نداء الى كل مالكى السيينا

**cruiss** · 29-06-2011 11:12 PM

كل واحد يكتب اسم وعنوان وتليفون الميكانيكى والكهربائى اللى بيتعامل معاه بشرط يكون بيفهم كويس اوى فى السيينا ويكون عنده خبرة كويسة بأعطالها الشائعة عشان الفتايين مافيش اكتر منهم ومش طالبة خالص التوكيلات النصابين اللى بيدفعوك دم قلبك وتشترى قطع الغيار بأضعاف سعرها بره وفى الاخر تكتشف ان العيب اللى انت جاى عشانه اساسا ماتعالجش....

بجد الموضوع ده مهم ياريت كل واحد يكتب اسم وعنوان وتليفون الحد اللى بيتعامل معاه عشان كل واحد يشوف اقرب حد ليه و يتعامل معاه... وياريت لو تحكيلنا تجربتك الناجحة معاه

**Mostafa** · 30-06-2011 01:04 AM

موضوع جميل يا باشا ربنا يجازيك عليه خير ...

شوف بقى ... أخوك قدييييييييييييييييم أوى فى السيينا

كان معايا واحده موديل 2003 1400 زيرو ... فضلت معايا لحد 185000 ألف كيلو

حبيت أغير ... جبت واحده تانيه سيينا 2001 1600 .. قعدت معايا شهرين و بعتها ...

حبيت اغير بقى عشان زهقت من السيينا ... قومت جبت ايه بقى ..... سيينا 2002 1600 HLX plus ... كانت عامله 49 ألف .... دلوقتى 141 ألف ...... و هيا لسه معايا حاليا ياخوفى لاغير تانى و اجيب سيينا :) ربنا يستر

بس دى بقى غاليه عندى قوى مش ناوى ابيعها ابدا ... عاوز أقولك انى بشتغل حاليا فى الأردن ... و جبتها معايا هنا ... العربيه هنا مبهره للشعب الأردنى .. لأن عاوز اقولك مفيش غيرها فى الأردن كلها ... بتبقى ماشيه زى الوحش الكاسر فى الأردن وسط البورش و الجاجوار و الأنفينتى و عليها نمر ملاكى القاهره ... اصحابى فى الشغل بيقولولى انى كده بسوأ صوره مصر فى الخارج :)

أنا كنت بتعامل زمان مع التوكيل ... و بعدين بقيت بتعامل مع مركز روكسان اللى جنب المطار - و عنوانه بنزينه التعاون اللى جنب المطار ... و تليفونهم 0127842442 .. م عادل

مش هكون ببالغ لو قلتلك انى عدت عليا كل مشاكل السيينا المعروفه و غير المعروفه :) والحمد لله اتحلت كلها هناك ... هما صنايعيه جدا و فاهمين كل حاجه فى العربيه ... بس انا بشترى قطع الغيار من الكيلانى اللى فى شارع شامبليون و اروحله بيها ... لأنه بيغلى حبتين فى قطع الغيار اللى عنده

بس شغلهم ممتاز جدا و مرتاح جدا معاهم بصراحه .

يمكن احسن مره اشتغلولى فى العربيه .. لما كنت جاى بيها الأردن - ودتها قلتلهم العربيه هتسافر سفر جامد قوى .. ومش هيكون هناك فى اى حد يعرف يصلح فيها حاجه (لا وجود لشئ اسمه فيات فى الأردن)

ا/عادل مدير المركز مكانش مصدق انى هسافر بيها بره مصر ... بس خلى الناس هناك تشيك على العربيه مسابوش فيها فتفوته مشيكوش عليها ... و عملت كل الصيانات و تانى يوم توكلت على الله و سافرت بيها ..

