جين2 زيرو ولا سيفيك 2007

**bero0o0o0** · 19-03-2011 06:06 PM

ماحدش يتخض انا عارف كويس الفرق بين الاسمين
الفكرة كلها ان انا عايز اشوف ايه الانسب لشاب زيي
مع العلم باني مش بحاول اشتري دلوقتي انا لسا قدامي شوية
بس العربيتين دول هما اكتر عربيتين داخلين دماغي في حدود ال 100 الف
و كنت عايز بس اعرف رايكم ايه؟؟
انا طبعا بحب الشد و الجري حطوا دي في الحسبان و كمان كل يوم بمشي حوالي 30 - 40 كيلو على الطريق يعني عايز عربية سفر مش مدينة
اللي انا متاكد منه ان السيفيك تكسب في التقفيل و الخامات بجدارة
لكن في الباقي كله ارجو ان حضراتكم تفيدوني بمقارنة شاملة

**hema1989** · 19-03-2011 07:48 PM

ما انت قلت اهوة السيفيك تكسب في التقفيل والخامات بجدارة ... وفي كل حاجة يا راجل

بس انت بتقول استعمال .. لو حالتها تمااااااااااااام توكل على الله واشتريها

**Dawns_Mist** · 20-03-2011 05:28 AM

يعني أنا بحب الجين ، و مش عايز أظلمها في المقارنة دي لإنك بتقارنها بفئة تانية و مش بأي حد في الفئة الأعلى ده انت بتقارنها بالوحش ....
لكن عموما .. علشان خاطرك بس أنا هقارن بينهم ... و ربنا يستر و ماكرهش الجين بعد المقارنه دي بقى ...

جينا :
عربية زيرو ( و خلي بالك دي تقريبا الحاجة الوحيدة اللي بقولها كميزة في الجين عن السيفيك و أنا متأكد منها ) هاهاها ..
قطع غيار أرخص داخل التوكيل بالرغم من عدم انتشار التوكيل لكنه ليس بالتوكيل السيء.
سحبها كويس بصراحه
عفشتها مالتي لينك لكنه ديبيندينت يعني عفشه متطورة نسبيا لكنها مش ناعمة أوي بس بتعيش
عالية عن الأرض
شكلها شبابي
أوبشنز ممتازة
فرامل قوية
ثباتها جيد جدا.
دهانها مش بنفس المستوى على فكره بيقع بسهولة

السيفيك :
سحب راااااااااائع
عفشه متطورة جدا مالتي لينك مستقل بتدي أمان أكتر و كمان ناعمه و مريحه أوي
فرامل على أعلى مستوى من التقنية
ثبات مذهل على أي سرعة تتخيلها
أوبشنز ممتازة و تابلوه حلو أوي و شكلها كمان شيك
و صاج و دهان تمام التمام
لكنها عربية مستعملة فات على موديلها 4 سنين و كمان الشكل هيتغير من السنة الجاية.
قطع غيارها غالية بالنسبة للجين كمان خصوصا داخل التوكيل .
صيانتها بتحتاج محترفين مش سهل تعملها صيانة في أي مكان ( ولو إنها مش بتعطل أصلا .. والله عمري ما شوفتها لحد النهارده في أي مركز صيانه أبدا ) .
واطيه و حوضها واسع بالتالي هتسمع أحلى مزيكا على المطبات خصوصا و انت في جمهورية مصر العربية.

-------------------------------------------------------------
لو عايز رونق و حلاوة و إحساس الزيرو ، و كمان بتحب تلعب في شكل العربية و تحبها شبابية أوي و بتسوق وسط البلد بسرعة و عايز عربية تخبط فيها و ماتقولش لأ .. خليك في الجين.

لو عايز أناقة و عربية تحترمها علشان هي كمان تحترمك ، و فيها موتور مابيتعبش أبدا ، و راحه و أمان فوق الوصف بس تحافظ عليها أوي ... يبقى أكيد السيفيك بس دور على حالة حلوة في الاستعمال.

**bero0o0o0** · 20-03-2011 02:41 PM

استاذ Dawns_Mist شكرا جزيلا
انا زي ماذكرت في البداية مش بشتري دلوقتي بس قريب ان شاء الله
و شكرا جدا على المقارنة الرائعة و بصراحة السيفيك لو لقيتلها اي حل يعليها شوية مش هاتردد
بس خايف اعليها ابوظ الثبات
بس يمكن المشكلة دي تتحل في الشكل الجديد 2012

**Dawns_Mist** · 20-03-2011 04:38 PM

لا أنا مش من مؤيدي اللعب في ارتفاع العربيات .. لو هتجيب السيفيك خليها زي ماهي ... مش مهم تتعبك شوية على المطبات بس انت تحافظ عليها كويس و خلاص ...
و ربنا يوفقك يا باشا في اختيارك أيا كان .