عايز احدد مدى استهلاك اللانوس 1 للبنزين ؟؟؟

**vip6** · 30-06-2011 03:28 AM

عربيتى لانوس 1 موديل 2000 وكنت عايز احدد مدى استهلاكها للبنزين

وبمونها بنزين 90 وفيشة الاوكتان متظبطه على الـــ 90

ولقله خبرتى انا عملت حاجه ياريت اخوانى الاعضاء والمشرفين يقيموا اذا كانت صح ولا غلط ولو غلط ازاى اصححها

وهو انى كنت فى البنزينه وكان مؤشر البنزين قبل ما تشطب بنزين بحاجه بسيطه وقولت للراجل الى فى البنزينه فولها

وحط 41.5 لتر بالضبط وقالى كده فولت

واخدت قراءة العداد ولكن فيه قرائتين القراءة الى فوق كانت 131470 والقراءة الى تحتها كانت 6731

ولما البنزين خلاص على وشك التشطيب وانا فى البنزينه وقبل ما امونها تانى اخدت برضوا القراءتين وكانت القراءة الى فوق 131787 والقراءة الى تحت 9900

هنا بقا الى انا عملته ده صح ولا خطأ

واحسبها هنا ازاى ؟؟ يعنى الى فهمته ان شوفت الفرق ما بين القراءتين لقيتهم 317 فى التفويله

طيب هل هنا استهلاك العربية للبنزين كويس ولا بتستهلك بنزين ؟؟؟

علما بأن السواقة كلها اغلبها كانت جوه البلد

وفيه سؤال كمان

انا سمعت من واحد سواق تاكسى قال ان حسب رجل السواق على الدواسات هى الى بتحدد اذا كان هيوفر بنزين او يزود استهلاكها !!!!! هل الكلام ده صح ولا غلط وياريت شرح لهذا الكلام فى حاله انه صح ؟؟؟؟

مده الامتحان ساعتان هههههههههههههههههههه

جزاكم الله خيرا

**jojowork1** · 30-06-2011 03:45 AM

اللي عملته مش غلط اوي ومش صح اوي اولا ما تسبش العربيه لما تفضي بنزين حفاظا علي الطلمبه ولعدم دخول الشوائب دوره البنزين
ثنيا الاستهالك جوه البلد كده مش وحش خاصه لو مشغل تكيف
ثالثا عاوز تحسب صح روح فول العربيه وقول الراجل بتاع البنزينه املها للزور عشان هاحسبلها استهلاك وياريت يكون حد انت مظبطه قبل كده بتسبله بقشيش كويس هايملهاك للاخر ويستني ثواني ويملي تاني وهكذا لغايه ما العربيه خلاص مش قابله بنزين تاني وبعدين تصفر عداد الرحلات اللي تحت بانك هاتدوس علي الدراع اللي خارج منه وتطلع تعمل مشوار علي طريق سريع وتكون ماشي في حدود ال90 وبعدين ادخل البنزينه تاني وعند نفس الراجل وقوله فوله شوفها ها تاخد كام في مشوار واحد عشان تعرف تحكم صح يعني مثلا لو مشيت 20 كيلوا ها تقسم اللي ها تخده علي ال20 كيلوا يفضل انك تعمل من 50 ل 100 كيلوا عشان تعرف تطلع متوسط كويس لحساب الاستهلاك
هذا ما استطيع ان اقوله

**عصام غنايم** · 30-06-2011 05:23 AM

طريقة حساب استهلاك البنزين بتنقسم الى جزئين

1 داخل البلد

هتروح البنزينه وتمون لحد البزين ما يظهر قدامك فى زور العربيه ( يعنى مش من اول او تانى تكه )

هتصفر العداد الصغير

تمشى بالعربيه المشى العادى بتاعك لحد قبل الأحتياطى

تروح البنزينه وتمون تانى لحد الزور وتشوف خدت كام لتر ( فرضاٌ 40 لتر )

هتشوف القرايه اللى موجوده فى العداد الصغير ( فرضاٌ 400 كيلو )

هتقسم ال 400 على ال 40 يطلع الناتج 10 ( نفهم من كده ان لتر البنزين بيمشى العربيه 10 كيلو )

نضرب ال 10 دول فى 20 اللى هيه صفيحة البنزين

يطلع الناتج 200 ( نفهم من كده ان صفيحة البنزين بتعمل فى العربيه 200 كيلو )

كده تبقى حسبت استهلاك العربيه داخل البلد

الجزء التانى لحساب الأستهلاك هو

2 ( طريق سفر )

نفس الخطوات بس بعد ما نمون العربيه ونصفر العداد هنسافر بالعربيه بدون تكييف وبدون قرص واقصى سرعه للمشى تبقى 100 كيلو على الخامس

