الموضوع: تجربتى مع تغيير المساعدين

المشاركة الأصلية كتبت بواسطة emam

السلام عليكم ورحمة الله وبركاته

اخر مرة كنت روحت التوكيل قالولى ان المساعدين الامامية نشفة شوية ويفضل تغيرها ان امكن وبصراحة كنت مكبر دماغى لحد مقررت اغيرهم وروحت للاسطى عادل الى فى المعادى وريتله العربية قالى هات بتوع الجولف 2 وبالاخص البرازيلى والخلفيين برده قولتله ان العربية لو ركب فيها 2 من وراء بتريح وبتحلك فى المطبات قالى هات بتوع السيات توليدو ارخص من بتوع التوكيل

سالت فى التوكيل عرفت ان الجوز الامامى عامل 740 جنيه تقريبا والخلفى عامل 540 جنيه - بصراحة الاسعار حسيت انها غالية ونزلت التوفيقية اشتريت الامامى من عند فتح الباب فى شارع رمسس ب 600 جنيه البرازيلى والالمانى على فكرة كانو عملين 500 جنيه والاسبانى 480 جنيه وجبت الجوز الخلفى ب 300 جنيه بس الاصليين بتوعها من عند ابو عوف فى التوفيقية بردوا وحددت ميعاد وروحت ركبتهم تقريبا فى 3 ساعات بس وعليت العربية من وراء تقريبا سم واحد بس بتغيير الكاوتشة الى على المساعد بواحدة اكبر شوية ثمنها 20 جنيه ومرديتش ازود عن كدة عشان الاتزان وبالمرة رجلشت على الفرامل الخلفية عشان فرامل اليد كانت بتاخد المشوار كله عشان تقف - وتم شراء الاسبراى الخاص بتنظيف الانجكشن ب 25 جنيه - المصنيعة 150كانت + اكرامية 25 بس

بصراحة ارخص واحسن من التوكيل مليون مرة وعن اقل شايف عربيتك بيتعمل فيها اية وبتابع بنفسك

موضوع تنظيف حساس الانجكشن هو نضفلى الحساس الكبير الواصل بخرطوم فلتر التكييف بس ومرديش يقرب من الحساس الثانى الصغير وقالى انه بيبرجل العربية لما بيتفك (مش عارف رأى البشمهندس احمد ايه ) فى الموضوع دة بس نزل سواد كتير اوى والعربية اعدت 30 ثانية عبال مدارت - والاستهلاك حاسس انه زاد شوية مش متأكد بصراحة

حبيت احكى الموضوع دة بالتفصيل عشان الزملاء الى معاهم العريية لو حبو يستفادو من التجربة .

اولا نشكر حضرتك يا استاذ امام على نقل تجربتك لنستفيد كلنا منها
ثانيا مبروك ماعملت وان شاء الله يكون خير وتحس بتحسن فى العربية
ثالثا الحساس اللى مارديش يحله الميكانيكى مش بيبرجل العربية ولكن بياخد وقت على ما يظبط نفسه تانى ربما يومان ولكن لازم يتنظف ده حساس الاكسجين للماكينة
رابعا العربية غابت ف الدوارة علشان ماعملتش ايديال ليرن تفتح الكونتاكت لمدة خمس او سبع ثوانى لحد ما لمبات التبلوه تطفى وتقفله وتكرر هذه العملية اربع مرات وتدور ح تدور على طول ان شاء الله(لازم تفهم الكمبيوتر انك فكيت الفيش وركبتها)