الحمد لله استلمت سيارتي الحمراء فول أوبشنز 2011

**lion98** · 10-04-2011 12:52 AM

[CENTER] السلام عليكم ورحمة الله وبركاته [/CENTER]أخواتي الأعزاء أجمل و أصدق أعضاء في منتدانا مع كامل احترامي للكل . الحمد و الشكر لله أستلمت سيارتي اللي كنت منتظرها على أحر من الجمر . لوجان فول أوبشنز 2011 حمراء اللون و اليوم قمت بترخيصها من مرور المنيا بلدنا و اصطحبت أسرتي الصغيرة في رحلة صغيرة لقريتي على بعد 22 كيلو متر شمال مدينة المنيا و بصراحة مش لاقي كلام أعبر بيه عن شكري و تقديري لحضراتكم جميعا و خايف أحدد حد و انسى حد ليزعل مني . بصراحة كانت مشورتكم في محلها تماما على مدى 3 شهور استمتعت فيها بمتابعة آراء و مشاركات و حتى مشاكل حضراتكم و كان ده كله ليه الأثر الأكبر في قراري بإن لوجان و غيرها ما فيش . و بصراحة بعد الاستلام و التجربة تأكدت فعلا من صدق وجهة نظركم . و سلامة اختياركم . بأمانة العربة رائعة جدا و تكاد تخلو من العيوب الجوهرية و تستاهل كل اللي يدفع فيها .هدوء...(مع إقراري بعلو صوتها على الغيار الأول و الثاني) ثبات ممتاز و عفشة رائعة . دبرياج مش ممكن في نعومته و روعته . فيتيس سلس جدا و ما فيهوش عضة ولا حاجة . باور ممتاز و متماسك لا هو خفيف قوي (يودي في داهية) ولا ثقيل (متعب) .انطباعي إنها عربية عائلية و عملية ماسكة نفسها كدة و محترمة و فعلا كلاسيكية . و ده بالمناسبة راي اسرتي فيها برضه. حاجة كدة بتفكرني بإعلان سبرايت (نضحك شوية) ...راجل مش مان و جربت أقرص بيها شوية جابت ال100 مرتاحة بدون أي زيادة في ال RPM عن 3 . عموما أنا مش بتاع قرص و جري وسواقتي هادية و بإذن الله هاديها راحتها تماما في التليين علشان أضمن سلامة و طول عمر موتورها بقدر المستطاع . الشيئ الجميل و الكوميدي في نفس الوقت هو شعور الزهو (مش غرور و الله كفانا الله شره) و انت ماشي كدة و جنبك حد من حبايبنا بتوع العربيات التانية و انت بتبص له من فوق وانت عالي كدة و متظبط...بجد شعور مش وحش . كل اللي ضايقني علشان زي ما احنا عارفين الحلو ما بيكملش : هو موضوع الاحساس بالموتور في دواسة البنزين ...بس ملحوقة و مسيري ها تعود عليها . عموما كل الشكر لحضراتكم على ترشيحكم لوجي . و ربنا يبارك لكم جميعا في عربياتكم و يكفيكم شر الطريق و عفاريته من تكتوك و مبكروباص و دبابات ...إلخ

**gebreel** · 10-04-2011 01:01 AM

الف مبروك يا باشا ربنا يباركلك فيها يا رب و يديلك خيرها و يكفيك شرها

**gebreel** · 10-04-2011 09:38 AM

المشاركة الأصلية كتبت بواسطة lion98

ألف مليون شكر على شعورك الطيب و بصراحة حضرتك و مشاركات حضرتك من أكثر الناس اللي طمنوني من ناحية العربية و دفعوني لقرار الشراء و بإذن الله أخوك الصغير يستفيد من خبرات حضرتك الكبيرة في لوجي

يا باشا ربنا يكرمك كلنا اخوات هنا و كل اخوات حضرتك تحت امرك في اي حاجة انت عاوزها

**kar!m** · 10-04-2011 11:01 AM

الف مبروك .. ربنا يبارك لك فيها و يحفظهالك.

**haytham1542** · 10-04-2011 11:59 AM

الف مبروك و يحفظك و يرزقك خيرها و يكفيك شرها
وموضوع الزنة اللي فى دواسة البنزين هاتختفى بعد حوالي 500 كم و مش هاتلاقيها تانى الا بسيطة اوى فى السرهات العالية بعد 130كم/س

**lion98** · 10-04-2011 03:37 PM

المشاركة الأصلية كتبت بواسطة gebreel

يا باشا ربنا يكرمك كلنا اخوات هنا و كل اخوات حضرتك تحت امرك في اي حاجة انت عاوزها

المشاركة الأصلية كتبت بواسطة tamer61

ألف مبروك وربنا يباركلك فيها و يحفظهالك من كل شر و إن شاء الله تستمتع بيها و عموما إحنا تحت أمرك في اي إستفسار و لو إنك المفروض خلاص حفظت كل شيء من ال 3 شهور إللي كنت متابع فيهم.

المشاركة الأصلية كتبت بواسطة kareemz

الف مبروك .. ربنا يبارك لك فيها و يحفظهالك.

المشاركة الأصلية كتبت بواسطة haytham1542

الف مبروك و يحفظك و يرزقك خيرها و يكفيك شرها
وموضوع الزنة اللي فى دواسة البنزين هاتختفى بعد حوالي 500 كم و مش هاتلاقيها تانى الا بسيطة اوى فى السرهات العالية بعد 130كم/س

ربنا يكرمك جميعا و يبارك فيكم و يحفظكم من كل شر و يبارك لكم في سياراتكم . بحق نعم الإخوة و الأصدقاء و ما انكرش قد إيه استفدت من كل رد و مشاركة و موضوع و الحمد لله تبادل الخبرات ده هو اللي هايفيد الكل و يخلي لسيارتنا العزيزة قيمة و شأن وسط الجميع بإذن الله .خالص شكري و تقديري للجميع