الموضوع: تجربة مثيرة مع ال abs

الف الف سلامة عليك و الحمدلله على سلامتك

و فعلا دي حاجة جديدة عمري ما كنت سمعتها عن الabs

بس ازاي اعرف عربيتي فيها ABS ولا لا ؟

الف سلامه عليك يا استاذ bukla والحمد لله انها جات سليمه و انت و العربيه بخير و فعلا الرينو بتثبت انها عربيه تستاهل كل قرش اندفع قيها

المشاركة الأصلية كتبت بواسطة bukla

بسم الله الرحمن الرحيم
انهاردة و من حوالى 4 ساعات الحمد و الشكر و الفضل لله ربنا نجانى من حادثة كانت حتبقى فظيعة بفضل من الله و ال ABS
كنت راجع من الشغل فى المعادى عن طريق الدائرى و نزلت من النازلة الجديدة فى شارع السودان علشان الف و ارجع من تحت كوبرى فيصل المهم علشان كنت متأخر كنت ماشى بسرعة على حوالى 90 ل 100 كيلو على يمين الطريق اللى كان فاضى تماما و كنت لامح ميكروباص كان قدام على شمالى و قبل مطلع كوبرى فيصل مباشرة فوجئت بالميكروباص راح كاسر يمين بعرض الشارع قدامى بمسافة حوالى اقل من 40 متر روحت ضارب فرامل بقوة لقيت الدواسة بترعش تحت رجلى و لسة داخل علية فى منتصف جنب الميكروباص اليمين مباشرة و فى اللحظة دى الحمد الله تذكرت جملة فى مقالة عن ال ABS كنت قريتها فى موقع contact car بتقول اللى معاة عربية فيها ABS يجب ان يتذكر دائما انه فى حالة الطوارئ و مع عمل ال ABS اثناء الضغط على الفرامل مازلت عندك القدرة على استعمال الدركسيون علشان تفادى الحاجة اللى حتخبط فيها و هيا دى فايدة ال ABS الحقيقية فرحت كاسر الدركسيون بشدة للشمال ومرجعة لقيت رصيف مطلع الكوبرى فى نص العربية بالظبط روحت كاسر الدركسيون تانى بشدة لليمين و رجعتة
النتيجة و الحمد الله الف مرة مافيش اى خسائر و العربية و قفت مستقيمة فى منتصف الطريق جنب الكوبرى بصيت فى المراية لقيت الميكروباص ورايا بحوالى 10 متر و الركاب نازلين منة و جايين ناحيتى من الشمال و اليمين و انا مش قادر اتمالك اعصابى و هما بيحاولوا يهدونى و بيقولولى الحمد الله ربنا ستر السواق غلطان و معلش و كلام من دة و انا عمال اقولهم الحيوان دة حيموتنا كلنا بطريقة سواقتة دى
بصراحة ما بقيتش عارف اعمل اية كنت حاسس انى لو نزلت من العربية و روحت لسواق الميكروباص اللى قاعد متنح مكانة فى الميكروباص كان حيحصل حاجة من اثنين يا حقتلة يا حيقتلنى فقررت انى احمد ربنا انها جت سليمة و امشى احسن
انا بحكيلكم التجربة دى علشان نستفيد منها و نعرف ان فايدة ال ABS مش فى قصر المسافة اللى بتقف فيها العربية فى حالة الفرامل بالعكس العربيات اللى مافيهاش ABS بتقف فى مسافة اقصر بس بتفقد التحكم فيها تماما لو حاولت اثناء الفرملة تكسر الدركسيون يمين او شمال اما العربية اللى فيها ABS بتقدر تكسر الدركسيون زى ما انت عايز علشان تفادى الحاجة اللى قدامك علشان كدة اصحاب العربيات اللى فيها ABS ارجوكم تزكروا دائما الجملة اللى فوق ممكن تنقذ حياتكم و حياة ناس تانية
اخيرا اسف على الاطالة و الحمد الله على النعمة اللى ربنا اكرمنا بيها
السلم عليكم و رحمة الله و بركاته

الحمد لله علي سلامتك.
الأفضل بدل ما نقول "بفضل الله و الABS" نقول "بفضل الله ثم الABS"