عملت حادثة بالبونتو و محتاج مساعدة فى شوية حاجات

**ahmed_al3alem** · 09-07-2011 04:22 PM

ازيكم يا رجالة نايل موتورز

عربيتى بونتو 2003 عملت بيها حادثة و وديتها مركز صيانة و المهندس هناك بيقول احتمالية تغيير ربع أمامى كامل لان فى كسر فى الموتور وكسر فى الفتيس

Uploaded with ImageShack.us

عموماً هو لسه هايعمل المقايسة و يبعتهالى و أنا بس حابب أعرف الربع الامامى ده تكلفتة كام أصلاً و بيتجاب منين لانى مش خبرة أوى فى الحوار ده و هل الاحسن ان انا اللى اشترى قطع الغيار دى و اوديهلوا ولا ايه

أرجوكم الافادة سريعاً و جزاكم الله كل خير على المجهود

**eng.m7md.ali** · 09-07-2011 04:29 PM

الحمد لله انك سليم وفي داهيا العربية

هتنزل الحرفيين تجيب الربع ده من محلات فيات
بس بجد لو لقيت بيعة احسن بيعها لانها بعد كدة هتقرفك

**ahmed_al3alem** · 11-07-2011 08:58 PM

أرجو الافادة من خبراء فيات و ياريت يا جماعة المساعدة بجد لانى ضعيف شوية فى موضوع العربيات ده

**حماده المصري** · 11-07-2011 10:07 PM

بص انا مش عايز ادايقك بس العربيه دي فعلا هتقرفك في كل حاجه تصليح وفلوس وفتى صنايعيه

وقرف وفي النهايه برضو ممكن متطلعش مزبوطه اوي

بس عموما الكلام المبدئي في تصليحها تنزل وكاله البلح او الحرفيين او عزبه شلبي وتجيب نص امامي كامل بالمتور والفتيس والعفشه

وعلى حسب بقى الحادثه ايه ظروفها ممكن لو الشاسيه سليم او ممكن يتزبط هتاخد من النص كل حاجه الا الشاسيه بتاعه والشاسيه هو عباره عن فرتدين ماسكين العربيه من اول الكابوت لاخره دول عليهم كل حاجه المتور والفتيس والعفشه كمان من تحت متصله بيهم

ممكن الشاسيه يتزبط ويستعدل وتطلع حلوه وممكن بقى يقوم قاطع الربع الي قدام كله وينزل يالنص التاني بالشاسيه بتاعه بس مش عارف الموضوع ده مع المرور ايه ظروفه بس الفكره كلها انك توديها لصنايعي بيفهم وشكرااااا ده هيزبط الكلام كله وللاسف لو صنايعي بيفهم هيتكلم معاك في فلوس كتيره اوي

عموما انا معايا اتنين صنايعيه في الحرفيين شغلهم حلو والاتنين غاليين بصراحه بس بتاخد من ايديهم عربيات مزبوطه

اول واحد تخلي سمكري سمير وعلي اللي في الحررفيين على شمالك وتاخد اول شارع يمين الشارع اللي فيه سيد حواجب السمكري ده اسمه صلاح ارنب بعد سيد حواجب استاذ في شغله بصراحه

وفي واحد تاني برضو بعد سمير وعلي في محل استيراد امريكي وجيب على الشمال تدخل البلوكه دي وتسال على ادهم السمكري استاذ برضو هوه صحيح العربيه دلوقتي فين ؟؟؟

انت المفروض تهدى وتفكر بالضبط انت عايز ايه انت ممكن تبيع العربيه دي بسعر فوق ال 10 او ال 15 الف جنيه

وتصليح العربيه هيكون غالي انا شايف انه هيخش في 10 او 15 الف جنيه بالمنظر ده بس الفكره كلها انك متديش امر تصليح الا لما تعرف بالضبط هيتكلف كام

يعني تنزل الحرفيين وعزبه شلبي ووكاله البلح وتعرف النص الامامي بكام وتشوف ارخص واحد فيهم يعني ممكن يطلع بكلام فارغ وممكن يطلع غالي ده هيبقى عامل اساسي في قرارك هتصلصح ولا هتبيع وعموما برضو حط في دماغك ان العربيه هتاخد في حدود 3 اسابيع تصليح

لو سعر النص ماشي معاك صور العربيه بالمنظر ده واطلع على كام سمكري بس يكونوا معروفين ومفيش مانع برضو تشوف سمير علي هياخد فيها كام(سمير على انضف سمكري فعلا واغلاهم مش عايز اقولك في عنده بورشات بتتصلح) بس ابعد عن مراكز الصيانه لاني شايف ان مصنعيتهم غاليه جدا جدا بس مفيش مانع تعرف مصنعيته هتبقى كام برضو

