الموضوع: احترس من تغيير الكارونة

[frame="9 10"]
احترس من تغيير الكارونة
((دفرانس كامل او الكارونة فقط))

تحذير اطلقه الى السادة الاعضاء للامانة
انتشرت فى الاوقات الاخيرة تغيير الكارونة الفيات بانواع اخرى بسبب ارتفاع اسعار الكارونة الفيات و صعوبة الحصول على قطع غيارها ((التاج و البنيول ))
ورخص اسعار الكارونة و الدفرنس البديل و فى الغالب بتكون يابانى
وطبعا الزبون بيضطر يعمل تعديلات فى الكارونة الجديدة و فى العربية فى عامود الكردان و وصلات الفرامل و غيره
و العربية بتمشى و الصوت بيختفى و تعدى

بس خلى بالك
المهندس المصمم للسيارة لما بيجى يحسب سرعات دوران الموتور و الفتيس و عمود الكردان و الكارونة على اساس حسابات و معدلات هندسية علشان يعرف يخرج احسن قدرة من الموتور واحسن اداء للسيارة
الكلام دة بيحصل فى كل عربية بتنتج على مستوى العالم
ولو كانت كل الحسابات زى بعض مكنش حصل ان عربية احسن من عربية مع مراعاة اسلوب نقل الحركة و الدفع
طيب انا النهاردة لما اغير كارونة عربيتى 131 او 132 او 125او124 او اى عربية تانية بكارونة غير موديل عربيتى
انا كدة بحل مشكلة و بدخل فى مشكلة تانية
المشاكل الناتجة من التغيير
1- سرعة الكارونة الجديدة مختلفة عن القديمة ((الفبريكة))
2-ارتفاع فى معدل استهلاك البنزين
3-انخفاض السرعة القصوى للسيارة
4-تعديلات فى فبريكة العربية ((مجموعة نقل الحركة و الفرامل و خلافه ))
5-احتمال وجود اهتزاز اسفل السيارة مع السرعات ((بسبب تغيير طول عمود الكردان))
6-احتمال عدم ثبات السيارة فى المنحنيات((بسبب تغيير مكان نقطة ثقل و ثبات و اتزان السيارة مع الدفرانس الجديد عن الفبريكة))
7-انخفاض قيمة اعادة بيع السيارة بسبب التعديل
المميزات الناتجة من التغيير
1-اصلاح و انتهاء مشكلة الكارونة
2-تكلفة التعديل اقل من الاصلاح
3-حل سريع مع وعود كتير جدا بعبقرية الحل و مميزاته
بس الصراحة
لو كانت الكارونة الفيات غير جيدة و غير متميزة مكنش حصل ارتفاع فى اسعارها و ندرة فى وجودها و زيادة الطلب عليها
طب منين تكون معايا كارونة فيات و اقبل ابدلها بكارونة او دفرانس من نوع تانى و فى الغالب بيكون يابانى
انواع الدفرانس البديلة فى السوق
1-الكرسيدا ((تويوتا يابانى ))
2-الداتسون ((فى الغالب بتكون نصف نقل))
3-السوزوكى ((نصف نقل))
4-الفولفو((سويسرى))
ملحوظة
1-كارونة الكرسيدا و الفولفو بيكون الموتور 2400سى سى الكارونة بتكون سرعة عادية و ليست سريعة
2-كارونة النصف نقل بتكون بطيئة لان العربية عزم و ليست سرعة
وفى النهاية
اتمنى من الله ان اكون وفقت فى اظهار عيوب تغيير فبريكة الكارونة فى السيارات و انارة الطريق للسادة الاعضاء

[/frame]

