الموضوع: مشكلة فى كهرباء السيارة

قبل أى حاجة احب أقول لكل أخوانى فى المنتدى وحشتونى جدا وأعتذر عن عدم المشاركة لكن والله انا متابع كل المواضيع - وان كنت اعتقد ان مفيش حد فاكرنى من اساسه
المهم نيجى للمشكلة
العربية لانوس 1 - موديل 2000 - 130000 كيلو
بدأت المشكلة ان العربية أوقات بلاقيها بتنتش معايه وأوقات بتتخنق جدا - فى الوقت ده انا قلت ان المشكلة مشكلة بوجيهات
لكن الموضوع ده زاد فى خلال ال 10 ايام الاخيرة فقررت كالمعتاد انى انزل الملعب وأعك فى العربية
وفعلا لاقيت البوجيه رقم 1 ورقم 4 حرقهم وحش - قلت خلاص يبقى الكابلات - بس لما فكيت الكابلات من عند الموبينه لاقيت الشراره اللى خارجه من الموبينه ضعيفة جدا من الجزء العلوى اللى بيغذى البوجية 1 و 4

طبعا قلت يعوض عليه ربنا فى الموبينة اللى لسه جايبها من حوالى سنة (الاصلية والله) وقلت هاروح اجيب واحده جديدة وخلاص
كلمت أخ فاضل لينا المهندس سمير عياد لأنى كنت بسأله على طريقة تغيير الكويل واللعب فى الموبينة - لكن هو اقترح انى اشترى واحده مستعملة ارخص واحسن واسهل

تبدأ المشكلة الحقيقية من أول هنا
روحت جبت موبينة استيراد اصلية وجربتها - نفس العطل بالظبط - جربت واحده تانية نفس العطل بالظبط - .............. واحدة رابعه ونفس العطل بالظبط
قلت يبقى الموضوع بسيط فيه فارده واقعة فى الفيشة الخاصة بالموبينه
عشت فى دور الكهربائى وقست الاطراف بتاعت الفيشه (اللى مايعرفش الفيشة مكونه من اربع اطراف - الاتنين اللى فوق سيجنال - واللى تحت واحد كهرباء وواحد ارضى) القراءات بتاعت الاشارة فى الاثنين واحدة والكهرباء مظبوطة على الشعرة

طيب فين المشكلة ----- مش عارف - جربت ازق الكابلات لجوة ونظفتها بمزيل صدأ وبرضو فشل
هل ممكن يكون فيه سنسور بيقرأ غلط - هل ممكن يكون ال ecu بتاع العربية بيخرف - مع العلم ان الخارج بتاع الجزء السفلى من الموبينة شغاااااال زى الفل

المشكلة انى فعلا عندى كمية مشاوير مفزعه وكلها خلال ال 3 أيام اللى جايه وكلها مستحيل تتعمل من غير عربية
ربنا يستر أقدر أظبطها النهاردة أو بكره بالكتييييييييييييييير
أرجو من اخوانى لو فى حد عنده أى معلومة ياريت يشاركنا بيها

مصرى وأفتخر