الموضوع: احترس من صنايعية الحي السابع - سرقة و نهب و احتيال و كل مبئات الارض

مع احترامي لساكني الحي السابع خصوصا الي بجنب منطقة ال " ميني حرفيين " دي ... دي منطقة موبوئة و الله يهدها على بورشها على المفتريين و الحرامية و النصابين الي هناك .

انا كنت عارف انهم حرامية و غاليين ... بس اغبية و نصابين ... دي جديدة !


اول تجربة ... في سمكري مشهور جدا هناك مش حذكر اسامي علشان لقيت ناس هنا تعرفهم ..
عامة هو سمكري ملوش محل او ورشة هو واخد ناصية الشارع كله ما شاء الله و العربيات راكنة في الشارع وبيصلح فيها كدة ...

المهم اول تجربة ... لية صديق .... معاه تريوس ( القديمة ) ... مقفلش الكبوت كويس و هو ماشي الكبوت فتح و رزع في الزجاج كسره .

غيرناه في محل في شارع الطيران مش فاكر اسمه بس بصراحة ناس شغلهم تمام و سريعين جدا .

المشكلة ان الكابوت اتحرك من مكانه و مش راضي يقفل .. محتاج يتشد للخارج كدة شوية على البارد .

طبعا اقرب حاجة لينا كانت الحي السابع .. رحنا .. فتح السمكري الشهير الكابوت !

وبدا الفتي !!!

" اه يا باشا .. المشكلة عندك في الصدر ... العربية اتخبطت في الصدر فاكبوت مش حيقفل ..

" قلتله لأ .... العربية متخطبتش ولا حاجة و حتى لو اتخبطت الكبود كان بيقل عادي لحد موضوع الازاز ده الصبح ...

- يا بيه انا عارف انا بقول ايه ! هي دي اول عربية اشتغل فيها ...

" لأ انت عايز تلبسنا زرجينة بس على الفاضي و تاخدلك 100 جنيه في الهواء ( بتهريج طبعا علشان متضرب وسط السابع ) .

- ها ها... ماشي يابيه شوف انت عايز ايه !!

- شوفلنا حد يرد الكبود على البارد ...

- تعالي يا مش عارف مين يابن فلانة الي مش عارف مالهة !!!

جه فولان ... خبط الكبود بايده ... اتعدل الكبود ب 10 جنيه و خلص الموضوع .

بالمناسبة احب اعلق على صاج التريوس القديمة ... انا شفت اختها الصينية و قعدت اشتم فيها و اقول دي ورق ومش ورق .. بس واضح ان العيب مش من الصين ... العربية صاجها زبالة الزبالة ... الكبود ولا كانه بلاستيك !! ( مع احترامي برده لملاكها ) بس العربية فعلا ورق !

دي كدة معاملة سريعة .. انا لو مركزتش او مكنش ليا اوي في موضوع الخبطات ده كنت قلتله اتفضل ... و ادفعلي 150 جنيه مثلا علشان خبطة زي دي !


----------------


المشكلة التانية ... و دي حصلتلي انا شخصيا بعربيتي ...

الحمد الله العربية تمت 85 الف كم من اسبوع .. و طبعا مينفش متعيدش عليا بمصيبة او مشكلة .. جتها القرف فيها و في الي عملها ! يحرق ساركوزي على رونالدينيو !!!!

المهم .. و انا ماشي في امان الله ... لقيت مؤشر الحرارة عمال طــــــــــــــــــــــــ ـالع و بخار ماء جاي من قدام !!
قلت ينهرا اسود !

ركنت على جنب .. لقيت ماء الردياتير تبخر تمامممممممممممممممما كنت لسة غاسل الردياتير في بنزينة وطنية الي جنب سيتي ستازز .. ربنا ياخدهم واحد واحد هما كمان !!!

طب ازاي الماء بيتبخر ... و الديراتير مقفول كويس جدا !!!!

اتجننت ... زودت اي ماء لقيته قدامي ... و كلمت واحد صاحبي قالي بيك على راكل ملقب بال " السني " في السابع ! قلتله يابني انا مش بحب بتوع السابع دول ... قالي عيييييييييب عليك ! ده راجل برنس !

