طريقة اختبار البيجوهات

**amro1965** · 04-12-2010 05:52 PM

السلام عليكم ورحمه الله وبركاته
سؤالى لاصحاب السيارة التى تكون دائما ايديهم فى السيارة واتمنى ان اكون مثلهم
كيف اعرف ان احد البيجوهات بايظ ومحتاج تغيير
وايه الفرق بين البوجيهات 2 شمعه وثلاثه شمعه
شكرا لجميع الاعضاء

**zastaffa** · 05-12-2010 01:49 AM

بص يا عم الحاج..... تدور العربية وتبتدي مثلا بالبوجيه الاول فتخلع السلك بتاعه المفروض انك أول ماتخلع السلك العربية تقوم مبرجله ويقعد الماتور يترجرج ويتنطط.....بعد كده تقوم مقرب السلك من البوجيه كأنك هتركبه.... فلو البوجيه شغال هتلاقي شرز جامد حصل بين رأس البوجيه وكلبس السلك بتاعة.... أما لو قاطع مش هتلاقي أي شرز....وهكذا مع باقي البوجيهات.........خلي بالك أول لما تيجي تمسك سلك البوجيه والعربيه دايره أوعي تكون أيدك التانيه أو أي حته من جسمك مريحه علي جسم العربيه ...عشان متروحش عامل أرضي وتقوم واخدلك جرعة كهربه محترمة لن تنساها ابداااااا وتصبح تذكار..........أما بأه الفرق بين البوجيه الواحد شمعة والاتنين والتلاته شمعه هو ان التلاته والاتنين شمعه عمرهم أطول بكتير لأن ليهم أكتر من طرف أرضي فلو قطع واحد منهم بيفضل البوجيه شغال علي التاني أو التالت وهكذا

**dr.hazem** · 05-12-2010 02:04 AM

متابع للموضوع

**khaled_sabry** · 05-12-2010 11:14 AM

المشاركة الأصلية كتبت بواسطة amro1965

شكرا اخى العزيز على معلوماتك القيمة 0
طيب ده اكتشاف اعطال البوجيهات والسيارة شغاله
طيب هل توجد طريقه لاختبار البوجيهات والسيارة مبطلة خوفا من شده الكهرباء
مثل فك البوجيه ورؤيته وفحصه علما لانى ليس لى درايه كل اللى بشوفه من الميكانيكيا ان بيسنفر البوجيه وساعات اشوفه بيوسع او يضيق سن البوجية الله اعلم
بالاضافه انى عايز اشترى مفتاح فك بوجيه لكن للاسف معرفش رقم المفتاح لانى سالت اصدقاء لى بيقولو لى انه بيختلف من سيارة الى اخرى
سيارتى ريجاتا نوفا

بالنسبه لمقاس مفتاح البوجيهات هو كله مقاسين
احسن حاجه خد معاك بوجيه قديم و اديه للبياع و هو يجيبلك المفتاح اللى على مقاسه
بالنسبه لجوده البوجيهات ... الطريقه اللى مذكوره دى تحددلك البوجيه قاطع و لا لاء
لكن لو عاوز تعرف كفأءه البوجيهات دى بتعرفها بالاحساس و لما تتأخر فى الدواره الصبح و شويه حجات كده وساعتها بتغير الطقم كله على بعضه ب 30 جنيه الطقم

**zastaffa** · 05-12-2010 11:31 AM

عايز اشترى مفتاح فك بوجيه لكن للاسف معرفش رقم المفتاح لانى سالت اصدقاء لى بيقولو لى انه بيختلف من سيارة الى اخرى
سيارتى ريجاتا نوفا

بص ياسيدي لما تروح للراجل بتاع العده هتقوله عايز مفتاح بوجيهات هيقوم سائلك سؤال واحد فقط .....مفتاح بوجيهات أيه؟؟؟؟؟ هتقوم أنت رادد يعني أيه؟؟؟؟ هيقولك مفتاح بوجيهات موتوسيكل ولا عربيه؟؟؟طبعا هتقوله عربيه...وده بيعمله بتاع 7جنيه......بس خد بالك لو البياع مسألكش وأداك المفتاح علي طول ...لازم انت تسأله ...بتاع عربيه ده ولا موتوسيكل.....عشان مفتاح بوجيه الموتوسيكل أصغر من مفتاح بوجيه العربيه...طبعا لأن بوجيه الموتوسيكل أصغر من بوجيه العربية

**tamer_a7** · 05-12-2010 01:04 PM

المشاركة الأصلية كتبت بواسطة zastaffa

بص ياسيدي لما تروح للراجل بتاع العده هتقوله عايز مفتاح بوجيهات هيقوم سائلك سؤال واحد فقط .....مفتاح بوجيهات أيه؟؟؟؟؟ هتقوم أنت رادد يعني أيه؟؟؟؟ هيقولك مفتاح بوجيهات موتوسيكل ولا عربيه؟؟؟طبعا هتقوله عربيه...وده بيعمله بتاع 7جنيه......بس خد بالك لو البياع مسألكش وأداك المفتاح علي طول ...لازم انت تسأله ...بتاع عربيه ده ولا موتوسيكل.....عشان مفتاح بوجيه الموتوسيكل أصغر من مفتاح بوجيه العربيه...طبعا لأن بوجيه الموتوسيكل أصغر من بوجيه العربية

علي فكره المعلومه دي غلط
مقاس البوجيهات بينقسم الي نوعين بيتم تصنيفهم علي حسب قطر صاموله الفك الموجوده في اعلي البوجيه
18 ,16
انت في الريجاتا هيكون المقاس الكبير
ودا اللي الراجل هيديهولك اتوماتيك
المقاس التاني قليل جدا وبيكون بالطلب
مقاس بوجيهات الموتوسيكلات و العربيات واحد
دا حتي الفسبه كنا بنركب ليها نفس البوجيه

**zastaffa** · 05-12-2010 01:20 PM

علي فكره المعلومه دي غلط
مقاس البوجيهات بينقسم الي نوعين بيتم تصنيفهم علي حسب قطر صاموله الفك الموجوده في اعلي البوجيه
18 ,16
انت في الريجاتا هيكون المقاس الكبير
ودا اللي الراجل هيديهولك اتوماتيك
المقاس التاني قليل جدا وبيكون بالطلب
مقاس بوجيهات الموتوسيكلات و العربيات واحد
دا حتي الفسبه كنا بنركب ليها نفس البوجيه

كلامك غلططططططططططططططططططططططط ططططططططططططططططططططططططط طططط وأي حد بيفهم ميكانيكا كويس هيدخل ويقولك أن كلامك غلط........لأنه بوجيه العربيه حاجه وبوجيه الموتوسيكل حاجه تانية خالص ومقاسه أصغر......

**zastaffa** · 05-12-2010 01:44 PM

وكمان عايز أقول أنه العربيات الحديثة ليها مفتاح بوجيه خاص طويل عشان بوجيهاتها غطسانه في وش السلندر ......لكن برضوا مقاسات بوجيهات العربيات كلها واحد أيا كانت بأه جديده ولا قديمة ...بس بتفرق أن في عربيات بوجيهاتها باينه من وش السلندر وبالتالي ممكن يجيبها المفتاح العادي زي الفيات كده......وفي عربيات لازم لها مفتاح طويل عشان زي مقولت بوجيهاتها غطسانه في وش السلندر زي العربيات الحديثة وكمان البيجو ال504 وموديلات تانيه أكيد معرفهاش