وعلى هذا الاساس تشوف يناسبك تبيع ولا تصلح

**ahmed_al3alem** · 12-07-2011 01:51 AM

المشاركة الأصلية كتبت بواسطة حماده المصري

بص انا مش عايز ادايقك بس العربيه دي فعلا هتقرفك في كل حاجه تصليح وفلوس وفتى صنايعيه

وقرف وفي النهايه برضو ممكن متطلعش مزبوطه اوي

بس عموما الكلام المبدئي في تصليحها تنزل وكاله البلح او الحرفيين او عزبه شلبي وتجيب نص امامي كامل بالمتور والفتيس والعفشه

وعلى حسب بقى الحادثه ايه ظروفها ممكن لو الشاسيه سليم او ممكن يتزبط هتاخد من النص كل حاجه الا الشاسيه بتاعه والشاسيه هو عباره عن فرتدين ماسكين العربيه من اول الكابوت لاخره دول عليهم كل حاجه المتور والفتيس والعفشه كمان من تحت متصله بيهم

ممكن الشاسيه يتزبط ويستعدل وتطلع حلوه وممكن بقى يقوم قاطع الربع الي قدام كله وينزل يالنص التاني بالشاسيه بتاعه بس مش عارف الموضوع ده مع المرور ايه ظروفه بس الفكره كلها انك توديها لصنايعي بيفهم وشكرااااا ده هيزبط الكلام كله وللاسف لو صنايعي بيفهم هيتكلم معاك في فلوس كتيره اوي

عموما انا معايا اتنين صنايعيه في الحرفيين شغلهم حلو والاتنين غاليين بصراحه بس بتاخد من ايديهم عربيات مزبوطه

اول واحد تخلي سمكري سمير وعلي اللي في الحررفيين على شمالك وتاخد اول شارع يمين الشارع اللي فيه سيد حواجب السمكري ده اسمه صلاح ارنب بعد سيد حواجب استاذ في شغله بصراحه

وفي واحد تاني برضو بعد سمير وعلي في محل استيراد امريكي وجيب على الشمال تدخل البلوكه دي وتسال على ادهم السمكري استاذ برضو هوه صحيح العربيه دلوقتي فين ؟؟؟

انت المفروض تهدى وتفكر بالضبط انت عايز ايه انت ممكن تبيع العربيه دي بسعر فوق ال 10 او ال 15 الف جنيه

وتصليح العربيه هيكون غالي انا شايف انه هيخش في 10 او 15 الف جنيه بالمنظر ده بس الفكره كلها انك متديش امر تصليح الا لما تعرف بالضبط هيتكلف كام

يعني تنزل الحرفيين وعزبه شلبي ووكاله البلح وتعرف النص الامامي بكام وتشوف ارخص واحد فيهم يعني ممكن يطلع بكلام فارغ وممكن يطلع غالي ده هيبقى عامل اساسي في قرارك هتصلصح ولا هتبيع وعموما برضو حط في دماغك ان العربيه هتاخد في حدود 3 اسابيع تصليح

لو سعر النص ماشي معاك صور العربيه بالمنظر ده واطلع على كام سمكري بس يكونوا معروفين ومفيش مانع برضو تشوف سمير علي هياخد فيها كام(سمير على انضف سمكري فعلا واغلاهم مش عايز اقولك في عنده بورشات بتتصلح) بس ابعد عن مراكز الصيانه لاني شايف ان مصنعيتهم غاليه جدا جدا بس مفيش مانع تعرف مصنعيته هتبقى كام برضو

وعلى هذا الاساس تشوف يناسبك تبيع ولا تصلح

اولا : شكرا لحضرتك على الرد الموضح ده و فعلا كلام مفيد

ثانيا : العربية دلوقتى فى مركز صيانة اسمه (رالى موتورز ايجيبت) عندنا فى 6 اكتوبر

و المهندس اللى بيعمل المقايسة لسة هيبعتها بكرة و المفروض هيبقى فيها التكلفة بس لما كلمتة النهاردة بسألة على النص تكلفتة كام قالى 5 الاف جنيه (تكلفة الصاج كامل من غير العفشة) و سألتة على موضوع الفتيس و الموتور قالى دول لما افكهم هعرف ايه بالضبط اللى اتكسر او باظ فيهم فقولتله يعنى مش هيتغيروا بالكامل قالى لأ و بصراحة انا مش فاهم يعنى ال 5 الاف جنية دول يبقوا تمن الكبوت و الرفرفين و الاكصدام و فردتين الشاسيه بس ولا فيه حاجة كمان انا مش عارفها ؟؟

ايه راى حضرتك فى الكلام ده؟؟ و اسف لو طولت عليك بس انا فعلا لسه جديد و مش بفهم اوى فى الحاجات دى :b4_611:

**حماده المصري** · 12-07-2011 08:22 AM

ياباشا معاك للسنه الجايه ابعتلي نمرتك على الخاص ممكن انزل معاك مره انا بنزل اكتوبر كتير اوي وبفتح مشروع هناك كمان