المشاركة الأصلية كتبت بواسطة sab3aawy

موضوع هام ومفيد لكن لى عدة تعليقات

1- معظم الناس اللى بتغير الكرورنا بتغيرها لسيارات قديمة ليس هدفهم منها الشد ولا الغرز ولا تجارب الثبات على طريق وادى النطرون العلمين ولكن هدفهم منها عودة وسيلة المواصلات التى يمتلكونها للعمل بدون ازعاج لكى ترحمهم من بهدلة المواصلات وبالتالى المشاكل التى تظهر بعد سرعة ال 100 هى غير ذات موضوع بالنسبة لهم لأنه إما ان السيارة مش بتجيب 100 أصلا واما ان السيارة لما بتعدى ال 100 بتبان عليها 100 مشكلة اخرى مثل الغربلة والعومان وارتفاع صوت المحرك بشدة واحيانا ارتباك المحرك وفى حالات بعينها روائح شياط وربما مدافع من الشمكان وبالتالى فإن مشاكل انعدام الاداء المثالى مع هذة السيارات فى السرعات العالية مشاكل غير واردة لان اصحابها مش بيعدو حد السرعات الآمنة

2- الكورونات التى تعارف الجميع على تبديلها مكان كورونات الفيات مثل الكورونا الفولفو(بالمناسبة الفولفو صناعة السويد) صارت معروفة فى السوق منذ سنوات طويلة بفعل نجاح تجارب تبديلها الاولى، وبالتالى فان من يقوم بهذا العمل يقوم به بناء على سمعة نجاح هذة التجربة
3- الفروق بين نسب تخفيض كورونات سيارات البنزين فروق ليست كبيرة، يعنى بنتكلم فى من 1:4 فى أسوأ سيارة وحتى 1:5 فى أفضل سيارة فى هذة الفئة ، ولكن الأرقام الفعلية تكون متقاربة اكثر من ذلك وده معناه اننا مثلا هنغير كورونا نسبتها 1:4.25 الى كورونا نسبتها 1:4.6 ، هذا سيؤدى الى خطأ فى قراءة العداد اللى غالبا بيقرا غلط اصلا بعد 30 سنة خدمة ، وسيؤدى الى ارتفاع السرعة المقابلة لأقصى عزم للمحرك، لحسن الطالع ان كل محركات فيات الفديمة تخرج اقصى عزم لها عند سرعات منخفضة تتراوح بين 2500 و 3500 لفة للدقيقة مما يعنى اننا لازلت لدينا القدرة على الحصول على أقصى عزم للمحرك على سرعات منخفضة بالكرونا الجديدة، يعنى بدل ما كنا بنحصل عليها عند سرعة 80 كم/س على الرابع هتبقى عند 90 مثلا.
اما بالنسبة لتغير مركز ثقل السيارة نتيجة لتغير وزن الكورونا فيجب ان نتفق ان تأثير مركز ثقل السيارة يتغير بشدة لو واحد مليان شوية ركب فى الكرسى الخلفى او بجانب السائق، ومع كدة السيارة لا تنقلب كلما ركبها راكب ثقيل الوزن بجوار السابق، لذا ارى ان حكاية مركز الثقل دى مبالغ فيها شوية، فروق الاوزان بين الكورونات لا تمثل وزن شروة خضروات وفاكهة توضع فى شنطة السيارة وتأثيرها مع ذراع عزمها الطويل نتيجة لوجودها فى آخر السيارة اكثر بكتير من فرق الوزن بين كورونتين
4- تبقى نقطة اخيرة انه بتجربة السنوات الطويلة أؤكد ان الصلب الألمانى والسويدى واليابانى لا يتآكل بسرعة الصلب الإيطالى ، والذى بدروه أفضل من صلب روسيا وصلب شرق أوروبا، ولو حبينا نرتبهم بقوة التحمل هيبقى الى حد كبير كالتالى: ألمانى وسويدى بنفس الدرجة، فرنساوى ويابانى فى نفس الدرجة، إيطالى وكورى بنفس الدرجة، تشيكى ، بولندى وتركى بنفس الدرجة، روسى ، لذلك فان عمرنا ما شفنا سيارة فولفو او مرسيدس مثلا ولو من السبعينات ماشية الكورونا بتاعتها بتجعر، وكورونا سيارة فولفو لو حلت مشكلة سيارة 132 بشكل مقبول فده معناه غالبا حل نهائى لحين نهاية عمر السيارة، بعكس الكورونا التركى بتاعة الشاهين اللى بتبتدى صوتها يعلى بعد 150 ألف كيلومتر من الزيرو مع العناية الفائقة، او كورونا ال 132 اللى بتبتدى تطقطق مع الطلعة بعد أقل من 100 ألف كيلومتر من الزيرو
5- لذلك ربما يكون الموضوع هام بالنسبة لحد عايز يجيب عربية 131 ويحولها الى سيارة سباق، وساعتها هتبقى فروق الاداء الضئيلة هامة وده مش هيهمه المصاريف لأنه هيصرف عليها قد وزنها دهب، لكن بالنسبة لشخص عادى السيارة بالنسبة له وسيلة مواصلات كريمة تقضى احتياجاته المكسسب اكبر بكتييييييييير من الخسارة فى حالة استخدام كورونا سويدى او يابانى يتم تعديلها عند متخصص، والمكسب ايضا لكل من يستعمل سيارة من ظرازات اخرى انه مش مضطر ينطرش بسبب جاعورة التاكسى البولونيز أو يتعطل على كوبرى اكتوبر بسبب كورونا الشاهين اللى فرطت

