الموضوع: انواع واسعار الكاوتش في مصر

في البداية أحب أشكر كل المشاركات المفيدة على منتدانا الجميل و اللي استفدت منها جدا ، و أشكر أ. وليد (aw2100) على نصائحه و اقتراحاته ( و هو اللي نصح باليوكوهاما من وسط القائمة الطويلة) .

أنا فكرت في كل الكلام اللي اتقال عن الإطار بريدجستون My-02 و سألت بعض الناس الأخرى و كان مجمل كلامهم إن فيه تحسن ملحوظ في My-02 عن سابقه My-01 بس لسه موصلش لمستوى الراحة المنشود و كان الإقتراح إني أمسك العصاية من النص و أجيب يوكوهاما سي درايف و خصوصا إن سعره مش عالي و أداؤه جيد و هادي نوعا ما و طري .
و عملت بنصيحة معظم الناس و استبعدت الـ Continental ContiEcoContact 5 لأن أجنابه طرية جدا جدا جدا بشكل غريب يثير المخاوف منه لما يمشي على الطرق بتاعتنا .

و بالفعل أمس الأربعاء 19-3-2014 العصر اشتريت طقم كامل (4 إطارات) Yokohama C.Drive من أبناء علي صبرة في شارع أحمد سعيد بدون تركيب بـ 450 جنيه للإطار الواحد ، و تاريخ الإنتاج الأسبوع 36 من عام 2013 ، و ركبته في تاير مانيا بمدينة نصر (ناس محترفين جدا و شغلهم فوق الممتاز و متفهمين جدا لمعايير الدقة بتاعتي و ريحوني و عملوا اللي طلبته منهم بابتسامة و من غير جدال أصلا ) .

و تفاصيل التركيب و سعر كل خدمة للطقم كالآتي :
-1- الفك و التركيب بـ 20 جـ (Fit & Fix بـ 40 جـ)
-2- الترصيص بـ 60 جـ (Fit & Fix بـ 40 جـ)
-3- شفط الهواء من الإطار ثم نفخه نيتروجين بـ 20 جـ (Fit & Fix بـ 40 جـ)
-4- بلوف كاتش ألماني بـ 40 جـ (نفس سعر Fit & Fix )
-5- أهم حاجة في الموضوع كله و هو إن العربية تترفع بالكوريك بتاعها علشان البهدلة اللي بتحصل للعربية من تحت بسبب الكفة بتاعة الكوريك التمساح و خصوصا إن عربيتي متصفحة من تحت (بألواح فايبر مقوى مش حديد صلب) و الشاسيه مش بيبان و لو رفع بالكوريك التمساح عند العتب هيبوظ الشفة اللي ماشية من قدام لورا بطول العربية (و ده أنا شوفته في أي عربية بتترفع بالكوريك المؤذي ده) ، ولو رفع من عند الشاسيه (بالتخمين كده لمكانه) يبقى هيضر ألواح الحماية الفايبر و يتنيها أو يكسرها لأن نص وزن العربية هيتشال على الحافة المدورة بتاعة كفة الكوريك ، و أ. محمد يسري صاحب المحل وافق بس مقابل زيادة 20 جـ ( و أنا وافقت) لأن الأسطى اللي عنده هو اللي هيرفع عجلة عجلة و بكده عربيتي هتاخد وقت كتير و تعطل شغل العربيات التانية لغاية عربيتي متخلص و ده لأنه عنده عاملين إتنين بس و في المعتاد الشغل بيبقى كالآتي العامل المساعد بيرفع الجنب بالكوريك التمساح و يفك العجلتين و يدخلهم الورشة و هناك يستلمهم العامل الأسطى و يشوف شغله (فك القديم و تركيب الجديد و الترصيص) و ياخدهم العامل المساعد يركبهم في العربية و ينقل للجنب التاني و يكرر العملية (يعني كل واحد بيشوف شغله و بكده يقدر الإتنين يشتغلوا في عربيتين في نفس الوقت) .

إجمالي تكلفة الخدمات 160 جـ ( نفس سعر Fit & Fix بس ماكانوش هيوافقوا على رفع العربية بالكوريك بتاعها و ده ظني أنا و مش هيشفطوا الهواء من الإطار قبل نفخه بالنيتروجين و مش هيستحملوني بحسوكتي أبدا أبدا و الجو كان هيبقى متكهرب و احتمال الكروتة هيبقى كبير) .

و بكده تكون التكلفة النهائية للإطار الجديد 490 جـ للواحد ( 1960 جـ للطقم)


و ده دعاء عن رسول الله يقال عند شراء الجديد و عند الرزق الجديد :
" اللهم إني أسألك من خيره و خير ما صنع له ، و أعوذ بك من شره و شر ما صنع له "
" اللهم بارك لي فيه "
" اللهم أعطني خيره و اصرف عني شره "
" الحمد لله الذي رزقني هذا من غير حول مني و لا قوة "
آمين

قرأت أكتر من مرة إن الإطارات الجديدة بتحتاج مسافة 200 - 500 كم لإزاة الطبقة الخارجية الزلقة من مواد التصنيع و الشمع و خلافه و بعد المسافة ديه توصل لأدائها المعروف الخاص بالتماسك مع الأسفلت و الفرامل ، و قرأت في أكثر من موضع إن اليوكو سي درايف بيحتاج حوالي 1000 كم و بيبقى بعدها أحسن بكتير من الأول .

