مساعدة بخصوص مرسيدس عيون لأخيكم من قسم الدايو

**propagaanda** · 13-06-2011 07:57 PM

سلامو عليكم يا وحوش المرسيدس
انا عندي طلب
الحقيقة كنت عايز اشتري مرسيدس ... و معروض عليا مرسيدس عيون ذهبي E200 موديل 97 ألمانية الصنع Elegance
الحقيقة العربية فابريقة و كاملة من كله.... اوتوماتيك بخاخات فتحة سقف كراسي كهرباء 10 ايرباج و ثلاجة كونصول وغيره كتير المهم
العربية معروضة عليا على 168000 جنيه قابلة للمهاودة
انا عايز اعرف ايه اخبار السعر المعروض ده...خصوصا اني سمعت ان الألمانية الصنع بتاعة مشاكل علشان مش صناعة مصرية لأن الصناعة المصرية حسب المواصفات المصرية(مع اني مش مصدق بس انتو هتفيدوني صح ولا لأ ؟ )
ازاي المصري احسن من الألماني
كمان سؤال ايه المهم اللي اطمن عليه اثناء الكشف عليها عشان ماتدبسش ... برجاء الاجابة بأسرع وقت و شكرا
Dr.Ahmed Belal

**kamalwally** · 14-06-2011 03:44 PM

[

انا عايز اعرف ايه اخبار السعر المعروض ده...خصوصا اني سمعت ان الألمانية الصنع بتاعة مشاكل علشان مش صناعة مصرية لأن الصناعة المصرية حسب المواصفات المصرية(مع اني مش مصدق بس انتو هتفيدوني صح ولا لأ ؟ )
ازاي المصري احسن من الألماني]

بص يا باشا من امتي الصناعه المصريه بتتفوق علي الالماني ده مسمار الماني ولا موتور مصري الي قالك الكلام ده اكيد بيشتغلك
الاماني الماني
العربيه الاماني يعني تقفيل كويس اصلي يعني تركب وتنسي الدنيا كمان الالمان بيهتمو اوي باساسات العربيه وراحه الركاب
مش المصري عك وليس كلو كويس
مع العلم ان المواصفات الاوروبيه من اعلي المواصفات من حيث الباور بتاعت الموتور والامااااان
[كمان سؤال ايه المهم اللي اطمن عليه اثناء الكشف عليها عشان ماتدبسش ... برجاء الاجابة بأسرع وقت و شكرا
]
اهم حاجه تتاكد ان الموتور سليم مفهوش حاجه وان العربيه لما تركبها تحس انك راكب طياره من ناحيه الراحه (طبعا غير قوه العربيه نفسها)
جرب كل حاجه فيها تكييف ازاز كهرباء وفتحه سقف و جرب تشد بيها و كيك دون والموتور ميكونش عليه زيت
و لما تجيب الر بي ام علي الاخر لحد لما الموتور يفصل معاك متجبش دخنه من الشكمان خالص و بص علي حاله العربيه عموما صاحبها مهتم بيها ولا بيركب وخلاص

اما بالنسبه للسعر فاعتقد انو مناسب جدا لو حاله العربيه فعلا كويسه
وربنا يكرمك وتجيب حاجه نضيفه

**propagaanda** · 14-06-2011 04:39 PM

أكرمك الله بجد على الرد الرائع ده .... بجد ألف شكر
العربية فعلا صاحبها زي مايكون شاريها يركنها,,,كل حاجة فيها كما انزلت
و اللي فتلى عليا الفتوى دي كان تاجر تاني عايز يستنفع مني و ان شاء الله في الكشف النهائي هعمل الحاجات دي و ربنا يكرم باذن الله

**lambo100** · 14-06-2011 04:54 PM

155k is ok

**propagaanda** · 14-06-2011 05:34 PM

المشاركة الأصلية كتبت بواسطة lambo100

155k is ok

معلش مش فاهم .... !

**Batman372** · 14-06-2011 06:57 PM

المشاركة الأصلية كتبت بواسطة propagaanda

معلش مش فاهم .... !

هو يقصد انها تخلص على 155 الف جم .

**propagaanda** · 14-06-2011 07:54 PM

المشاركة الأصلية كتبت بواسطة batman372

هو يقصد انها تخلص على 155 الف جم .

+1

هحاول ان شاء الله ....

**MASERATI** · 14-06-2011 11:07 PM

السلام عليكم و رحمة الله و بركاته

العربية لو بالحالة اللى أنت بتتكلم عليها فعلا, يبقى حاول أنك تقتنصها لأن مش كتير أنك تلاقى عربية بتجرى فة شوارع مصر بقالها 14 سنة و لا زالت بحالتها و لو صاحبها مسك فى ال165000 جنيه و مارضاش ينزل حاجة, خلص معاه, لأن ال10000 مش فلوس فى عربية عيون.

أن من كام شهر كنت بدور على واحدة و لقيتها مع واحد زميل والدى -الله يرحمه- و كنت بفاضل بينها و بين الأوكتافيا الa5 الزيرو و الأخوة الأفاضل هنا فضلوا العيون لأن حالتها كانت رائعة, بس الظروف اتغيرت و لا اشتريت لا العيون و لا الأوكتافيا.

**ehab98** · 15-06-2011 01:05 AM

انا شايف ان السعر مناسب لو العربية بامواصفات دي

بس انت ما قولتش عددها كام؟

وربنا يوفقك و الف مبروك مقدما

بس علي فكرة حلة اوي الفتوة بتاعت العربيات الالماني بتاعت مشاكل والمصري مناسبة للمواصفات المصري

بجد مقدرتش امسك نفسي من الضحك .. جامدة جدا