Lifan 320

**sezdd** · 15-05-2011 05:17 PM

السلام عليكم ورحمه الله وبركاته
تحيه طيبه
طبعا انا بسال عن Lifan 320 شبيه المينى كوبر انا قريت الموضوع الشامل عنها بس بردوا مطلعتش بنتيجه انا قريت مشاكل وخناقات كتير بين الاعضاء وبين احد مندوبى الشركه بس الفكرة انا شوفت العربيه وجربتها فى الtest drive واحترت اكتر العربيه حلوة وطبعا علشان جديدة زيرو مفيهاش اى عيوب انا جربت سرعه ل140 سحبها قوى والتكيف كويس مش بيهمد العربيه مفيش مشكله فى الغيارات ولا فى الفتيس طبعا انا بقول علشان جديدة بعد معرفه مشكله احد الاعضاء فى الفتيس
بجد محتار قوى حد يفيدنى بس ارجوكم من غير خناق انا جربت العربيه ومشيت لانى خفت بعد لما افتكرت كل الكلام اللى قريته بجد ارجوا المساعدة ضرورى وراى فنى صحيح مرة ثانيه ارجوكم من غير مشادة بين حد احنا بنساعد بعض والاختلاف فى الرائ لا يفسد للود قضيه
شكرا ليكم

**sezdd** · 17-05-2011 05:14 PM

معقول ياجماعه يومين مفيش رد واحد حتى

**badrbadr** · 31-05-2011 09:25 PM

المشاركة الأصلية كتبت بواسطة sezdd

معقول ياجماعه يومين مفيش رد واحد حتى

السلام عليكم
طبعا لن تلقى رد لان الكثير لايمتلك هذه السيارة بسبب حملت التشهير فى جميع موديلات الليفان وعندما قمت بالدفاع عن الليفان قوبيلت بهجوم شرس وكل هذا ياسيدى بسبب شخص اشترى ليفان اول ما نزلت السوق ولم تكن من السعودى وواجه مشكلة فى الفتيس حيث وقع منه ولا اعلم كيف حدث هذا لاكن الاهم هو اننى اذا قلت لك عن تجربتى مع الليفان لن تصدق كلامى وغير ذلك اننى سوف اهاجم من قبل الاخوة فى المنتدى كأن هناك ثأر بينهم وبين الليفان لاكن اقول لك ان هناك موديل انا واثق من جودته بحكم التجربة ولا علم لى بباقى الموديلات

**mody100** · 31-05-2011 11:35 PM

على فكرة العربية مع ولدى و عامل بيها 9000 كيلو و الحمد الله لم يظهر فيها مشاكل غير ان الكلكس باظ و راح التوكيل و اتغير غير كده مافيهاش اى حاجة لو عايز تعرف اى حاجة انا تحت امرك

**Chery_fulwin** · 01-06-2011 01:34 AM

ابعد عن ليفان نصيحة اخوية عشان توكيل وبلاش تدبس

**THEBOMBO** · 06-06-2011 10:22 AM

العربية معايا من مارس 2010 وعاملة لحد دلوقتي 25000 كيلو
العربية ماشاء الله محترمة جدا .. والصيانة الدورية أسعارها كويسة في التوكيل
والتوكيل عامة كويس بس عليه بعض التحفظات في التعامل

وللمعلومة العربية اتخبطت في الباب والرفرف الأمامي يمين
عجلة عربية لوري وانا علي الطريق دخلت فيهم كان بيحاول يعديني
من ناحية اليمين المتخلف عقليا والنتيجة ان العجل بتاعة رشق في الباب والرفرف

والحمد لله اكتشفت ان صاجها محترم واستحمل خبطة كبيرة زي دي

وعلي فكرة انا لاشغال في التوكيل ولا ليا مصلحة

انا أصلا والدي مهندس سيارات وانا ركبت عربيات كتير
وغاوي شغل وتصليح في العربيات

نصيحة مني سيبك من الكلام اللي مش مظبوط وبيتقال عن العربية
العربية بقالها معايا سنة وشهرين والحمد لله زي الفل وقطع غيارها كمان رخيصة

الباب ب 500
الفانوس بتاعها عدسات زي البي ام ب 350
المراية كهربا ب 300
فلتر الزيت ب 15
طقم البوجيهات الاصلي ب80
لوح زجاج الباب ب 60

ده مثال لبعض قطع الغيار

هي دلوقتي اسمع انها زادت 2000 جنيه وبقت موديل 2011 ب 57 الف

توكل علي الله واشتريها عن ثقة وان شاء الله هاتكون خير عليك

**مواطن مصرى** · 06-06-2011 10:58 AM

نصيحه اخويه : لو هتشترى عربيه صينى لمجرد انها شكل تقليد لعربيه مينى كوبر فانصحك بلاش انت مش كل يوم بتلاقى خمسين الف جنيه ترميهم على الارض

انا رحت شفت العربيات الليفان دى و ركبتها و لفيت حواليها و فتحت كبوتها كمان فى معرض بيع لهم فى وسط البلد قريب من التحرير (جنب مول البستان لو تعرفه) و من الواضح جدا ان خامات العربيه الداخليه و قطع الغيار البلاستيكيه المستخدمه فيها مصنعه من اردأ انواع البلاستيك الصينى اللى تعتبر فوانيس رمضان بالنسبه لها نعمه (و هذا ما يفسر رخص ثمنها)

ثانى حاجه و هى الاهم : توكيل ليفان (سعودى جروب) من اسوأ التوكيلات الموجوده فى مصر و يعتبر ابوالفتوح و منصور و غبور بالنسبه لهم رحمه و اسال اى حد من ملاك شيرى الشكل القديم عن مدى سوء هذا التوكيل و هتعرف
سياسه سعودى جروب انهم بيستوردوا ستوك عربيات (مثلا الف عربيه من ماركه x ) و يبيعوها و يخلوا عندهم شويه قطع غيار و اكسسورات خارجيه (لزوم النصب على الزبون) و بعدين تيجى تسأل متلاقيش اى حد فى التوكيل عارف حاجه عن العربيه دى لو حصلت فيها اى مشكله جامده فى الميكانيكا او العفشه او المحرك ده غير ان اى مشكله تقابلك تعتبر سوء استخدام + الضمان اللى بيديه لمده سنه واحده فقط لا غير و بعدها كل سنه و انت طيب كله بعد كده بفلوس

**Chery_fulwin** · 08-06-2011 01:15 AM

المشاركة الأصلية كتبت بواسطة مواطن مصرى

ثانى حاجه و هى الاهم : توكيل ليفان (سعودى جروب) من اسوأ التوكيلات الموجوده فى مصر و يعتبر ابوالفتوح و منصور و غبور بالنسبه لهم رحمه و اسال اى حد من ملاك شيرى الشكل القديم عن مدى سوء هذا التوكيل و هتعرف
سياسه سعودى جروب انهم بيستوردوا ستوك عربيات (مثلا الف عربيه من ماركه x ) و يبيعوها و يخلوا عندهم شويه قطع غيار و اكسسورات خارجيه (لزوم النصب على الزبون) و بعدين تيجى تسأل متلاقيش اى حد فى التوكيل عارف حاجه عن العربيه دى لو حصلت فيها اى مشكله جامده فى الميكانيكا او العفشه او المحرك ده غير ان اى مشكله تقابلك تعتبر سوء استخدام + الضمان اللى بيديه لمده سنه واحده فقط لا غير و بعدها كل سنه و انت طيب كله بعد كده بفلوس

+10000000000000