الموضوع: تمبرا 90 فى وارطه

المشكلة اللي حصلت معاك الأول غالباً المروحة علقت ولم تدور وبالتالي العربية سخنت

أهم حاجة تعرف سبب تعليقها الأولاني وتصلحه عشان ميحصلش تاني

عموماً الحرارة لغاية نص الأمبير متقلقش خالص
ومجرد ما تعدي النص المروحة تشتغل تنزل الحرارة

أخي العزيز

لو عايز تعرف موضوع وش السلندر ده لازم تمشي بالخطوات التالية

1- والعربية شغالة فترة معقولة تشوف ضغط خرطوم المية بين الطرمبة والرادياتير او أي خرطوم تخين في دورة التبريد
لو لقيت الضغط عالي جدا تعرف إن ده ممكن يكون وش سلندر لأن السلندر بيسحب نقط مية وبيطلع ضغط في دورة التبريد

2- طيب لو لقيت الضغط منخفض جدا فده يعني إن دورة التبريد منفسه في مكان ما وده بيخلي الحرارة ما تعلاش حتى لو وش السلدنر بيسرب مية وكده مش هيبان معاك وش السلندر بينفس ولا لا غير لما تاخد الخطوات التالية

تخلي واحد بتاع رادياتير يشوف التنفيس منين ويصلحه ولو دورة التبريد نفست تاني من أي مكان فده معناه ان وش السلندر بيضغط جامدة لغاية ما حتة ضعيفة في دورة التبريد بتنهار وتنفس

وكمان ممكن تعرف من إنك تعاين مستوى المية في القربة والعربية سخنة بسيط - يعني بعد ما تسخن العربية تفتح غطا القربة وتشوف مستوي المية بعد ما تكون الطرمبة بدأت فتح دورة التبريد - لن الطرمبة مش بتفتح غير بعد وصول الحرارة لمستوى معين يمكن مثلا درجة الستين مءوية
وبعد يوم ولا اتنين وفي نفس الظروف ترجع تشوف مستوى المية نزل ولا لأ
لو نزل فده معناه إنه غما فيه تسريب مياه في دورة التبريد أو إن وش السلندر بيسحب من المية وطبعا مفيش ضغط في خرطوم المياه لن فيه تنفيس حصل زي ما قلت لحضرتك سابقا

3- لو لقيت ضغط الخرطوم عادي - يعني لا هو مهوي ولا هو ضغط عالي جدا فده مؤشر كويس إن دورة التبريد مغلقة كويس وفي نفس الوقت وش السلندر ما فيش فيه تسريب - يعني وش السلندر مش بيشرب مية ويدي ضغط هوا
ولو عايز تتأكد اكتر شغل العربية عادي ولف بيها براحتك
والصبح بدري والعربية باردة خالص تروح حضرتك فاتح غطا قربة المية وحاطط ودنك قريب منها وانت بتفتحه
ولو لقيت صوت تنفيس هوا زي صوت كاوتش عربية بيفضي هوا - وهو بيكون صوت بسيييييط جدا مش قوي يعني وممكن تلاحظه عن بعد - في الحالة دي يقى وش السلندر بيسرب بس على بسيط لأنه ادى ضغط هواء في دورة التبريد - لأن دورة التبريد لما حرارة المية بتزيد فضغطها بيزيد شوية بس مش لدرجة الإنفجار ولما العربية تبرد يرجع ضغطها للطبيعي من غير ما يتبقى ضغط هواء جواها

وأنصحك لو لقيت وش السلنر بيشرب مية - لا قدر الله - بس بكمية قليلة - يعني كل كام يوم تلاقي مستوى المية نزل شوية
ففيه حل كويس في الحالة دي
وهو غنك تقوم بتنفسك بعدم قفل غطاء القربة للآخر - يعني تعمل مجال لخروج ضغط الهواء اللي جاي من وش السلندر - وبكده تضمن إن دورة التبريد مش هتتخرم غصبن عنها من كتر ضغط هواء وش السلندر
وهتلاقي درجة حرارة العربية تمام
لكن وش السلندر هيبقى بيشرب جزء من مية التبريد كل كام يوم وممكن تتعايش مع المشكلة دي من غير ما تفك ولا تلعب في الموتور
وطالما غطا قربة المية مهوي ودورة التبريد فيها مية فالموتور لو سخن جامد فالمية هتوصل لدرجة الغليان وهيتبخر جزء منها من خلال غطاء القربة المنفس وهيبرد الموتور ومش هتوصل للدرجة اللي تلاقي فيها الموتور وقف معاك او اتبهدل منك

لكن المهم ساعتها كل يوم الصبح تشوف مستوى المية قبل ما تمشي بالسيارة

وانصحك بعدم إضافة مية للرادياتير او القربة عموما والعربية سخنه لأنه ممكن تجيب وش سلندر علطول وتلاقيه مش بيسرب مية
لا ساعتها هتلاقيه بيشرب المية شرب ولازم يتفك

يا رب اكون قدرت اوضحلك المعلومة
ولك تحياتي