الاول بيعلق في فتيس اللانوس المانيوال

**MITSUKERO** · 02-07-2011 04:21 PM

السلام عليكم

عندي مشكلة سخيفة جدا هي ان الاول بيعلق لما اجي اجيبة و يسلام لو في اشارة مرور ولا حاجة بقي و الناس ورايا و بفضل اجيب التاني و التالت و ارجع تاني اجيب الاول و اوقات يجي و اوقات ويرضاش يدخل الحارة بتاعته اساسا و يقف في الوسط !!

ايه الحل يا عمالقة الدايو ؟

**propagaanda** · 02-07-2011 05:32 PM

روح للميكانيكي خليه يرجلشلك على عصاية الفتيس علشان الغيارات تتحكم معاك
الأول زي المارشيدير ساعات بيعضعض سنة بسيطة خصوصا لو العربية ماشية
ان شاء الله رجلاش عصاية الفتيس هيظبط معاك النقلات كلها
محوظة: لو العجل بتاع العربية لف و العربية ماشية مالوش لازمة الأول لأن وظيفة الأول الأساسية تحريك العربية من السكون ... يعني لو العربية اتحركت اديها التاني على طول

**mostafa mahmod** · 02-07-2011 06:26 PM

طب سوال على السريع بعد اذن صاحب الموضوع

الحته اللى فى الاول دى انه بيعض و العربيه ماشيه دى عادى ولا كده محتاجه رجلاش

**yaserbasha2000** · 02-07-2011 06:28 PM

الموضوع ده بحصل معايا الصبح بس في اول غيار بيكون الاول صعب و المارشدير بيزعق بعد العربيه ما تسخن و امشي بيها 5 دقايق الاول بيكون كويس و المارشدير ميزعقش

مش عارف دي ممكن تكون ريجلاش برضه و لا غوايش

**MITSUKERO** · 02-07-2011 06:39 PM

لا ياجماعة الاول مش بيرضي يجي و العربية واقفة زي مثلا اشارة او زحمة و كده و اللي بيحصل بالظبط انه بيدخل الحارة بتاعته و بيقف في نصها و مبيرضاش يكمل حتي لو بالعافية

و بجد شكرا جدا علي الاهتمام بجد منتدي دايو انشط منتدي تقريبا هنا

**ahmedezzat78** · 02-07-2011 08:06 PM

المشاركة الأصلية كتبت بواسطة yaserbasha2000

الموضوع ده بحصل معايا الصبح بس في اول غيار بيكون الاول صعب و المارشدير بيزعق بعد العربيه ما تسخن و امشي بيها 5 دقايق الاول بيكون كويس و المارشدير ميزعقش

مش عارف دي ممكن تكون ريجلاش برضه و لا غوايش

أكيد انت مغير زيت الفتيس لزيت ثقيل 140 مثلا و لو كده المشكله تبقى اكثر وضوحا فى الشتاء ......... المفروض الفتيس بتاعنا ياخد زيت لزوجه 90

المشاركة الأصلية كتبت بواسطة mitsukero

لا ياجماعة الاول مش بيرضي يجي و العربية واقفة زي مثلا اشارة او زحمة و كده و اللي بيحصل بالظبط انه بيدخل الحارة بتاعته و بيقف في نصها و مبيرضاش يكمل حتي لو بالعافية

و بجد شكرا جدا علي الاهتمام بجد منتدي دايو انشط منتدي تقريبا هنا

موضوع رجلاش و ضبط العصايه و العقربه

**MITSUKERO** · 02-07-2011 08:58 PM

بشمهندس احمد عزت : الموضوع صعب يعني ولا ايه ؟ ايه العقربة دي و الميكانيكي هيفك ايه عشان يوصلها ؟

**propagaanda** · 02-07-2011 09:06 PM

المشاركة الأصلية كتبت بواسطة mitsukero

بشمهندس احمد عزت : الموضوع صعب يعني ولا ايه ؟ ايه العقربة دي و الميكانيكي هيفك ايه عشان يوصلها ؟

العقربة دي المكان اللي بتدخل فيه عصاية الفتيس هتلاقيها تحت البطارية عند طبة الفتيس العلوية
الموضوع بسيط جدا اي ميكانيكي بيفهم بظبطلك العصاية و العقربة الغيارات هتبقى فل ان شاء الله

**propagaanda** · 02-07-2011 09:08 PM

المشاركة الأصلية كتبت بواسطة sasaasdf

طب سوال على السريع بعد اذن صاحب الموضوع

الحته اللى فى الاول دى انه بيعض و العربيه ماشيه دى عادى ولا كده محتاجه رجلاش

العضة اللي في الأول دي طبيعية كنت بشتكي منها قالوولي في التوكيل عادي جدا بس اتعودت عليها خلاص و بيني و بينك مش مضايقاني خالص لأني مش بحتاج الأول غير في مطلع و العربية واقفة و في الحالتين مش بيعض معاك

**propagaanda** · 02-07-2011 09:10 PM

المشاركة الأصلية كتبت بواسطة propagaanda

العضة اللي في الأول دي طبيعية كنت بشتكي منها قالوولي في التوكيل عادي جدا بس اتعودت عليها خلاص و بيني و بينك مش مضايقاني خالص لأني مش بحتاج الأول غير في مطلع و العربية واقفة و في الحالتين مش بيعض معاك

وأكيد مش قصدي عضة زي عضة ترس ... انا قصدي ان العصاية زي مايكون مش عايزة الغيار بس لو عايز تديها الأول هتاخده مفيش مشاكل