الموضوع: مقابلة اسعدتني

السلام عليكم ورحمة الله وبركاته
امبارح اتصلت بالمهندس ايهاب منصور احد اعضاء هذا المنتدي الجميل والي بيعتبر من اكثر الناس احتراما وفعالية في منتدي سيات بردوده الجميلة المفيدة في شتي موضوعات القسم
انا كنت استنتجت من خلال احد مشاركاته هو ساكن فين
وبالفعل طلع ظني في محله
كنت امبارح في مشوار جمب بيته واتصلت عليه وطلبت مقابلته
بصراحة الباشمهندس رحب جدا ومكنش عنده اي مانع ودة كان شرف كبير ليا اني اقابل حد زي المهندس ايهاب
اتقابلنا والباشمهندس اتفرج علي عربيتي وقالي طبعا ملاحظات في غاية الاهمية وركبنا وروحنا البيت عنده واتفرجت علي عربيته (ماشاء الله عليها الله اكبر) ربنا يحفظهاله ويحسن سوقها ويبارك للي هاياخدها لأنه عارضها للبيع
عملنا شوية مقارنات بين عربيتي (ابيزا 1999 1000 سي سي) وعربيه الباشمهندس ايهاب (ابيزا 1998 1000 سي سي)
انا عربيتي كاملة وفيها بعض الاختلافات البسيطة جدا بينها وبين ال98 ودي كانت مفاجأة لينا احنا الاتنين
فرش الابواب
فرش الكراسي
عاكس الشنطة
نور الشنطة الداخلي
نور درج التابلوه
تنجيد عصا الفتيس وفرامل اليد
مساند رأس الكنبة
السنتر ومفاتيح العربية (عندي المفاتيح مشفرة وفيها ريموت السنتر فبريكة) وايضا ال98 مفتاح مشفر
عنده صوت الزنان الي بينبهك ان نور التابلوه مفتوح والمفتاح في الكونتاكت
عندي في تايمر لنور الصالون بيقفل النور بعد حوالي 5 ثواني بعد لما بتقفل الباب
اعتقد دي كانت كل الفروقات وكلها بسيطة لكن المهندس ايهاب ماشاء الله عليه هو الي خد باله منها
بعد كدة المهندس ايهاب وصلني واتفقنا بأذن الله يكون في مقابلات تاني بعد كدة انشاء الله
بصراحة كنت سعيد بمعرفته والمقابلة كانت مثمرة جدا وشكرا يا باشمهندس ايهاب علي المعلومات القيمة جدا الي عرفتهالي وكرمك الزائد في عرض المعلومة

اتمني من باقي الاعضاء لو نحاول نعمل مقابلة زي كدة في مكان عام وكلنا نستفاد من بعض وتبقي المقارنات لايف عشان الفايدة تعم اكتر
وشكرا لنايل موتورز الي عرفنا بناس ماشاء الله عليهم كلهم ناس محترمين وزي الفل

والله المستعان