مشكلة غريبة جدا أتمني من حد يقول لي سببها

**Egy** · 10-01-2011 01:58 PM

السلام عليكم أعضاء المنتدي المحترمين،

أنا عربيتي كرايسلر نيون 2000 و في يوم حسيت ان بعد لما السرعة بتعدي 80 الدركسيون ما بيبقاش مستقر بمعني اني لازم أجيب سنة يمين و سنة صغيرة شمال علشان أمشي في خط مستقيم.
قلت أروح أظبط زوايا في بنزينة وطنية الجبل الأحمر زي أي مواطن مصري عادي، و طبعا يا ريتني ما روحت.
الأول قعد يدور علي اسم العربية علي الكمبيوتر تلت ساعة، و بعد كدة قال لي "اه فعلا، فيها تعويمة بسيطة و جاري تصليحها بالكمبيوتر" (حلوة "جاري" دي) قلت له تمام يا عم.

قوم ايه، أفجأ في اليوم التاني ان ولا حاجة اتغيرت بمعني الكلمة (هي يعني عادة الصنيعي المصري ولا هنشتريها).
المهم، رحت برضه زي أي مواطن مصري عادي أقول له ان ولا حاجة اتغيرت، لأ و ان كمان الدركسيون جاي شمال شوية. طبعا أنا بضرب نفسي بالجزمة اني قلت له كدة، لأن اللي حصل كالأتي :
1- الدركسيون بقي جاي علي اليمين، و طبعا قعدت أكتر من 6 مرات أجرب العربية لحد لمل رجع لوضعيته الأولي، و كمان مش مظبوط قوي.
2- التعويمة اليسيطة لسة موجودة، ولاااااا كأنه عمل حاجة.
3- الدركسيون تقل. قلت له ان العربية باور، قاللي أكيد زيت الباور، قلت له يعني انت مالعبتش في حاجة تحت؟ قال لي "عيب يا بيه، الخ..." و كلام الصنيعية اللي انتوا عارفينوا. زودنا زيت الباور اللي متزود أصلا و طبعا لا جديد، لسة تقيل. قال لي "اه، أكيد الكاوتشات" و طبعا رحت كشفت عليهم (رغم اني مغيرهم من 5000 كم فقط) و لكن طبعا الراجل قال لي انهم زي الفل.

دلوقتي يا جماعة، أنا أعمل ايه ؟ ليه كل لما نروح نصلح في حاجة العامل المصري يطلعلك مشكلة جديدة ؟ أروح أظبط زوايا في أمريكا ولا ايه مش فاهم ؟
يا ريت أصحاب الخبرة يقولولي أعمل ايه و يشخصولي المشكلة و حسبي الله و نعم الوكيل.