ثبات السيراتو و السيراتو كوبيه.

**Shehab1337** · 01-07-2011 03:40 PM

يا جماعة, انا كنت خلاص رايح اجيب السيراتو كوبيه و حصلي تراجع تام و ابتديت افكر في الانترا و كروز و حاجات تانيا كتير.

سبب التراجع اختلاف الرأي الشديد علي العربية. انا سألت كام واحد قالولي ان العربية ثابتة علي الأرض و بتاع, و بعدين اسأل واحد تاني يقول لي بلاش تجيبها يا مان, العربية الثبات بتاعها ضايع, خفيفة اوي علي الطريق, حاجة زي اللانوس في خفيتها.

واحد تاني يقول لأ لأ لأ لأ, هيا السيراتو مش ثابتة لكن السيراتو كوبيه ثابتة, طب ازاي يا جدع مهما الاثنين واحد, يقولك لأ!!! فرق 1 سم في الطول.

مع العلم ان كل الناس اللي انا بستشيرها معرفهاش, هما ناس في الشارع معاهم العربي’ و بوقفهم و أسالهم.

هوا موضوع الثبات ده اللي محدش رسيلو علي حل فيه.

يا ريت اللي معاه سيراتو او سيراتو كوبيه, يقول النوع و الموديل و ايه رأيه في الثبات. عايزين ناخد اكبر اراء ممكنة عشان نخسم الأمر.

شكرا.

**mido** · 01-07-2011 05:32 PM

انا بالنسبه ليا السيراتو اخرها 140 بالنسبه للطرق بتاعت مصر بعد كده اى طوبه فى الطريق بتحس ان العربيه هتطير الكوبيه اوطى وجنط 17 واكيد الثبات فيها احسن

نصيحه...متشتريش عربيه لمجرد انها على 160 او 180 ثابته
فكر كام مره ممكن تجيب السرعه دى وفكر فى الرادارات وفكر ان عند السرعات دى نسبة الحوادث كبيره والطرق ملهاش كبير ولو انت بتعرف تسوق اكييد اللى ماشى جمبك مبيعرفش

**waleedelpiloot** · 01-07-2011 06:32 PM

الكوبية اثبت من السيدان عشان اوطى 1 سم
بس مش الفرق الى هوة فرق السما من الارض يعنى

**Typerr** · 01-07-2011 06:41 PM

السيراتو ثابته جامد

**mmffor** · 01-07-2011 07:00 PM

انت لو جبت الكوبيه و رحت خابطها سبويلر كبير و كساحات و كاوتش عريض تبقى كفائة
و بعدين اخبطها تيربو شارجر بالكيت

**masterzmind** · 01-07-2011 08:36 PM

انت لو جبت الكوبيه و رحت خابطها سبويلر كبير و كساحات و كاوتش عريض تبقى كفائة
و بعدين اخبطها تيربو شارجر بالكيت

مش معاك يا باشا فى الكلام دة ماهى لو العربية مش ثابتة يبقى الكلام دةملهوش لازمة منا اجيب سيفيك واعمل فيها الكلام دة ......

العربية تقريبا تزيد فى الثبات عن السيراتو العدية وكمان لو كانت سعودى عشان فيها esp

**pirlo2000** · 01-07-2011 09:00 PM

رايي الشخصي.... لو علي طريق حلو انا جبت عن نفسي 170 مفيش اي مشاكل خالص و ثابتة جدا....

لكن لو طريق عليه مطبات هوا زي الدائري فانت بتحس انها خفيفة نسبيا ..... يعني ببقي جايب 130 مثلا بس لازم ابقي مركز .... بس الميزة انها بتلم نفسها بسرعة ........

و انصحك انك تبعد عن السرعة لان فعلا اخرتها وحشة.... الارقام اللي بقولهالك ديه انا بس كنت بجرب لكن انا عن نفسي اخري 100,و فعلا عيب الكوبيه الوحيد انها بس مغرية للجري ..... و ربنا يسترها معنا جميعا

**goodzila** · 02-07-2011 01:43 AM

باشا خد كلامي ده ثقه ثقه ثقه
انا جربت السيراتو العاديه 5 ايام ومشتريها زيرو
وبعتها بعد 5 ايام لسبب واحد فقط وهو الثبات الزفت !
ماشي علي 150 علي طريق العلمين ومعايا عيلتي قاعدين 5 في العربيه والعربيه حاسس اني ماشي ع الهوا ! مفيش ثبات نهائيا !
اشتريت بعد كده الكوبيه واقسملك بالله ماشي علي 200 لوحدي في طريق العين السخنه وثبات الحمدلله مابعده ثبات
فرق شاسع بين الاتنين والسيراتو كوبيه بما انهي اوطي علي الارض وعريضه عن السيراتو العاديه بالتالي لازم تديك ثبات اكتر بمراحل
تحياتي وموفق باذن الله

**M.Hassan47** · 02-07-2011 01:52 AM

ياجماعة السيراتوا انا شايف ان ثباتها جميل جدا ومفيهوش مشكلة مع انى مكنتش واثق من كده لأنى كنت راكب المانى واحس بالموضوع ده جدا لو فى فرق شاسع لكن السيراتوا ثباتها مش وحش خالص وعن تجربة على طريق اسكندرية القاهرة وجبت الميتين وكان معايا اتنين بس فى العربية ومفيش ادنى مشكلة يعنى اللى هو تحس انك فعلا بتجرى جامد بس العربية مابتعومش ولا بتحدف ولا اى حاجة وماشية ثابتة معاك .

**sefo** · 02-07-2011 02:10 AM

المشاركة الأصلية كتبت بواسطة goodzila

باشا خد كلامي ده ثقه ثقه ثقه
انا جربت السيراتو العاديه 5 ايام ومشتريها زيرو
وبعتها بعد 5 ايام لسبب واحد فقط وهو الثبات الزفت !
ماشي علي 150 علي طريق العلمين ومعايا عيلتي قاعدين 5 في العربيه والعربيه حاسس اني ماشي ع الهوا ! مفيش ثبات نهائيا !
اشتريت بعد كده الكوبيه واقسملك بالله ماشي علي 200 لوحدي في طريق العين السخنه وثبات الحمدلله مابعده ثبات
فرق شاسع بين الاتنين والسيراتو كوبيه بما انهي اوطي علي الارض وعريضه عن السيراتو العاديه بالتالي لازم تديك ثبات اكتر بمراحل
تحياتي وموفق باذن الله

كامل احترامى لراى حضرتك بس لى تعقيب بسيط
ليه حضرتك اهدرت عامل المقارنه بين الطريقين هل يعقل ان يكون طريق القوات المسلحه انشأته وهو طريق جديد وستريت وبدون مطبات ومنحينياته على الواسع وده طبعا طريق السخنه اللى هو احسن طريق فى مصر ذى طريق العلمين ؟؟؟؟
يبقى ليه نرجع السبب بالكامل للسياره
مع ملاحظه ان سيادك شعرت بفرق كبيير جدا بين العربيتي علما بأنهم تقيربا واحد
وهل عدم نجاح التجربه الاولى لسيادتك مع السيدن مخلكش تفكر تغير النوع تماما واتشجعت تجيب نفس السياره كوبيه مرة تانية!!!!!!!!!
ولك كل لتقدير