الموضوع: تغطيه وصول سيارات روي الصينيه الي الكويت لكن تحت اسم mg

السلام عليكم جميعا
فوجئت الاسبوع اللي فات بعربيه غريبه ماشيه جنبي في الشارع و للاسف ظروف الطريق مسمحتش اني امشي قريب منه و اشوف نوع العربيه بالظبط
لكن بعدها قريت في الجرايد وصول عربيات MG الي الكويت و كوني عارف ان روفر و ال MG توقف انتاجهم عرفت ان اللي نزلت دي هي النسخ الصينيه منها
و فعلا مكدبتش خبر و رحنا شفناهم و عرفنا انها عربيات روي الصينيه لكن باسم MG تجنبا للدخول في جدل العربيات الصيني و اعتماديتها
بصراحه كنا رايحين و متوقعين نشوف عربيه صيني بجوده تقفيل و خامات سيئه لكن لما اتفرجنا علي العربيات اتفاجئنا لان العربية فاقت كل توقعاتنا

اول عربيه هي ال 350 و هي اصغر عربيه
و بتتوفر بمحرك 1500 سي سي 107 حصان
العربيه فيها شبه كبير من الاكسنت و التقفيل و الخامات كويسه و الاحسن من ده كله المواصفات زي ال 2 ايرباج و ال ABS و ال EBD
اسيبكم مع الصور









العربيتين التانيين هما ال 550 و ال 6
و الاتنين نفس العربيه تقريبا لكن مع اختلاف الشكل و المواصفات لل 6
و العربيتين بييجوا بمتور 1800 سي سي تيربو 160 حصان
و المواصفات بقي لا حصر لها من الجلد و ال GPS و انظمه الامان
و برضه نفس جوده التقفيل و الخامات
و دي صورهم
دي ال 550









و دي ال 6











و كان فيه طبعا ال 750 اللي هي الروفر 75 سابقا و هي اكبرهم لكن مصورتهاش

طبعا زي ما وضحت العربيات كانت اكتر مما توقعنا
و اللي عجبني اكتر ان مندوب المبيعات مانكرش ان العربيات متجمعه في الصين و قالنا ان علي الرغم من كده لكن العربيه تحت مراقبه الانجليز و ان الصينين طلعوا اذكي منهم و عدلوا العربيه بحيث تلائم الاجواء الخليجيه من ناحيه الحراره و السرعه الشيئ اللي لم ينجح فيه الانجليز و ده من اسباب انهم منزلوش العربيه باسم روفر لان الروفر ال 75 كان عيوبها كتير و اكتسبت سمعه وحشه هنا

في النهايه اتمني التقرير يعجبكم
و اتمني العربيات دي تجد طريقها للسوق المصريه بدل العربيات الصينيه الاقل جوده المتوفره حاليا

المشاركة الأصلية كتبت بواسطة samoevil911

بس الأسعار دي في الكويت بالنسبة لمنتج صيني لسه جديد عليهم
مش تنافسية

المشاركة الأصلية كتبت بواسطة medododo

سعر غالي جدا علي سوق الكويت
بمعني الواحد يشتري حاجة مشهورة ومتجربة بالفلوس دي
علي العموم مجهود رائع
بالمناسبة معرضهم فين بالظبط يا غالي

بالظبط كده
هما مش جايبين سيره انها صيني اصلا
بس اكمن الواحد غاوي عربيات ففهمنا الحوار
هما بيسوقوها علي انها تكنولوجيا انجليزي و زي ما تقول الاسعار معموله عشان تحبك الفلم
و معرضهم في الشارع الموازي لكندا دراي قدام ابيات كده