, فتبقى مطمئن للحاجت اللى بيسمعوها من زمايلهم او بيشوفوها او كده
على سبيل المثال, اهلى كانوا هيقدموا لى سواء فى كلية النصر فى المعادى او الليسيه الفرنسية, لكن اللى عرفوه من ناس فى المدارس دى عن الطلبة بتعمل ايه, و اولياء امورهم شكلهم ايه, استبعدوا الفكرة.(على سبيل المثال كان فى طلبة بتفتخر و بتكلم عادى ان اهلهم بيشربوا خمر, ووو الى اخره....)
تسلم ايدك يا دكتور على ردك الوافي
وانا في انتظار أي حد من الاخوة يدلني على حاجة كويسة في المهندسين لانها تعتبر نسبياً أقرب مكان لأكتوبر فبالباص مش هاتقعد ساعتين في الطريق يعني
لان كدة نيو مانور هاوس دي ميزانيتها عالية شوية عليا بالاضافة إني محتاج حاجة أعلى من العادي في الاهتمام بموضوع الدين