انا اعتقد ان السعر ده شامل المتور والفتيس كمان لان متور البونتو استيراد ب 2 الف اخره والفتيس كبيره اوي الف

وعموما الاستيراد لما تنزل تشتري كبوت لوحده ولا فانوس لوحده يبقى غالي انما لما تشيل نص كامل على بعضه يبقى واقع عليك رخيص

بس اسال برضو عليه الاول في اماكن تانيه عشان تتاكد وممكن يكون السعر اللي اداهولك من غير المتور والفتيس ولو هتفكر انسى انك تاخد نص ناقص حاجات تحاول باكبر فرصه انك تاخد نص كااامل متور بفتيس بطرمبات وباور وردياتير عشان متتسحلش في مشاوير حاجات العربيه الا المره دي وبس

زي ماقولت لك في طريقتين يلحم الشاسيه الجديد وكده ده معرفش ايه نظامه مع المرور بس اكيد هما عارفين

وفي طريقه استعدال الشاسيه ورشه ودي حلوه برضو وبرضو لما تجيبلها نص كامل اوفرلك وانجز لك من انك تقعد تشتريها على كزا مره

بس والله زي ما قولت لك اهم حاجه ليك دلوقتي مترميش دماغك للناس انزل بنفسك الاماكن الي قولت لك عليهاو اعرف سعر النص كامل بالمتور بكام وفاضي بكام في واحد في الهرم اسمه الحاج سوسو وفي واحد بعديه فعلا من كبار الاستيراد عندهم عربيات مهووووووله هوه بالضبط في الطريق الي بيوديك على الدائري من الهرم وانت نازل من اكتوبر ولما تدخل الهرم بالضبط بعد مشغل تسال على فندق مينا بالاس(هوه فندق معفن عموما ) تدخل الشمال اللي بعده علطول وتمشي فيه لحد ما تلاقي الحاج سوسو على يمينك واسال واعمل حسابك انه لازم يخلي عليك كام الف جنيه بس انت بشطارتك وكلامك حوارات تعرف نزل الكام الف دول وهو هينزل معاك لان بالنسبه ليه انه يخلص من نص دي صفقه حلوه جدا

عموما عشان ترتب افكارك وانت نازل تكتب في ورقه

نص كامل بكام(صاج كامل اتنين رفرف وكبوت واكصدام وفوانيس ومتور وفتيس وكل ملحقاتهم من باور وطرمباتوتكييف ومراوح ) والعفشه الدوشمتين كاملين بالفرامل بالطنابير والكبالين والمقصات والميزان وجوز مساعدين كاملين بالسوست والبطاحات وعلبه الدركسيون) تكتب الكلام ده في ورقه ده النص الكااااااامل تماما مش ناقصه اي حاجه خالص مش هتنزل بعده تجيب مسمار للعربيه تاني الا كلام بسيط

تكتب الكلام ده في ورقه وتنزل بتوع الاستيراد تشوف بقى بكام وناقص ايه من دول ولازم تاخدلك كده لفه حلوه يوم في الحرفيين من الصبح وعزبه شلبي ولو جابك الوقت تروح وكاله البلح بس العالم دي بتقفل بدري وشوف الحاج سوسو في الهرم ان شاء الله تلاقي عنده

وعموما لو لقيت نص بدون العفشه العفشه بتتجاب برضو استيراد واسال عليهم لما يقولك نص من غير عفشه اسال العفشه كامله بكام ولازم ذكاء معاهم بجد لازم لانه لو هيستهبل هيحسب عليك الدوشمه الواحده 500 والمساعد الكامل 500 يعني 2000 جنيه ده غير علبه الدركسيون مش اقل من 1000 جنيه واكيد عندك علبه الدركسيون بتاعتك شكرا عليها غير الكبالن كامله الاتنين في رنج ال 500 برضو وغير المقصات وغير الميزان لو عربيتك فيها ميزان امامي

بس برضو لازم تبقى عارف ايه من المركز المفروض يتغير يعني الدوشم ممكن تكون سليمه والكبالن ممكن تكون رحلت

بس اكيد المساعدين بايزين والمقصات وعلبه الدركسيون شكرا ليهم

وانت بتتكلم مع بتوع الاستيراد لما يقولك سعر تقوله وجب معايا ممكن يقولك طبب بس لما تيجي والكلام ده فكك منه تقوله اديني اخرك في السعر كام من الاخر واعمل حسابك تنزل النص او اقل من نص السعر بشويه ووانت وشطارتك في الكلام

معلش انا مش مرتب افكاري في الكتابه لاني كل اللي بفتكره بقوله علطول واعرف برضو نهائي من المركز هي العربيه محتاجه ايه بالضبط من العفشه والنص الامامي وهيصلح ازاي هيستعدل الشاسيه ولا هيلحم النص الاستيراد