سيبكوا من الأدوية خااااااااااالص و إدوها أعشاب

**OlaOsman** · 03-05-2008 03:36 PM

لفت نظري جدا في الآونة الأخيرة كم الإعلانات التجارية عن أعشاب بتعالج كل حاجة في الدنيا.. يعني منتهى البساطة ممكن مريض السكر يرمي أدوية السكر بتاعته و يقول وداعا لحقن الأنسولين عشان يشتري علبة الله أعلم فيها ايه بس هو ده اللي هايعالجه من مرض السكر.. العلبة تمنها 150 جنيه + مصاريف الشحن

يعني كل الدكاترة و الأبحاث العلمية دي كلها ما عرفوش يوصلوا لعلاج مرض السكر و العلبة اللي شكلها مريب دي هي اللي هتعالج مرض السكر.. هو مرض السكر أصلا بيتعالج؟ ايه النصب المستفذ ده؟

طبعا ناهيك عن العلبة ام غطا أصفر و العلبة ام غطا أزرق لعلاج العقم عند الرجال و النساء.. يا سلااااااااااام.. ماكانش حد غلب.. بس برضه الناس المفروض يكون عندها وعي عن كده شوية.. و لا ايه؟

**دموع الثلج** · 03-05-2008 04:01 PM

يا علا سيبك من شغل الدعايه ده الاعشششششششاب دى ممكن تستخدميها لمغض لصداع بسيط لكحه

الامراض الخفيفه يعنى وكمان تاثيرها كوقايه يشترط الاستمراريه على تناولها

اما الامراض اللى ذى العقم والامراض المستعصيه النتيجه فيها نسبتها ضئيله لاننا نفتقد الوعى فى استخدامها

وفيه اعشاب ذكرها الرسول عليه الصلاه والسلام فى احاديث كثيره واوصى باستخدامها وكلها موجوده فى الطب النبوى

لكن برضوه هلفت انتباهك لشى اننا معندناش اى ثقه لا فى اعشاب ولا ادويه لان الاخطاء البشريه وصلت لكل شى
ومش هقولك الاعشاب والمواد الكيماويه والمبيدات المسرطنه يعنى من الاخر الشافى هو الله وربنا يشفى كل مريض يارب ولا يحتاج للعلبه ام غطاء اصفر ولا فسدقى

**aliabutaleb** · 03-05-2008 04:15 PM

كل الاعلانات الهابطة دي تلاقيها في قناة المحور
وكان الاول في قناة الناس
مش عارف لسة موجودة ولا لأ
قمة النصب والسرقة

**M_HaFeZ** · 03-05-2008 04:23 PM

ربنا ينتقم منهم اللى بيعلموا الاعلانات دى ولا اللى بيسمح بيها
واللى كل الناس بتقوله ياعم دى اعشاب ومش هتضرك .. يعنى لو مش فائده مفيهاش ضرر

طيب ماهو البانجو اعشاب ومقولتش الخشخاش ولا المخدرات اللى لازم لها معالجه الاول
البانجو تزرعه واعشاب مخدره ضاره

غير كده كمان حاجه بسيطه اوى السنمكه المعروف فوائدها فى حالات الامساك
السنمكه نفسها اذا زادت الجرعه المستخدمه يصبح مفعولها سام

الناس بتتكلم وخلاص

**TaoTao** · 03-05-2008 04:30 PM

المشكلة إن ساعات فيه ناس بـ "تتعلق بقشاية" ربنا يشفي الجميع ويزيح عنهم. بعد ماييئسوا من العلاج الكيميائي المعتمد يلجأوا لأي مصدر آخر قد يكون فيه أمل.
وفيه كمان بعد اقتصادي، لما واحد يلاقي علاج كيميائي معتمد من طبيب الفيزيتا بتاعته لوحدها 200 جنيه وسعر الدوا يتجاوز الألف، يلجأ لوهم الأعشاب مضطراً.

وده اللي مسبب رواج لهذه التجارة، رغم كل التقارير اللي بتقول إن الأعشاب المباعة تتكون بها فطريات سامة لسوء التخزين -غير إنها غالباً غير مناسبة صحياً-.

**ows212** · 03-05-2008 06:34 PM

المشكلة إن ساعات فيه ناس بـ "تتعلق بقشاية" ربنا يشفي الجميع ويزيح عنهم. بعد ماييئسوا من العلاج الكيميائي المعتمد يلجأوا لأي مصدر آخر قد يكون فيه أمل.
وفيه كمان بعد اقتصادي، لما واحد يلاقي علاج كيميائي معتمد من طبيب الفيزيتا بتاعته لوحدها 200 جنيه وسعر الدوا يتجاوز الألف، يلجأ لوهم الأعشاب مضطراً.

وده اللي مسبب رواج لهذه التجارة، رغم كل التقارير اللي بتقول إن الأعشاب المباعة تتكون بها فطريات سامة لسوء التخزين -غير إنها غالباً غير مناسبة صحياً

كلامك مضبوط وخصوصا فى حالات العقم ... والأمراض الميئوس منها

**OlaOsman** · 03-05-2008 07:59 PM

أهو انا بأه اللي بيستفذني فعلا هو لعب الناس دي على وتر الناس اللي عندها مشاكل في الإنجاب.. بجد باحس انهم مش بني آدمين

هو مافيش رقابة من أي نوع على الحاجات دي؟

**Casio2000** · 03-05-2008 10:51 PM

المشاركة الأصلية كتبت بواسطة OlaOsman

أهو انا بأه اللي بيستفذني فعلا هو لعب الناس دي على وتر الناس اللي عندها مشاكل في الإنجاب.. بجد باحس انهم مش بني آدمين

هو مافيش رقابة من أي نوع على الحاجات دي؟

لا يا فندم مافيش رقابة اسفين والله - طب هوا حضرتك بتسألي ليه :) - طب تحبي تطلبي اي حاجة تانية ؟ - نظام مثلا؟ - ضمير يمكن؟ - دين او ذمة ؟

نتكلم جد

انابدأت الاحظ في بعض اعلانات الشامبو مثلا اللي غالبا بتبقى اجنبية ان اي تأثير مزعوم بيتقال على المنتج تلاقي تحت و بخط رفيع توضيح لشروط تحقيق التأثير دا

مثلا

شامبو كذا كذا يقلل من تساقط الشعر (تلاقي تحت مكتوب "الناتج عن التكسر و مع الاستعمال المتكرر")

القصد ان اكيد في اليات برة بتجبر المعلن على كدا

عقبالنا

**ahmedateya** · 04-05-2008 01:25 AM

يا علا جيتي على الجرح
و للأسف بتاخد موافقة وزارة الصحة على انها مكملات غذائية
و طبعا الجهلة كثر و ربنا يشفي

**د.اشرف هنداوى** · 04-05-2008 01:34 AM

الاعشاب اللي بيقولوا لعلاج السكر بيطحنوا فبها اقراص علاج السكر و بكده المرىض ما ياخدها نسبه السكر بتقل فعلا ---- منتهي النصب و طبعا باسم الدين و خاصة في قنوات (العسل و البطاطين) : الناس و الحكمه و الرحمه الخ
اللي عندهم الغايه تبرر الوسيله: بغرض اسنمرار القناه بيقبلوا اي اعلانات نصب في نصب - رنات اسلاميه !!!و غيره

و اعشاب علاج الكبد فيه ناس ماتت بسببها في مصر و السعوديه

د . اشرف هنداوي