شركة موباكو ...تحترم عملائها....وصنع في مصر
السلام عليكم ورحمة الله وبركاته
تبدأ الحكاية من يوم 6\12\2010 كنت تاني يوم مسافر رحت موباكو اللى في جولف سيتي العبور اشتريت تي شيرتين واحد رمادي والثاني لبني....انا جيت اقيس قست الرمادي بس(ودي غلطة قيس كل اللبس اللى انت بتشتريه) واخترت التي الشيرت اللبني بناء علي مقاس الرمادي اللى طلع مظبوط بعد فترة لما جيت البس اللبني حسيت انه اوسع والأساور بتاعته واللياقة واسعة عن التي شيرت الرمادي ....غسلت التي شيرتين قلت يمكن يتعدل بعد الغسيل برضه نفس الموضوع ...رحت للمحل وقلتله علي اللى حصل وخد بالك..
انا رحت يوم 20\12
مافيش فاتورة
التي شيرت اتغسل حوالى مرتين
الراجل قاللى ممكن من العسر التي شيرت عمل كده فهمته ان التي شيرت الرمادي زي الفل ونفس طريقة الغسيل..طلب مني الفاتورة قلتله مافيش راح طبعلي فاتورة تانية وكنت عاف تاريخ الشراء فطلعت بسهولة (عرفت التاريخ من تاريخ الصور اللى اتصورتها وانا مسافر تاني يوم) فقالى انا هوديه المصنع يوم الخميس واكلمك يوم الأثنين اللى بعده قلت ماشي
وبالفعل اتصلوا بي النهاردة وقالولي التي شيرت اتقبل في المصنع وممكن حضرتك تيجي المحل في اي وقت تستبدله بأي حاجة.
علي فكرة صحيح جميع المنتجات قطنية وصنع في مصر بس تقريبا اصل الشركة دي فرنساوي لأن مكتوب علي الشنطة cairo-paris مش عارف ابقي مبسوط علشان صناعة مصرية وفيه الأحترام ده ولا العرق الفرنسي اللى في المنتج هو سبب الأحترام ده.