الموضوع: فتيس لانوس 1 اتوماتيك

المشاركة الأصلية كتبت بواسطة drhegab

انا اشتريت لانوس 1 اتوماتيك
بس دلوقتي عندي مشاكل في الفتيس كالتالي \
1- الغيرات بتتاخر ف الار بي ام بيعلي والعربيه صوتها يعلي وبعدين تاخد الغيار ف يحصل زي نطه كدا او نتشه (بيزيد لما العربيه تسخن)
2- العربيه صوتها بيعلي جدا بعد 80 كيلو والار بي ام بيفضل يعملي فوق ال 3 بعد سرعه 80 كيلو كدا يبقا الفتيس مش بياخد غيار جديد؟
3- العربيه اصلا صوتها عالي
دلوقتي زودتها زيت فتيس احمر كدا حطيت لتر ف العربيه الى حد ما اتحسنت شويه صغيره
انا اعمل ايه دلوقتي
اغير زيت الفتيس كله؟ ازوده؟
معيار الزيت يكون قد ايه ؟ احط كام لتر؟
فيه حاجه تانيه ممكن تتعمل مع الزيت ؟
مين متخصص اتوماتيك في طنطا لو حد يفيدني

للكشف علي المشاكل التالية
1- جربت تخف رجلك قوي علي البنزين وتشوف هتاخد غيارك عند ار بي ام كام - راجع علي سلك الرجلاش بتاع الفتيس و ارخية شوية هتلاقي النقلات بقت اسلس و اهدي علي حساب التسارع او شدة هتلاقي النقلات تتأخر وتزيد التسارع علي حساب استهلاك البنزين
2- ده عادي ما انتا عندك الفتيس 4 اربع نقلات يعني عند 80 المفروض هتاخد النقلة الرابعة اللي هي الأخيرة و هتلاقي الر بي ام بيزيد مع السرعة يعني 120 عند 3.5 و 140 عند 4 و هكذا
3- كل الدايو صوتة عالي بس هل الصوت اعلي من العربيات اختها لو اعلي شوف الشدادت و بلي الدينامو و بلي الكاتينة و بلي التكييف وطرمبة المياه كل دول بيعلو صوت العربية
4- لو الرجلاش مريحش العربية وظبط النقلات هيبقي لازم تغير تزيت الفتيس و تنظف الفلتر او تغيرة لو مسدود ودة حوالي 4 كيلو زيت اسو او موبيل و انا افضل الموبيل "ِزيت فتيسات اوتو"
مقاس الزيت يتم كالتالي
1- لازم تكون العربية سخنة مشت 18 كيلو علي الأقل
2- هتحط ذراع الفتيس علي p وتاخد المقاس و المفروض مايزيدش عن hot

حد في طنطا انا مش هعرف افيدك
انا من دمياط و الأعضاء ان شاء الله ممكن يساعدوك

شكرا يا افندم على اهتمامك جدا
بس هو الار بي ام بيكون على 3 عند 80 كيلو وبيفضل يزيد مش بياخد اي غيار تاني
والعربيه في الطلعه الاولي بتكون ضعيفه جدا
وانا عاوز اعرف ايه هو الرجلاش دا لاني فعلا لما بخف رجلي من على البنزين بتاخد غياراتها على 2.5 او ازيد شويه لو قرصت

فتيس لانوس 1 كهرباء مفيهوش واير وكمان مفيهوش مقياس احسن حل واسلم انك تروح مركز معتمد من دايو طبعا أغلى بس هتريح دماغك بعد كدة بدل ما حد بيوظ الفتيس
ملحوظة
متزوتش زبت من غير حساب انا عملت كدة و بعد كدة اولسة الفتيس باظ من ضغط الزيت الزيادة ودفعت 1200 تصليح وزيت من أول تانى

اذن الحل غسيل تام للفتيس و الفلتر و تغيير الزيت و هترتاح من هذة المشكلة ان شاء الله بالنسبة لعدم النقل في التالت ممكن تكون فية وصلة غلط في عصاية الفتيس ملمسة النقلة 3 مع d لازم تكشف علي العصاية و لو مفهاش عيب تكشف علي علبة البلوف ليكون فية بلف مسدود ومحتاج يتسلك

