الموضوع: لكل اللى عندة لانسر عيون صفيه ادخل وشارك

المشاركة الأصلية كتبت بواسطة رجل المستحيل

أنا معايا لانسر عيون صفية 1991 خليجي لسه شاريها من 3 شهور .. عربية ممتاااااااااااااااااازة .. اللي عايز حاجة فيها سواء ادارية أو فنية يسألني وهجاوب على قد علمي ومعرفتي وخبرتي

انا كمان من كفر الشيخ وقدامي عربية عيون صفية كويسة لكن في ناس كتير بيقولوا مالهاش قطع غيار في كفرالشيخ او تكاد تكون نادرة
وعلشان كدا متردد اجيب العربية
ايه رأيك؟؟؟

المشاركة الأصلية كتبت بواسطة egy_mad

انا كمان من كفر الشيخ وقدامي عربية عيون صفية كويسة لكن في ناس كتير بيقولوا مالهاش قطع غيار في كفرالشيخ او تكاد تكون نادرة
وعلشان كدا متردد اجيب العربية
ايه رأيك؟؟؟

السلام عليكم ورحمة الله وبركاته:

طبعا أكيد ممكن أتابع معاك

أولا قبل كل شيء .. أحب أقول ان قطع غيار عيون صفية موجودة في أي مكان في مصر بلا استثناء .. وهشرح بالتفصيل ليه وازاي

لما تسأل حد عن عربية تسأل اللي معاه العربية وبيعملها صيانة ؟؟ وللا تسأل اللي معاه عربية تانية أو ممعهوش عربية وعمال يفتي ويكرر أي كلام بيسمعه وخلاص ؟؟

أنا معايا العربية من سبتمبر 2015 لحد النهاردة .. وأنا ساكن في بلطيم اللي هيا أحد مراكز كفر الشيخ

الميزة الرئيسية في عيون صفية وأحسن حاجة فيها ان جميع قطع غيارها بالكامل بلا أدنى استثناء هي نفسها قطع غيار عربية تانية معروفة ومنتشرة في جميع أنحاء مصر كسيارة اقتصادية وممتازة فنيا, وقطع غيارها رخيصة بالمقارنة مع العربيات التانية . العربية دي هي هيونداي اكسيل.ليه وازاي برضه ؟؟ لأن الاكسيل هي التقليد الكوري للانسر عيون صفية, تقليد بمعنى كلمة تقليد ولكنه ليه شكل قانوني, لأن الهيونداي اشترت التكنولوجيا من ميتسوبيشي بشكل رسمي. وأكيد محدش بيقلد حاجة فاشلة, اللي بيقلد بيقلد حاجات ناجحة أكيد.

وأنا لما بشتري قطع غيار بقوله العربية اكسيل (لأن فيه تجار قطع غيار جهلة ومش عارفين المعلومة دي .. وطبعا فيه اللي عارف) .. وحصلت معايا كذا مرة ان تاجر قطع غيار قاللي معنديش قطع غيار للعربية دي لما شافها قدام المحل .. فأنا قولتله أنا عايز بتاعة اكسيل وملكش دعوة, ف راح جابهالي وركبت عادي جدا .. يعني هو كان هيخسر نفسه عملية بيع ناجحة بسبب جهله

وجميع قطع غيار الاكسيل بتركب فيها بدون أي تعديل نهائيا سواء في قطعة الغيار أو في العربية لأن الاكسيل هي نفسها عيون صفية, ولكن الاكسيل منتشرة جدا هيا وقطع غيارها في طول مصر وعرضها بما في ذلك الأرياف زي بلطيم ومراكز كفر الشيخ, فما بالك بكفر الشيخ نفسها ؟؟!!

فلما تشتري أي حاجة سواء (ميكانيكا – كهربا – عفشة –موتور وفتيس) قوله الاكسيل, متقولش عيون صفية عشان ممكن يمشيك وهيا عنده جوه .. أي حاجة فيما سبق بلا استثناء .. الاختلاف الوحيد في الصاج والازاز والفوانيس والتابلوه فقط لا غير .. لأن دي حاجات الشكل الخارجي والداخلي طبعا, ودي مش هتغيرها كل شوية طبعا, مش هتغير مثلا تابلوه أو باب كل سنة !!! وموجودين برضه .. أقل أينعم .. لكن موجودين في حتت كتير

ولعلمك أنا كنت اشتريت وش فانوس قدماني من المنطقة الصناعية في كفر الشيخ ب 30 جنيه من محل ايهاب القصاص .. واشتريت ازاز قدماني وركبته من 10 أيام من بلطيم نفسها !!

