الموضوع: أعرف عن - نظام العادم ، الديفيل ،، التحسينات لنظام العادم !!

آخر حاجة وقفنا عندها كان الباك بريشر !! كنا عايزين نعرف أثره !!

طيب ،، بسم الله نكمل ،، :)

أيه علاقة الباك بريشر بأداء المحرك ؟؟

علشان نعرف كده ،، لازم نعرف حاجة ،، معظم الناس "و أنا من ضمنهم" كنت فاكر أن الموتور لاااازم علشان يدي أداء كويس و عززززم عالي ،و ادااء عالي عامةً ...، يبقى لازمله باك بريشير ...

في الحقيقة الكلام ده طلع مش صح ،، بعد مدورت و بحثت في أكثر من حته فعلاً ،، لقيت ان ده مش صح ...

في الواقع علشان الموتور يشتغل كويس و يدي أداء حلو ،، الموتور محتاج يتوفرله حاجتين
"تقدرو تعتبروها المعادلة السحرية"
1-باك بريشير قليل ،، "علشان كده انا وضحت قبل كده ان الباك بريشير بيستهلك جزء من شغل و الطاقة الي خارجة من الموتور"

2-سرعة تصريف كبيرة لدخان العادم بحرية !! ،، و حط تحت حرية دي 100 خد ،، معنى كده ان شيء مهم بالنسبة ليا اني اقلل ممانعة خروج العادم "الأمر الي بيؤدي بدورة لزيادة سرعة خروج العادم" ...
====================
تعالو نفهم بقا !! ....
ببساطة ،، دخان العادم في انبوب العادم ،، لما بيخرج بسرعة ،، و بدون ممانعة ،، ده بيقلل بيعمل زي خلخلة ورا المانفولد بتاع العادم نفسه ..الأمر الي بدوره بيخلق منطقة ضغط منخفض ورا فالف العادم الي في السليندر .. بالتالي ،، مجرد مبيفتح الفالف بتاع العادم في شوط أخراج العادم من السليندر ،، نواتج الأحتراق الي في السليندر بتخرج ،، و بتفضي السليندر ،، و بتسيبلي السليندر خالي من غازات نواتج الأحتراق ،، و بيكون خليط الأحتراق الي بيدخل العادم بعد كده ،، نقي،، فبيديني طاقة اعلى كناتج حرق ،، زي موضحت قبل كده في جزئية خليط الأحتراق النقي و المخفف ،، ...
=============
طيب هل معنى كده أني ممكن اوسع القطر بتاع انبايب العادم بتاعتي ،، و فيها أيه يعني ؟؟ منا عايز أزود حرية خروج العادم !!

للأسف يا سيدي الفاضل ،، زي مقولنا .. الحلو مبيكملش !! لأن حركة زي كده ،، لازم يكون ليها حساب ؟؟

طيب حساب ايه ؟؟

أقولكم أنا ... ببساطة !! و بدون تعقيد في الأمور ،، ... سريان المائع داخل أنبوبة ،، بيكون محكوم بظروف معينة ،، و ليه ظوابط .. مش سبهلله .. طيب بفرض اني عايز ازود سرعة خروج المائع "العادم" ؟؟

سهلة ،، شيل اي حاجة مكمن تمنع و تعيق و تبطئ خروج العادم ،، طيب فرضأ عايز أزود أكتر .. ليه موسعش قطر الماسورة !! .. أقولك انا ليه لا ؟؟ لأن لما قطر الماسورة بيزيد ،، سريان المائع مش بيكون سلس

سريان المائع يا اخواني نوعين

1-laminar
2-turbulent

اما الأول فهو سريان طبقي للعادم ،، بدون دوامات ،، ولا عرقلة في مسار العادم
اما التاني فهو العكس !! حيث يكون فيه دوامات و أضرابات كتيرة في مسار المائع
من غير تعقيدات كتيرة ،، ممكن المائع الي ماشي "لامينار" ده احوله "تيربلانت " بزيادة السرعة ،، أو ممكن بزيادة القطر ،، بس كل ده مش اعطباطاً ،، ده ليكون بحساب !!

