من هي الانجلون ؟ ولماذا تهاجم ؟

**anglon2010** · 25-12-2010 03:32 PM

من هي الانجلون ولماذا يهاجمها اعداء الصيني ؟
اولا احب ان اعرفكم علي الانجلون الجميله انجلون هي شركه انجليزيه الاصل انشئت عام 1978 تقريبا واستمرت حتي العام 2007 ومن ثم بدأت في التداعي مثيل شركات كبري اخري واذا بالمارد الصيني يقوم باصطيادها والعمل علي تطويرها كما فعلت مع فولفو العريقه والعلامه الكبري هامر وغيرها .
اما بالنسبه للمهاجمين فلا اعرف لما يهاجمها البعض دون التعرف اليها ولماذا يهاجم الصيني علي الرغم من ان حياتنا كلها صيني في صيني الملابس المفروشات الاقلام الاوراق الاحذيه الادوات الكهربيه والغير كهربيه والخ الخ الخ مش عايز اطول والاهم من كده ان اعظم عربيا فالعالم بتتقفل في الصين لرخص اليد العامله مثل المرسيدس والمتسوبيشي و فورد و مئات الماركات وخاصه التويوتا واللي بتتقفل مع الانجلون في نفس الشركه و ليه ياناس هاجمتم اللانوس والهايونداي في بدايه ظهورها ودلوقتي الشعب المصري بيعشق ترابهم وبعدين الصيني احسن من المصري ولا ايه اقصد التقفيل المصري زي الفيرنا والشيفورليه .
علي العموم ده نبذه من موضوع الاستاذ الكبير حازم تعرفكم عليها:
بنظرة سريعة على السيارة نجد أنها تتقمص شخصية سيارات مرسيدس الفاخرة من اﻷمام و الخلف
مما يعطى السيارة مظهر فخم و أنيق

بوجه عام فإن للسيارة خطوط إنسيابية سلسة تعطى شعورا بالرشاقة ﻻ يخلو من القوة

و أبعاد السيارة 4682 × 1725 × 1485 mm

طول قاعدة العجلات 2602 mm

سعة شنطة الأمتعة 560 ليتر
و كما يلاحظ فإن السيارة مزودة بحساسات للركن

و تتميز مقدمة السيارة بالشبكة البسيطة و الأنيقة فى نفس الوقت
و كذلك المصابيح الأمامية و الشكل الحلقى لأضواء الإشارات
و الشكل المميز لمصابيح الشبورة

مقابض الأبواب نيكل
إشارات على المرايات
جنوط ألومنيوم و إطارات مقاس 16 بوصة

من الداخل

التابلوة عادى من البلاستيك بلونين
راديو MP3 / CD

تكييف أتوماتيك

الكماليات المعتادة فى السيارات الصينى

مساحة داخلية جيدة

المحرك

CVVT 4 Cylinder ,16 Valve
سعة 1498 cc

قدرة المحرك 118حصان عند 6000 لفة فى الدقيقة

ناقل السرعة يدوى خمس سرعات
أقصى سرعة 180 كم

اﻷمان
فرامل ABS EBD
وسائد هوائية أمامية

السعر الرسمى 80000 جنيه

التوكيل أبو غالى أوتو - العبور
وعن تجربتي الخاصه السياره معايامن شهر 7 والعربيه فوق الوصف من عارف اقول ايه سحب مالوش حل ثبات خرافي ودي اهم صفه عجباني فيها علي 145 - 150 - 160 مالهاش حل انا كان عندي لانسر واكسيل وهي افضل منهم بمراحل متتوصفش وكل اللي جابها شكر فيها شكلا وموضوعا
وانا شخصيا متيم بيها واللي عايز يجيبها ميترددش ويتوكل علي الله وهو الكسبان وانا تحت امركم فاي استفسار. ودي شويه صوره ليها

**pharonicking** · 25-12-2010 04:28 PM

انت حسستنى انها احسن من المرسيدس وفين الصور دى؟

**amribrahim** · 25-12-2010 05:32 PM

معلش يا مان ممكن تكون حلوة لكن مش هتبقى أحلى من الميتسوبيشي أو المرسيدس ألخ ألخ ..... ههههههة

**alaa99991111** · 25-12-2010 05:42 PM

وجهة نظر محل تقدير

**moody1** · 25-12-2010 07:18 PM

مش عارف ليه حاسس انى بقرأ اعلان فاهرام الجمعة

**Xander2010_Evo** · 26-12-2010 01:01 AM

أو إعلان ف أخبار اليوم بتاع السبت :))
بس شكلها حلو :))

**bassem.naguib** · 26-12-2010 01:59 PM

العربية فعلاً انا شفتها على الطبيعة عند أبو غالي .. والعربية فعلا تقفيلها حلو جداً .. وخامات جيدة جداً (زي الكوري النضيف) .. بس مجربتهاش في السواقة .. وكان سعرها 78 ألف .

**a_saladen** · 27-12-2010 11:44 AM

شكرا على المعلومات
أنا قريت في موقع ان معدل استهلاك البنزين هو 4.9 لتر/100ك
الكلام ده صحيح ولا مش مظبوط؟؟
يا ريت حضرتك من خلال تجربتك العملية تقول لنا معدل الاستهلاك العملي بتاع العربية دي
وبعدين القدرة الحقيقية هل هي 118 حصان أم 106 حصان؟؟ لأن حجمها كبير وسعة الموتور 1498 سي سي

**anglon2010** · 30-12-2010 04:47 PM

اولا النسبه للصور بحاول ارفعها
ثانيا الماتور 118 حصان وده باين قوي فالسحب من البيانات المرفقه معاها واستهلاك البنزين بالظبط 6 لتر/100 كم
وثالثا هي طبعا مش احلي من المرسيدس بس احسن من اللانسر وده بناء علي تجربه سابقه وتجارب اللي جابو العربيه