كل ده فى يوم واحد؟؟؟
مصر الجديده و مدينة نصر فى ناحيه ... المهندسين و الهرم فى ناحيه تانيه ... المعادى ناحيه تالته....
بالنسبه لمصر الجديده تروح النزهه الجديده الاول ... تركب اى حاجه رايحه موقف العاشر و تنزل جسر السويس محطة الجراج و من هناك تاكسى (معرفش المكان بتاعك ده فين)
ترجع من هناك على ميدان الحجاز ... تاخد من جسر السويس اى حاجه راجعه و تنزل الف مسكن ... تعدى الشارع و تسأل على ميدان الحجاز (محطه او محطتين)
تركب من ميدان الحجاز ميكروباص لأول عباس ... عند دار الدفاع الجوى هى دى ارض الجولف (معرفش الشارع فين)
و معرفش شارع الحلوانى فى اى حته فى مصر الجديده
بعد ما تخلص ارض الجولف تركب تانى لأول عباس هتنزل ميدان الساعه و تعدى الشارع كده انت فى اول عباس العقاد
ش انور المفتى ده ورا طيبه مول ... و انت ماشى فى عباس العقاد تخش اول يمين فى اول يمين ... هتلاقى لاشارع بيلف شمال ... هو دة انور المفتى
معرفش شارع 315 فى المعادى بس من رمسيس خد المترو و انزل محطة المعادى و اطلع (من الناحيه اللى هتنزل فيها) هتلاقى ميكروباصات بتقول صقر قريش ... بتعدى على المعادى الجديده ... اسأل قبل ما تركب على الشارع
بالنسبه للمهندسين ... شارع السودان طويل و ماسك من امبابه لحد فيصل ... حضرتك حدد رايح فين علشان تركب الصح... غالبا هتركب مترو من رمسيس محطتين و تنزل الاسعاف (جمال عبد الناصر) و تركب من عند مستشفى الجلاء حاجه رايحه ميت عقبه
و معرفش فين شارع العلمين
الهرم... تركب مترو من رمسيس و تنزل محطة الجيزه و تركب من شارع الهرم اى ميكروباص بس اكد عليه انه ينزلك عند السنترال القديم ... ش رمزى فرج فى وش السنترال القديم و على ناصيته بنزينة موبيل
المفضلات