رحت اقابل البرنس ده .. و المفاجاة الاولى انه مش سني اصلا ! ما علينا انا مالي !

بص ياعم على العربية ...

10 ثواني ... اه يا باشا ده عيب غطاء !! غطاء التانك ساح !

احمدك يا رب بس كدة !

قلت اروح اجيب غطاء التانك الاصلي بقى بالمرة !

اكلم التوكيل !
عايز غطاء عربية فيات باليو الخ الخ الخ ...

ايوا يافندم ! 75 جنيه ان شاء الله !

75 جنيه ايه يا عم بقولوك غطاء تانك واحد ... مش التانك نفسه !

ايوا يافندم سعره 75 جنيه علشان ده اصلي !!

قفلت السكة !

رحت على دمشق ... لقيت نوعين ... اصلي ب 45 جنيه ... و صيني ب 20 جنيه !

اخدت الاتنين من الراجل و قلتله حجرب و ارجع واحد فيهم .

طلعت على الاسطة السني !!

و طبعا مشغل التكيييييييييييف علشان المياه متتبخرش بسرعة .. في عز الشتاء و جالي برد و بلاء اسود !


جرب الغطاء الصيني ..... نفس المشكلة ...

جرب الغطاء الاصلي ... نفس المشكلة ...

" بس يا بيه ... الاربة دي بايظة ... غيرها "

------

ارجع تاني على دمشق ... هات الاربة .... اصلي يا عم .... 185 جنيه .. شكرا ...


الوقت اتاخر ... ركنت العربية و رحت تاني يوم ....

الاربة يااسطى .... ياسلام ! حتبقى زي الفل ان شاء الله ...

ركب الاربة .... الحمار الي عنده بيفتح المحبس بتاع خرطوم الردياتير ... كسره !!! و هو عبارة عن مسمار بلاستيك مقاس 10 .. قالي احسن احسن ! احطلك واحد تيتانيوم مستورد انما ايه ! فلة !!

استر يا رب ...

ركبنا الاربة الجديدة ... حطينا الماء ... سخننا العربية شوية ....

الحمد الله ... مفيش حــــ..... اده اده اده ! بخار ماء و نفس المشكلة تاني !

" لفظ غير مهذب مني " !!!!!!!!!!! امال خلتني اجيب اربة ليه !!!!!؟؟؟؟؟؟؟؟؟؟؟

- معلش يابيه ... حروح اصلي و اجيلك على طول !!!

تصلي !!! ياخي يصلوا عليك ان شاء الله !!

قتلته حروح اجيب اكل ... سبته و خدت العربية و فلسعت ! !

لبست حوالي 250 جنيه و العيب زي ماهو ...

واحد ابن حلال تاني ( الله يسامح الاولاني :) ) قالي في مركز فايدكو وراء السراح و ناس محترمة جدا و مش عارف ايه ..

رحتلهم .... هو مش مركز اوي يعني .. هي ورشة كبيرة بس انضف الف مرة من كل ورش السابع !

جه الراجل ... بص على العربية ... قالي العربية اتغسلت قريب ؟ قلتله اه ...

قالي طيب لحظة .. جاب خرطوم ماء و حطه في الردياتير و فتح المحبس و قالي الردياتير فيه هواء مش اكتر ... 5 دقائق قفلنا تاني قالي جرب و سخن العربية ...

اجرب .. حرقت ... المروحة اشتغلت ... و كله تمام و لا فيه بخار ولا اي حاجة ... كام يا عم ؟؟ 10 جنيه يا باشا !


في 25 دقيقة بالظبط ! و ب10 جنيه ... بدل 250 جنيه و عك و يومين شغل ومحبس مكسور !

الي يروح السابع ده تاني ... زنبه على جنبه !

وللامانة انا معرفش اي حد في المركز التاني ده ولا بعمله دعاية ولا حاجة بس صاحبه راجل ذوق جدا و الناس الي شغالة في واضح انهم شغالين في توكليلات مش صنياعية تحت السلم .

و ارجوا اني اكون حذرتكم او جنبتكم سرقة او نهبة او خرابة من البقر الي هناك !