وبعدين نرجع ونمون تانى ونحسب الأستهلاك

وبكده تبقى حسبت داخل البلد وخارج البلد

وبالتوفيق

**MMamdouh** · 30-06-2011 12:38 PM

المشاركة الأصلية كتبت بواسطة vip6

عربيتى لانوس 1 موديل 2000 وكنت عايز احدد مدى استهلاكها للبنزين

وبمونها بنزين 90 وفيشة الاوكتان متظبطه على الـــ 90

ولقله خبرتى انا عملت حاجه ياريت اخوانى الاعضاء والمشرفين يقيموا اذا كانت صح ولا غلط ولو غلط ازاى اصححها

وهو انى كنت فى البنزينه وكان مؤشر البنزين قبل ما تشطب بنزين بحاجه بسيطه وقولت للراجل الى فى البنزينه فولها

وحط 41.5 لتر بالضبط وقالى كده فولت

واخدت قراءة العداد ولكن فيه قرائتين القراءة الى فوق كانت 131470 والقراءة الى تحتها كانت 6731

ولما البنزين خلاص على وشك التشطيب وانا فى البنزينه وقبل ما امونها تانى اخدت برضوا القراءتين وكانت القراءة الى فوق 131787 والقراءة الى تحت 9900

هنا بقا الى انا عملته ده صح ولا خطأ

واحسبها هنا ازاى ؟؟ يعنى الى فهمته ان شوفت الفرق ما بين القراءتين لقيتهم 317 فى التفويله

طيب هل هنا استهلاك العربية للبنزين كويس ولا بتستهلك بنزين ؟؟؟

علما بأن السواقة كلها اغلبها كانت جوه البلد

وفيه سؤال كمان

انا سمعت من واحد سواق تاكسى قال ان حسب رجل السواق على الدواسات هى الى بتحدد اذا كان هيوفر بنزين او يزود استهلاكها !!!!! هل الكلام ده صح ولا غلط وياريت شرح لهذا الكلام فى حاله انه صح ؟؟؟؟

مده الامتحان ساعتان هههههههههههههههههههه

جزاكم الله خيرا

اولا متفرقش تاخد قراية العداد اللى فوق ولا اللى تحت لان انت بتحسب على فرق قراية العداد فى التفويلتين... حتلاحظ ان فرق القراية فى حالتك هو 317 كيلو

ثانيا المهم فى الموضوع هى العربية اخدت كام لتر فى التفويلة التانية.. التفويلة الاولى لا تعنى اى شىء

ثالثا الاتقييم الحقيقى لاستهلاك الوقود لازم يبقى على طريق سريع لان جوة البلد فيه عوامل كتير جدا بتاثر على معدل الاستهلاك غير حالة العربية بالتالى دة مش قياس دقيق... يعنى انت لو وقفت فى اشارة مدة طويلة شوية او الدنيا كانت زحمة كل دة حيزود الاستهلاك

رابعا بتاع التاكسى كلامة صح... طريقة السواقة بتفرق فى الاستهلاك جدا

MMamdouh

**tarek_2005** · 30-06-2011 02:46 PM

في ناس بتفضل دايسة علي البنزين وهوا شايف امامه من بعيد اشارة قافلة وبعدين قبل الاشارة بعشرين متر يبتدي يدوس فرامل
دا يستهلك بنزين كتير وتيل فرامل كتير
الشخص الثاني
يلاقي الاشارة قافلة يقوم ممور العربية وسايبها بسرعتها لحد ما يوصل الاشارة وبعدين يدوس فرامل

الفرق ان الاول ساب العربية عند عدد لفات موتور تقريباً 2000 لفة / دقيقة فترة السير الي الوصول للاشارة
الثاني ساب العربية عند 1200 لفة / دقيقة المسافة الي مشيها لغاية ما وصل الاشارة

ودا الي بيعمل فرق الاستهلاك للبنزين وتيل الفرامل من فرد للاخر
ودا مجرد مثل وهناك امثلة كثيرة

واحد نازل منزل كوبري طويل
مور العربية وسابها تنزل بفعل قوي الجاذبية الارضيثة (( وفر بنزين ))
التاني سابها معشقة ورجله علي البنزين (( استهلك شوية بنزين زيادة ))

الخ الخ الخ

**ironheart** · 11-07-2011 09:25 AM

لالالا استهلكها رائع
يعنى تقريبا اللتر بيعمل 11.3 كم هو فى المتوسط اللتر بيعمل 10كم

**vip6** · 23-07-2011 07:35 PM

اختبرت استهلاك العربية مرتين مع تشغيل التكييف طوال الوقت بدون توقف

المرة الاولى القراية كانت 411 ومونت 36 لتر لحد الزور مع تشغيل التكييف طول الوقت

المرة الثانية القراية كانت 351 ومونت 34 لتر لحد الزور مع تشغيل التكييف طول الوقت

والمرتين كان على الطرق السريعه و شويه جوه البلد

ما رأيكم ولكم جزيل الشكر