فاضل اضيف حاجة بسيطة جدا انى جربت اركب سيارات فيات متعدلة الى كورونات فولفو تحديدا وبصراحة النتيجة كانت اكثر من معقولة لحد 100 كم ساعة يشكر عليها من ابتكرها، و

[frame="9 10"]
استاز سبعاوى
الف الف شكر على مرور سيادتكم و التعليق الغنى العلمى للموضوع
واعتز عن التاخر فى الرد على تعليق سيادتكم
فى البداية احب اوضح الفكرة و الهدف الاساسى من كتابة الموضوع
ليس اعتراضى على فكرة تغيير او تعديل الكارونة هوة الاقلال من كفائة الفنى المصرى فى وجود حلول بديلة و تعديلات
لاكن اعتراضى هوة عن عدم ايضاح رد الفعل المتوقع بعد التعديل
وان كان بعض السادة مالكى السيارات لا يفرق معاهم التعديل و فى الغلب بتكون فى سيارات زات بعد وظيفى مثل التاكسى و سيارات الشركات الخاصة بنقل السادة الموظفين و خلافو 000
فانة يوجد فائة اخرى تهتم بان تكون سياراتهم فى وضع الفبريكة الى اطول وقت ممكن و الحفاظ عليها
وليس المقصود من المحافظة على فبريكة السيارة هوة الجرى و الشد
ولاكن بيكون لة مردود فى سعر اعادة البيع
فاكيد سعر السيارة المتغيرلها الكارونة و متعدلة بيقل عن سعر السيارة الغير معدلة
كما احيط علم سيادتكم ان لو اعتبرنا ان كل العدادات فى السيارات بتقرا غلط مكملش دة كمان بتغيير نوع الكارونة
او على الاقل اكون فاهم ان العيب دة حيحصل و مغيرش على عمايا
كما احيط علم سيادتكم ان التغيير الكامل للدفارنس بيتبع لية تغيير فى اسلوب و نوع الفرامل الخلفى للسيارة و بيكون تابع للدفرانس المعدل وليس اصل السيارة
فهل كل ما زكر من عيوب لتغيير نوع الكارونة و التعديل لا يحتاج الى موضوع لايضاح هذه العيوب للسادة الاعضاء
على الاقل يكون عارف اية مميزات و عواقب التغيير حتى لو بسيطة و هامشية كما تفضلت سيادتكم بالزكر ((فى بعض النقاط))؟؟؟؟؟؟؟؟؟؟؟؟؟؟؟؟؟؟ ؟؟
ارجو من سيادتكم تقبل ردى
واكرر شكرى لسيادتكم على المعلومات التى اثرت و اغنت الموضوع
واشكر سيادتكم على افادتى شخصيا بمعلومات سيادتكم
[/frame]