كل الكلام دة ميعتبرش مؤثر في الفتيس و اي حد يعملة بمعني مفيش خوف من انة اي يحد يعملة دة زي غيار الزيت المطلوب حد يكون عملة قبل كدة مرتين تلاتة مش لازم مركز وواحد محترف ما عدا تسليك علبة البلوف يفضل واحد محترف يكشف عليها عشان لو باظت و هيا مش غالية علي فكرة دي 150 جنية جديدة

شكرا ليكم كلكم
انا اللى فهمته دلوقتي اني هغسل الفتيس بس دلوقتي مش عارف هحط كام كيلو زيت دلوقتي سمعت رأيين مختلفين جدا 12 ولا 4 ؟
وكمان انا مش عارف مين يعملي الموضوع دا ميكانيكي نضيف وخلاص؟ ولا ايه انا ما اعرفشي متخصص في الموضوع دا؟
واقوله يكشفلي ازاي على عصايه الفتيس دي بالكومبيوتر؟

حتت كمية الزيت دي خلي الميكانيكي يفصلك فيها وصدقني مفيش ميكانيكي محترم بيغامر بسمعتة وبيشتغل في حاجة ميعرفهاش اكيد عندك حد مشهور و شاطر في الدايو


هشرحلك المفروض الميكانيكي يعمل اية وهذا لا يعني انك تحاول انك تعمل الكلام دة بأيدك لأني لأنصحك الموضوع محتاج ادوات و قعده محترمة تحت العربية + خبرة كويسة و لكن علي الأقل هتبقي عارف اية اللي بيحصل تحت
بص يا كبير لزيت الفتيس كارتيرة منفصلة عن كارتيرة زيت المكنة المسامير بتاعتها الانكية بعد فك الطبة و تنزيل الزيت و فك الكارتيرة هتلاقي فية بلوك حديد متركب بيجي 12 مسمار الانكية البلوك الحديد دة هو منظم النقلات وفية ميكانيكية بتسمية عقل الفتيس البلوكة عبارة عن جزئين واحد كبير وواحد صغير و الفلتر
الجزء الصغير راكب بأربع مسامير هو علبة البلوف و دة الجزء اللي بيحتج يتغير في حالة لو البلوف نشفت ومعتدش الفتيس بينقل او النقلات اتحشرت علي نقلة معينة اول فقط او تاني فقط الخ
و برضة لو واحد معلم بيسلكة ولكن
يوجد داخل هذا الجزء و الي فية قنوات صغير جدا "شبة المتاهة بتاعت العيال اللي بيلعبو بيها و لكن معليهاش قزازة "
قطع رصاص صغيرة بتتحرك في القنوات دي يرجي الحذر الشديد عشان لو ضاعت واحدة هيبوظ منظم النقلات دول بتراجع عليهم عشان اوقات قطع الرصاص دي بتتحشر وبيتلم عليها تراب او رايش في حالة لو الفلتر منتهي بعد تنظيف كلة يرجع يركب كل حاجة كما كانت و دمتم

طيب بالنسبة لعصاية الفتيس و لا حاجة الباشا هيفكلةك الفبرة و يديها وش نظافة عشان لو فية تراب حايش او مش موصل لحساس النقلة ينظف و اي فيش مش راكبة تركب
هذا و الله اعلم و انتظر باقي الأعضاء اللي عندهم خبرة اكيد هيفيدوك اكتر ان شاء الله

عندي تخمين مش أكتر
اعتقاد و ليس جزما ان الفتيس الكهرباء بيشترك مع دورة الباور في نفس الزيت و يمكن دي تفسر كمية الزيت الكتير - حد يا جماعة يأكد المعلومة دي او ينفيها لان ده اعتقادي لتفسير فرق كمية الزيت -

المشاركة الأصلية كتبت بواسطة safroot77

فتيس لانوس 1 كهرباء مفيهوش واير وكمان مفيهوش مقياس احسن حل واسلم انك تروح مركز معتمد من دايو طبعا أغلى بس هتريح دماغك بعد كدة بدل ما حد بيوظ الفتيس
ملحوظة
متزوتش زبت من غير حساب انا عملت كدة و بعد كدة اولسة الفتيس باظ من ضغط الزيت الزيادة ودفعت 1200 تصليح وزيت من أول تانى

1200 تشتري فتيس تاني وتركبة كمان يا كبير ابقي خد بالك لحسن يكون الميكانيكي بتاعك بيشتغلك