**newcastle** · 30-06-2011 03:54 AM

مركز روكسان ممتازين فعلا وبيفهموا كويس اوي في السيينا

**DONYO** · 30-06-2011 10:34 AM

الموضوع فعلا مهم جدا جدا وارجو من السادة كل مالكي السيينا المشاركة في هذا الموضوع .
بالنسبة لي انا اعرف كهربائي متخصص في السيينا اسمة م / مصطفى ودة في شارع المطبعة - فيصل وتليفونة 0102966835 - 0149277410 .
ولو فيه حد يعرف ميكانيكي حرفي -و أمين من غير اشتغالات - ياريت يقول عنوانة وتليفونة .

**homsa_pop** · 30-06-2011 01:35 PM

مركز روكسان يمتاز بوجود جهاز كشف اعطال اسيينا لديه
ولكن قطع غيار غالية
وساعات كده بيفتوا من غير مايكشف علي العربية كويس
مرة كان عايزني اغير البوابة والمشكلة كانت في سلك البنزين
انا برضه نفسي في ميكانيكي يكون فاهم عشان اتعامل معاه

**cruiss** · 30-06-2011 02:21 PM

مركز روكسان على عينى وراسى بس برده رجعنا لمشكلة المهندسين اللى لو كشفوا بيكشفوا بطرف ايديهم ومن غير مايسمع مشكلتك بيبدأ يسمع الكورسات اللى خدها ومش دايما الجهاز بيقول كل المشاكل اللى عندك لان الجهاز بيكشف الاعطال المرتبطة بالحساسات عموما بس...

الموضوع اوقات بيبقى عايز واحد صايع وذكى وياخد وقته جدا فى تجارب لحد ما يوصل للعيب وده مش موجود فى التوكيلات ومراكز الصيانه لأن ماعندهمش وقت طبعا ده غير التناكة ع العربية وصاحبها وغير الفلوس اللى بتتدفع وغير العطله والتفرغ التام ليهم،

واللى انا متأكد منه ان فى ميكانيكية وكهربائيه اصحاب ورش كتير اوى بيفهموا فى السيينا بس احنا مانعرفهمش فا احنا عايزين نقرب المسافات لبعض وكل واحد يقول اللى عنده...

ياجماعة العربية دى لما بتتظبط بتبقى وهمية ولا تقولى اى عربية جديدة سواء عفشة قوية ولا صاج متين ولا سرعة ولا سحب ولا استقرار ونعومة ولا شكل انسيابى ولا شنطة عملاقة ولا تكييف تلاجة ولا ولا.........

وشكرا طبعا لاهتمامكوا يا سيناوية وربنا يجمعنا دايما على خير

**samirsaid1** · 30-06-2011 02:41 PM

بمناسبة ان حضراتكو من مالكى السيما

ممكن اعرف فلتر التكيف فين مكانة وبيتنظف إزاى

وطريقة فكة لانى حاولت اشوفه تحت الدرج معرفتش أوصلة

وشكرا ليكم

**cruiss** · 17-07-2011 06:52 PM

شكرا لكل اللى ردوا على الموضوع بس كنت فاكر ان اصحاب السيينا اكتر من كدا... ايه يا جماعة فينكوا عايزين معلومات اكتر عشان كل الناس تستفيد
ياريت كل حد عنده معلومة عن اى ميكانيكى او كهربائى متخصص فى العربية دى يقولنا

**bobbozo4b** · 18-07-2011 12:52 PM

السلام عليكم ورحمة الله وبركاته
الموضوع جميل
بس موضوع التخصص ده صعب شويه على الصنايعية لانها عربيه صعبه شويه عليهم
المهم انك تلاقى واحد تثق فيه ويكون محل ثقه على فكرة (انا من دار السلام)
بالنسبه ليا انا لما العربيه يكون فيها برجله او حاجة مش عارف هى ايه او الكمبيوتر
بروح اعمل كشف فى مركز الاقصى بزهراء المعادى بـ70 و10% يبقى 77 جنيه
واخد الكشف واسال الميكانيكى على الحاجة واروح اشتريها من الكيلانى وارجع للميكانيكى
وكان فى واحد زميل هنا شار عليا بموضوع ان فى واحد جنب الكيلانى وهو بيفهم فيها اسمه عم محمد
وانا تحت امرك