العربية بتستهلك فى التفويلة 200 كيلو!!!!!

**beshomilan** · 15-03-2011 01:28 PM

ازيكم يااخواتى..بعانى من مشكلة جامده اوى
العربية اكسيل 1500
التفويلة الكاملة بتعمل 200 كيلو ويمكن اقل بس علما ان تانك البنزين 45 لتر..يعنى 4.5 كيلو فى اللتر..
-وبحط بنزين 80 ولما بفول بصفر عداد الرحلات وبحسب التفويله بتقعد قد ايه منه وبلاقى طلعلى الرقم ده..
-علما انى ساعات بعلم بيها صحابى وقرابى السواقى فطبعا موضوع فصل العربية واعاده تشغيلها كتير ده عادى...
-وكمان معنديش مشكلة تسرب بنزين وببص تحت العربية مبلاقيش اى اثر لتسرب البنزين او فيه ريحة بنزين من اى مكان فالعربية واستعملت التكييف على اول درجة بما يوازى ساعة او فحدود 25 كيلو..
-وعلما كمان ان رجلية تقيلة عالبنزين..طبعا كل ده جوه البلد مش على طرق مفتوحة واقصى سرعة ليا 80 وغيار اول وتانى فمعظم الوقت..
-البوجيهات جديده مكملتش 1000 كيلوngk
-العربية مش بعمل فيه اوزان يعنى بكون لوحدى وقليل اوى لو والدى ووالدتى والعربية من غير جنوط يعنى مش تقيلة
-ضغط الاطار ظبطته على 30

مفيش عندى اى مشكلة ظاهرة والعربية متاشية كويس

وممكن تكون المشكلة فحاجة من دول مثلا؟؟

-استعمال بنزين 80 ورجلية التقيلة عالبنزين بس ال rpm مش بعدى بيه 3 فى الغيار
-تعليم السواقة بيها وانها تفصل وتنطر كتير
-عداد الرحلات ده بايظ وبيخرف ومش ده الاستهلاك الحقيقى للعربية
-الكربراتير بس خايف افكه ميرجعش زى الاول
-فلتر الهوا فتحت شوفته كان حالته سيئة بس مغيرتوش

مش عارف فى حاجة غير كده ولا لا؟؟؟..محتاج مساعدتكم بجد ونصايحكم اوى

**tiger451** · 15-03-2011 02:19 PM

انا لاحظت ان العربيه بتستهلك بنزين زياده لما بتكون مع مراتي عشان هيا متعلمه جديد
ممكن هيا دي تكون المشكله

**ahmed_h_g** · 15-03-2011 02:40 PM

عربيتك كربراتير يبقى تغير البكات وتظبط الكربراتير

**ahmed_h_g** · 15-03-2011 11:37 PM

المشاركة الأصلية كتبت بواسطة beshomilan

طب والبكات دى تتكلف كام؟؟؟؟
والكربراتير ممكن انضفه فمكانه بمنظف الكربراتير؟؟ ولا لازم افكه وانضفه (وده انا خايف منه)
طب وياترى فى اسباب تانى لمشكلتى دى عشان اعملها بالمرة؟؟

معرفش التكلفه كام بصراحه وياريت تروح لمركز محترم تظبط عنده الكربراتير وياريت تغير فلتر البنزين

**Sherifmt** · 16-03-2011 12:12 PM

غير فلتر هواء ونضف الكربراتير بالا سبراي وظبط ضغط الكاوتش واتأكد بعد مشوار ان مفيش تحميل علي فرامل اليد بأنك تتحسس الكاوتش الخلفي لو فيه سخونيه زياده واخير اتاكد ان مفيش شروخ او تسييل من في دورة البنزين.....تحياتي