إنطباعي الأولي لأول 20 كم بعد السير عليه في طريق المطار :
- طري و حنين في الحفر و النقر (فرق كبيييييييييييييييييير عن الإطار القديم)
- صوته أعلى من الإطار القديم ( و ده خلاني أكتشف بعد مرور حوالي 4 سنوات و نص إن الإطار اللي كان راكب فيها إطار شبه صامت ).
- الطارة بقت أخف من الأول و أحسن في دقة التوجيه و أسرع في الأستجابة .
- التماسك على الأسفلت لسه لم يختبر .
- إنطلاق العربية من الثبات أنعم و أحسن .
- التسارع أحسن و أنعم في نفس الوقت (المحرك يبذل مجهود أقل) .
- لاحظت إن قراءة استهلاك البنزين قلت عن الأول و ده محتمل جدا و خصوصا لو مقاومة التدحرج بتاعة اليوكو قليلة عن الماتادور ، بس لسه بدري على الحكم و التسليم بإنه بيوفر في استهلاك البنزين (لما أشوف هيعمل إيه في الـ 2000 كم الأولى ) .

للعلم فقط ، فالإطار القديم كان Matador MP 42 Elite 2 و بياناته Treadwear 240 Traction AA Temperature A و صنع في سلوفاكيا و تاريخ إنتاجه كان الأسبوع 21 من عام 2008 يعني عمره تقريبا 6 سنوات و ديه هي فترة الصلاحية لأي إطار .


تقبلوا تحياتي

المشاركة الأصلية كتبت بواسطة aw2100

1000 مبروك على الكاوتش الجديد والكاوتش القديم اصيل قوى معاك 6 سنوات دى عمرة الأفتراضى للتخزين دون تشغيل عمرة الافتراضى مع التشغيل 3 سنوات بس كده انت افتريت على الكاوتش القديم قوى وعلى فكرة صوته عالى شوية علشان قوة التصاقة بالارض عالية ومستنين تقرير بعد 1000 ك

جزيل الشكر على التهنئة يا أ. وليد

معلومة إن عمر التشغيل للإطار هو 3 سنوات فقط جديدة عليا .
بس الإطار القديم بصراحة أشهد له بإنه حتى آخر يوم ليه في العربية كان ممتاز في الفرامل و متسمعش له صوت مع الفرملة (اللي هو الصرخة) و الـ ABS مبيشتغلش إلا مع الفرملة القوية عكس إطارات تانية بتخلي الـ ABS يشتغل على الفاضي و المليان ، و أيضا لغاية آخر يوم و مفيش تشققات في أجناب أي إطار من الأربعة ، فقط التشققات تلاقيها في المداس و صغيرة جدا (تشققات الجنب أكثر خطورة من تشققات المداس) ، بس كان نشف في الآخر و إن كان هو من يومه مش مريح أوي مع الحفر و النقر.

عايز أقول ملاحظة مهمة جدا :
بخصوص نوع المطاط المستخدم في أي إطار ، حضرتك و كل الزملاء لاحظتم في بيانات الإطار القديم إن الـ Treadwear 240 و ده معناه إن الإطار القديم كان الـمطاط المستخدم فيه طري (Soft Compound Rubber) و ده بيدي إلتصاق أحسن مع الأسفلت بس معدل تآكله بالبري و الإحتكاك أكثر يعني مبيعملش كيلومتر كتير مقارنة بغيره ، لكن في نفس الوقت بيحتاج سطح طريق نظيف جدا و أملس و مش عايز رمل و حجر صغير و زلط و زجاج و كسر طوب لأن هؤلاء بيعملوا خربشة في سطح المداس و بيقطعوا منه حتت صغيرة جدا لأنه طري و لما تبص عليه تلاقيه "منقر" يعني مليان حفر صغيرة في حجم حبة اللوبيا و النتيجة إن مساحة التلامس الحقيقية الفعلية مع الأسفلت بتقل جدا و ده يؤدي إلى إلتصاق أقل ؛ يعني ثبات أقل .

يفضل في مصر إنه الـ Treadwear يكون 300 فأكبر ، و كل الإطارات اللي في السوق كده فعلا إلا إطارات بريدجستون التالية Bridgestone Turanza GR-90 و Bridgestone Turanza AR-20 و Bridgestone MY-02 قيم تآكل المداس بتاعتهم واحدة و هي Treadwear 260 بس دول بريدجستون (يعني مش أي مصنع!!!) .

أرجو إن الإطار الجديد يكون عند حسن ظني ، و بإذن الله إن كان ليا عمر هعمل له تقرير بعد الألف كم الأولى .

تحياتي

المشاركة الأصلية كتبت بواسطة d . A .\ ayman

بصراحة استفدت كتير من معلومات وبحث حضرتك الأكثر من رائع ...
إن كنت حضرتك استفدت مني مرة فأنا استفدت من حضرتك و باقي الزملاء ألف مرة .

تعجز كلمات الشكر عن ايفاءك حقك
العفو ، ده بس من ذوق حضرتك ، و أنا معملتش حاجة تذكر ، ديه كانت تجربتي و نقلتها بتفاصيلها لعلها تفيد من ليس لديه وقت لعمل مثل ذلك البحث ، و الشكر الحقيقي هو لله فهو الموفق و المعين على كل خير .

الف شكر على مجهودك القيم ويجعله الله في ميزان حسناتك
لا شكر على واجب ، و أردد ورا حضرتك و أقول آمين (بس اللي قالقني بجد هو شرط الإخلاص و عدم الرياء و عدم الشرك الخفي و عدم حب السمعة و عدم الزهو بالنفس لقبول الله لأي عمل ..... أدعو الله و أسأله أن يرزقنيهم) .