مشكلة لما تكون العربية باردة

**NiceGoodFair** · 06-01-2011 11:33 AM

السلام عليكم ورحمة الله

أنا عربيتي يا شباب بيجو 207 أوتو موديل 2009

أنا عندي مشكلة صغيرة كده في العربية يا ريت تدلوني أحلها الزاي

أنا العربية لما أدورها الصبح ، وتكون باردة يعني ، في العادة بديها فترة تسخن على الأقل 3 دقايق

المهم لما أمشي بيها ، في الأول وهي لسه باردة بيحصل حاجة بايخة

لما أحتاج أقف علشان أي سبب ، وخصوصا التوقف المفاجيء العربية بتهدا كده خالص وبتبقى كأنها عاوزة تبطل!
المهم السينسور بيحس ويقوم معلي الأر بي إم ، البايخ بقه إنها ساعات تبطل خالص!!

الكلام ده بيحصل غاليا بس لما العربية تكون لسه باردة وبيختفي لما تسخن......

يا رب أكون عرفت أشرح المشكلة لأنها صعبة في الشرح.......

ومستني مساعدتكم يا جماعة الخير

**mrwho1982** · 06-01-2011 11:36 AM

في مشكلة عندك في حساس من الحساسات انصحك ماحدش يلعب فيها روح حط العربية علي جهاز الاسكانرا

او وروح التوكيل اكشف عليها بالكمبيوتر وهو هايقوللك المشكلة فين وماتخليش حد يلعبللك فيها

**Abody1985** · 06-01-2011 03:23 PM

بص هو الحوار ده كان بيحصل معايا باللظبط بس في الاخر طلع طقم الكهربا انتهت صلاحيته

**NiceGoodFair** · 06-01-2011 04:09 PM

شكرا لنصايكم الغالية

بس طقم كهربا؟ العربية لسه ماكملتش 15000 كم؟

وبعدين بعد إذنك ، هو يعني ايه طقم كهربا بالضبط؟

**samirayad** · 06-01-2011 08:21 PM

المهم السينسور بيحس ويقوم معلي الأر بي إم ، البايخ بقه إنها ساعات تبطل خالص!!

ياريت توضح الجزئيه دى أكثر

وماهو السينسور اللى بيعلى ال rpm

وفى أى وضع لرجلك على البنزين

ولا بتكون بتفرمل ساعتها

**NiceGoodFair** · 06-01-2011 10:35 PM

شكرا يا سمير باشا على ردك

أنا رجلي بتكون ساعتها على الفرامل والعربية على وشك تقف خالص ،

اللي بيحصل بالضبط إن لما تكون العربية لسه باردة وأنا ماشي مثلا وجيت أهدي عشان مطب ، أو هأقف خالص ، وخصوصا مع الفرامل الجامدة ، العربية بتهدى خالص يقوم فجأة الأر بي إم يعلى كأني دست دوسة بسيطة على البنزين كده
وساعات تبطل خالص

يا رب تكون النقطة وضحت ، وجزاكم الله كل خير على اهتمامكم ......

**samirayad** · 06-01-2011 11:50 PM

ياريت تنظف واير البنزين من عند بكرة الأكسراتير

وتزيته بمنظف ومزيت فى نفس الوقت ( زى ال wd40 )

وتنظف بوابة المكنه برضه من الداخل وترش على جوانب قرص البوابه WD 40

بعد حل خرطوم الهواء من على زور البوابه ( بعد حل أفيز التثبيت

للخرطوم على زور البوابه )

وتجرب الوضع الجديد

قبل مانشك فى آداء حساس البوابه

**ahmedjumpo** · 07-01-2011 05:42 AM

ازيك يا باشمهندس سمير و عودة حميدة لمنتداك اللى انت منوره دايما
و بعد اذنك يا هندسة طبعا انت فاكر انى كنت بعانى من موضوع التبطيل و العربية باردة بنفس الاعراض و جربت تغيير حاجات كتير لغاية ما اكتشفت ان العيب فى الرشاشات علشان كده انا بقترح على صاحب المشكلة انه يجرب يجيب رشاشات استيراد و يشترط على اللى هيجيب منه انها على التجربة لمدة يومين مثلا لو اتحلت المشكلة خير و بركة ماتحلتش ترجعها تانى لكن اعتقد و الله اعلم الموضوع بعيد عن الحساسات لان و العربية باردة كمبيوتر العربية مابيعتمدش على الحساسات لغاية لما العربية تصل لحرارة التشغيل
و على فكرة ممكن لو ماطلعتش الرشاشات جرب تفك الايدل كنترول و تنظفه و ركبه تانى و ان كنت اعتقد ان موديل عربيتك ال 2009 صعب يكون الايدل اتوسخ بالسرعة ديه

**samirayad** · 07-01-2011 12:16 PM

الله يخليك

أستاذ : أحمد

**SAMEH_FOUAD** · 07-01-2011 02:48 PM

الاربى ام لو بينزل وخصوصا ان العربية بتكون باردة يبقى انت محتاج تنظيف لبلف الايدل + فلتر الهواء

ويتم تنظيف بلف الايدل بمنظف الانجيكشن او الكارب كلينر