اعمل ايه فى الليله دى ؟

**THE_HERO2005** · 02-01-2011 04:46 PM

السلام عليكم ورحمة الله وبركاته

انا لقيت بوجيه من البوجيهات عليه زيت مع العلم ان مفيش اى دخان ابيض او اسود طالع من الشكمان

يبقى كدا لازم اعمل طقم شمبر ولا ممكن اركب كرسى وخلاص ؟؟

احيانا وانا ماشى بالعربية وادوس دبرياج بسمع صوت حديد بيقع من العربية بس مش علطول ومش فى غيار معين مع العلم انى لسه مغير الفتيس ومظبط الاسطوانه والديسك بتوع الدبرياج ؟.

ياريت حضرتكو تساعدونى لان حوار الحديد الى بيقع دا خنقنى قوى

**khaled_sabry** · 02-01-2011 04:53 PM

ممكن تركب كرسى او تجيب بوجيهات سن قصير بس ده حيبقى حل مؤقت لو ماكنشى معاك فلوسها
يعنى حتعمل طقم شنبر حتعمل طقم شنبر ....

**zezmograby** · 02-01-2011 06:06 PM

اعمل طقم شنبر وريح دماغك
بس اعملو عند واحد كفائة

**bassem.naguib** · 02-01-2011 07:55 PM

المشاركة الأصلية كتبت بواسطة THE_HERO2005

السلام عليكم ورحمة الله وبركاته
وعليكم السلام ورحمة الله وبركاته
انا لقيت بوجيه من البوجيهات عليه زيت مع العلم ان مفيش اى دخان ابيض او اسود طالع من الشكمان
أنا أتوقع أن المشكلة دي ممكن تكون حصلت نتيجة القرص على دواسة البنزين والعربية باردة أثناء تشغيلها وتسخين السيارة صباحاً لأنه بيحصل زي تفويت للزيت داخل السلندر اللي راكب عليه البوجيه (وخاصة لو العربية قديمة ومش معمول ليها عمرة من فترة) .. ودي بتحصل ساعات بس مش دائماً وبتكون دليل على بداية ضعف طقم الشنبر بس مش بشكل كبير طالما مفيش دخنة من الشكمان (بيبقى ضعف في كبس سلندر معين) .
الحل المؤقت أنك تركب طقم بوجيهات جديد أو بوجيه بدل اللي عرق زيت .. وتشوف أيه النظام مع مراعاة عدم القرص على دواسة البنزين أثناء التسخين صباحاً والجو بارد .

يبقى كدا لازم اعمل طقم شمبر ولا ممكن اركب كرسى وخلاص ؟؟
لو حصل الموضوع ده تاني .. يبقى الأفضل عمل طقم شنبر .. لأنه حيكون الحل الجذري .. بس اللي بيحدد أكتر هو الماديات .
احيانا وانا ماشى بالعربية وادوس دبرياج بسمع صوت حديد بيقع من العربية بس مش علطول ومش فى غيار معين مع العلم انى لسه مغير الفتيس ومظبط الاسطوانه والديسك بتوع الدبرياج ؟.

ياريت حضرتكو تساعدونى لان حوار الحديد الى بيقع دا خنقنى قوى
شوية تزييت للفتيس .. مع ضبط قاعدة الفتيس وربطها جيداً .. كله حيبقى تمام

**zezmograby** · 02-01-2011 11:11 PM

+11111111111 بروفيسور ورئيس قسم

**MASERATI** · 03-01-2011 12:44 AM

السلام عليكم و رحمة الله و بركاته

طاب , أنا بأه أعمل ايه؟؟؟؟؟؟

أنا كمان عندى فيه بوجيه معين , هو اللى لقينا عليه زيت آخر مرة كنت بغير فيها البوجيهات بتاع العربية البيجو ال505 مو 1980 ( العمرة الوحيدة بتاعتها كانت من 1994 ).

و طبعا , الزيت بينقص بتاع نص كجم فى الغيار كل 1000كم , عشان كده, أنا بحط زيت TOTAL التقيل اللى هو لون الجركن برتقالى كده.

و لما قلت للميكانيكى , هنعمل ايه؟؟؟؟, قاللى أننا, لازم نفك المكنة و نشوف , أنا بصراحة لو ضامن أن الموضوع هيبقى بس طقم شنبر و خلاص , كنت سيبته فك المكنة و اشتغل , بس أنا خايف أنه لما يفتح المكنة , يقوللى , هات سبايك و بساتم و كلام من ده و يدخلنى فى شغلانة كبيرة و عمرة و خاصة أن العربية مابتدخنش و لا حاجة و سحبها حلو يعنى, يعنى بنقل من التانى للتالت على 60 و من التالت للرابع على 80 و طبعا أقصى سرعة لا تتعدى ال120 - 130كم بالكتير , بس العربية ماشية , على الأقل كمان سنة و لا اتنين .

**mrastra** · 03-01-2011 08:31 AM

السلام عليكم ورحمة الله
يا جماعة فى سبب تانى لتعريق الزيت على البوجيهات مش لازم يعنى موضوع طقم الشنبر اللى هو اورنجات الصبابات لو واحد فيهم تالف هاينزل زيت فى غرفة الاحتراق ويعمل تراكم على البوجيهات وخصوصا ان مشكلة حضرتك فى بستم واحد بس مش الاربعة يبقى الاحتمال الاكبر جلد صباب مش تاكل الشنابر

**bassem.naguib** · 03-01-2011 08:54 AM

المشاركة الأصلية كتبت بواسطة mrastra

السلام عليكم ورحمة الله
يا جماعة فى سبب تانى لتعريق الزيت على البوجيهات مش لازم يعنى موضوع طقم الشنبر اللى هو اورنجات الصبابات لو واحد فيهم تالف هاينزل زيت فى غرفة الاحتراق ويعمل تراكم على البوجيهات وخصوصا ان مشكلة حضرتك فى بستم واحد بس مش الاربعة يبقى الاحتمال الاكبر جلد صباب مش تاكل الشنابر

أحتمال قائم .. بس المشكلة أنك لما بتفتح الموتور بيبقى عامل زي البطيخة وأنت وبختك .. وساعتها لو حاجة حالتها نص نص حيبقى إجباري عليك تعملها بالمرة والموتور مفتوح.. فحتبقى تكاليف نص عمرة على الأقل لو مفيش شغل خراطه .