مش الاكسيل بس اللي تركب عليها:
الميكانيكا والكهربا بتاعة عيون صفية ولانسر بطة واحد مع اختلاف عفشة البطة طبعا عن عيون صفية.
والمعلومة اللي انا عرفتها عمليا بالتجربة وغريبة ومحدش يعرفها أو حتى ممكن يصدقها ان حوالي 50% من عفشة من عفشة الكريستالة هي نفسها عفشة عيون صفية (زي الكبالن الداخلية مثلا) .. ولكن الكريستالة تختلف اختلاف كبير ولكنه غير كلي في الميكانيكا والكهربا والموتور والفتيس عن عيون صفية والبطة.

وأنا آسف في الكلمة: الناس اللي قالتلك استفزوني بكلامهم جدا والدم على في عروقي لأن انا عندي حساسية جامدة ضد الجهل والاستغباء

الميزة الرئيسية في عيون صفية اللي انا اشترتها عشانها هي انتشار ورخص قطع الغيار وسهولة وسرعة ورخص الصيانة

وانا غيرت فيها قطع غيار كتيرة ميكانيكا وكهربا وعفشة وقطع غيار موتور اشترتها كلها بالكامل من بلطيم فقط من سبتمبر 2015 لحد النهاردة ما عدا وش الفانوس اشتريته من كفر الشيخ المنطقة الصناعية

وهيا عربية ممتازة وناعمة وقوية جدا في الشاسيه وشكلها رياضي حاد وشرس وبتجري جامد واعادة البيع سريعة جدا وممتازة لأنها مطلوبة ومبتخسرش فيها , بل ممكن تكسب فيها , وقطع غيارها معمرة .. والعربية نفسها مبتحرقش قطع الغيار بسرعة زي عربيات تانية, والكربراتير بستم الحديث أبو سوستة مش بوابات والاسبراتير الكتروني مش عادة.. اشتريها وتوكل على الله, بس أهم حاجة في أي عربية طبعا أيا كانت هي الحالة, ويستحسن متقلش عن موديل 1990 ... أنا قعدت 3 شهور أتصل بالناس عشان أشتريها .. وكل ما أتصل صاحبها يقوللي اتباعت .. يعني ممكن تتباع في يومين


وأي حاجة انت عايزها قوللي ميهمكش حاجة .. انا متابع معاك يوميا

الى الأعضاء اللي سألو أسئلة هنا وانا مجاوبتش عليها ومحدش غيري جاوب عليها:

أنا هرد على كل الاستفسارات عن خبرة وتجربة وبكل أمانة بكره ان شاء الله عشان انا مشغول جدا دلوقتي .. انتظروني ..............

وانا كمان لسه شاريها امبارح والعربية عجبانى واهم ميزه فيها ان لاقيت تعليقات الناس على قطع غيارها انها رخيصه زى الفيات ومتوفرة لان بيركب لها حاجات كتير من الاكسل وما اداراك ما الاكسل وانتشارها وده اللى خلنا مطمن وانا مشتريها بس انا محتاج شويه حاجات فى العربية يا ريت تدلونى عليها انا محتاج لاكصدام ومرايه و وش فانوس خلفى وراديو يا ريت لو حد عنده خبرى يدلنى على ماكانها واسعارها ومتجمعين فى الخير ان شاء الله

المشاركة الأصلية كتبت بواسطة eng_magdy_mine

وانا كمان لسه شاريها امبارح والعربية عجبانى واهم ميزه فيها ان لاقيت تعليقات الناس على قطع غيارها انها رخيصه زى الفيات ومتوفرة لان بيركب لها حاجات كتير من الاكسل وما اداراك ما الاكسل وانتشارها وده اللى خلنا مطمن وانا مشتريها بس انا محتاج شويه حاجات فى العربية يا ريت تدلونى عليها انا محتاج لاكصدام ومرايه و وش فانوس خلفى وراديو يا ريت لو حد عنده خبرى يدلنى على ماكانها واسعارها ومتجمعين فى الخير ان شاء الله

لو سمحت انت شاريها بكام وهل العربية مناسبة للستات

هل العربية مناسبة للستات؟

المشاركة الأصلية كتبت بواسطة mahmoudelaraby

هل العربية مناسبة للستات؟

ايوه العربيه مناسبه للستات لان انا شوفت اكتر من واحده راكبه العربيه دى

بصراحه علشان ابقى امين معاك العربية اللى اشترتها كانت حالتها تعبانه شويه وانا كنت عارف الميكانيكى اللى معايا قالى انها عايزه شغل بس علشان ده تانى عربية اركبها بعد العربية اللادا 2105 وما ادراك ما اللادا وكانت مانويل والانسر اوتوماتيك علشان كده حاسس بفرق رهييب وحاسس انى راكب عربية لعبة لانى مش بعمل حاجه فطالما اللى هتركب واحده ست تبقى تكون اوتوماتيك بلاش مانويل على الرغم من ان الاوتوماتيك مشاكل اكتر من المانويل بس ده فى كل العربيات القديم منها والجديد