انذار

**dizel** · 13-06-2011 12:36 AM

أنصحكم بالنذار عشان ميحصلش فيكم اللى حصل معايا
النهاردة نزلت لقيت شباك السواق مكسور و العربية متقشطة. رغم ان
1)راكن تحت البيت
2)العربية متغطية

عموما حبيت اعمل فلحوص و اتصلت بالتوكيل اول حاجة قالوهالى احمد ربنا ان العربية لسة معاك بغض النظر عن كلامهم بس قالولى ان الازاز تمنه 600 جنيه و الكاسيت 2500
طبعا اتحرق دمى اكتر عموما رحت صلحت الازاز فى الحرفيين ب 160 جنيه و استعوضت ربنا على الكاسيت و الحاجة اللى فى العربية اللى تخصنى و تخص شغلى.
عموما انا بكرة نازل اركب انذار و انصحكم جميعا بيه و اللى فهمته من حضراتكم ان الكهربة حتطلع من الضمان. عموما امان العربية اهم و هاتكل على الله و اركبه بكرة
يا ترى
1) وولف كويس؟
2) تفتكروا هو ده الحل؟؟

**smsm91158** · 13-06-2011 02:14 AM

معلش قدر الله ما شاء فعل

فعلا الحمد لله انها جت على قد كدة

بس مفتاح العربية مشفر ويمكن دا الى مطمن الواحد شوية يعنى متنفعش تدور الا بمفتاحها الاصلى حتى لو عملت اخوه

عموما برضه الانذار احسن علشان تبقى مطمن

عوضك على الله فى الكاسيت والازاز بس ازاى تمن الكاسيت فى التوكيل 2500ج

**amrezzat82** · 13-06-2011 11:17 AM

قدر الله و ما شاء فعل
عشان كده فضلت أحارب فى التوكيل عشان يركبوا الإنذار
على العموم الأفضل سباي 2 واي
من عند سبير أو أدريان أو حد من التوفيقية
و ميزتها أنه بينبهك قوى لو بعيد عن العربية فى مباني حوالي 100 متر و بيلديك فيبراشن فى المفتاح كمان
يعنى مش لازم تكون سامعها عشان تعرف ان حد قربلها
ربنا يعوض عليك

**ABOHAZEM_NEW** · 13-06-2011 01:59 PM

أنا مركب إنذار وولف وفى صيانه 5000 محدش قال لى حاجه

**smsm91158** · 13-06-2011 04:04 PM

انت متاكد من الفيبريشن الى فى المفتاح دى ؟؟
طيب بكام الانذار ده (سباى 2 واى) وركبته بكام ؟؟؟؟
وحد قالك حاجة على ضمان العربية فى التوكيل ؟؟

متشكر جدا

**dizel** · 14-06-2011 02:10 AM

حبيت اقول لحضراتكم اخر المستجدات:
ركبت انذار وولف فى التوكيل و ربنا يستر من الضمان.
ركبلى حاجة مهمة جدا, لو عرفت تدخل العربية باى شكل و حبيت تدور الماتور مش ممكن يدور معاك, كمان ممكن لو معايا الريموت و العربية دايرة اطفى الماتور من بره العربية. قالى كمان انى لو داخل مكان قلق و حد نزلنى من العربية ادوس على زرار و العربية بعد 45 ثانية هاتفصل و الماتور مش هايقوم تانى غير بعد ما اعملها انا ريست.
الانذار عجبنى ركبت الريموت مع المفتاح التانى اللى من غير ريموت, و كدا اخف الضغط عليه.
بس نصيحة للى ينزل يركب يطلب السارينة الكبيرة عشان الصغيرة اللى بتيجى مع الانذار صوتها ضعيف شوية.
رنها يسترها علينا و على حضراتكوا

**ashesh** · 14-06-2011 09:49 AM

مبروك على الانذار وربنا يسترها ان شاء الله
انت جبت الاننذار دة من التوكيل ولامن برة وركبتة فى التوكيل ولافين وبعدين أنت جربت الكلام دة بنفسك ولا دة كلام البياع

**MOUSTAFA_SAAD** · 14-06-2011 10:13 AM

مبروك على الانذار وحلوه جدا الامكانيات اللى مركبينهالك

وبالنسبه للكاسيت اشترى كاسيت بيونير بفلاشه وسى دى ام بى ثرى بحوالى 600 جنيه بس وريح دماغك خالص
ابعد عن التوكيل فى الحاجات دية نهائى

**hysagm** · 14-06-2011 11:48 AM

مبرك بس مقلتش حضرتك جبته بكام وتركيبه كام وتوكيل فرع ايه وعملت وحدات رفع ولا لاءه ايه ده انا سالت كتير قوى بس معلش استحملنى هههههه

**dizel** · 14-06-2011 12:49 PM

اولا حبيت اشكر ا/مصطفى على النصيحة بس منين اقدر اجيبوا.
اما بالنسبة لاسئلة الباقية
جبت جهاز انذار مع مانع المارش من توكيل وولف فى جسر السويس و برده هما اللى ركبوه و بيديك ضمان 5 سنين بيسموه ضمان تام
السعر 195 جنيه بس انا طلبت سرينة كبيرة فذاد 10 جنيه.
بصراحة معملتش وحدات رفع لانى سمعت من الزملا انها بتعمل مشاكل بس هاضغط على نفسي و اقفل الازاز :)
عموما حبيت اقولكم كمان على ان الامكانيات اللى قلت عليها جربتها بنفسى و مش كلام بياعين و مازلت جاهز لاى استفسار و لو حابين تجربوا بنفسكم انا ساكن فى هليوبوليس مصر الجديدة . شرفونى بس :)
حاجة اخيرة لسه حالا جاى من التوكيل عشان كنت بعمل صيانة ال 20000 ,سيبتلهم العربية و هاستلمها الساعة 5 ,محدش اتكلم على الانذار تماما و كان بيرن كل شوية و احنا بنتكلم, ولا حتى تعليق صغير على الانذار.
اتمنى تركبوه و جاهز لاى استفسارات.
بالأذن :)