في حالة العادم ،، غازات العادم بتطلع على هيئة نبضات !! ... لما القطر بيوسع ،، النبضات دي بتكون دوامات جوا انبوبة العادم !! و بالتالي بيبطأ سرعة خروج العادم من الجاكمان !!

هو أي نعم بيعمل باك بريشير قليل على الموتور !! بس في نفس الوقت حيقلل سرعة خروج العادم ،، بالتالي المعادلة السحرية بتاعتنا متححقتش

~~~~~~~~~~~~~~~

طيب ازاي احققها المعادالة دي ؟؟!!!!!

تتحقق بــ... :-

1-أني أحاول بقدر المستطاع أخلي مسار انبوب العادم مستيقم ،، بدون ألتفافات و كده !!
2-أشيل اي عوائق لسريان العادم "علب كاتم الصوت"(أوععععععى تشيل علبة المحول الحفزي ..حرام عليك متبقاش اناني و تأذي غيرك !!!!! )
3-أنك تحافظ على قطر الأنبوب بتاع العادم زي مالمصنع منزله ،، لا تزود ......ولا تقلل أكيد !!
و لكن آخر شرط ده ليه أستثناء !! و ده بيكون في حالة المحرك الي مزود بشاحن تربيني "تربو " او المحرك الي مزود بنظام حقن نيتروس ...

لأن المواتير دي بتطلع كمية غازات كتير اوي و نواتج احتراق اكبر اوي بالمقارنة بالمواتير العادية الغلبانة زي حالاتنا !! فبتكون عايزة انابيب اكبر تنفخ فيها غازات الأحتراق دي ....
======================
بعد كده لقيت شويت أرقام كده ،، انا مش متحقق من صحتها ،، لكن من الواضح انه الموقع الي لقيتها عليه متأكد منه ،، عامةً هو بيقارن بين أنظمة العادم في حالة
1-عربية عادية خالص
2-عربية معمولها نظام عادم رياضي
3-عربية سباقات !!
فبيقول أن في العربيات العادية الباك بريشير بيعمل بيوصل كحد أقصى 18 PSI
"psi" ده وحدة لقياس الضغط
اما في الربيات بتاعت الشوارع زينا،، الي بيكون معمولها نظام عادم رياضي ،، بيكون الباك بريشير يتراوح من 2 ألى 6 PSI
أما في حالة عربيات السباق ،، بيتراوح من 1 الى 3 psi !!

طبعاً الفرق وااااضحححح
============================
نيجي بقا نتلكم في لب الموضوع !!

كاتم الصوت الرياضي "الديفيل !!"

عارفين كاتم الصوت بتاع المسدس ؟؟؟ الطويل ده المخرم !!

هوا ده بظظظظظظبط الديفيل ،، وظيفته كتم الصوت ،، و مخرم زي كاتم الصوت بتاع المسدس

و في نفس الوقت مفيهوش الممانعة الكبيرة أوووي الي بتبقى في علب كاتم الصوت العادية ،،

بس للأسف الحلو ميكملش،، لأن ده بيكون مصحوب بنخفيض للصوت اي نهم ،، بس مش بيكون بنفس جودة كاتم الصوت الأصلي بتاع العربية !!!

معلش ،، بس في المقابل بقا عندك اداء أحسن !!


دي صورة لكاتم الصوت الي في عربياتنا عادي !!
بالترتيب من الشمال لليمين
1-دخول العادم
2-حجرة لأمتصاص الأهتزازات النابعة من سريان العادم تحت ضغط
3-المنطقة الي بيتم فيها أنتقال غاز العادم من أنبوبة الدخول ألى فتحة الخروج من علبة كاتم الصوت !!
======================
طبعاً ليكم ان تتخيلوا مقدار المقاومة الي بيعاني منها غاز العادم و هو خارج ،، بالتالي كمية الباك بريشير و بطئ خروج العادم

أيه ؟؟ مش متخيلين الفرق بينه و بين كاتم الصوت الرياضي ؟؟

طيب الصورة دي ممكن توضحلكم الفرق أكتر


و كما قالت المقولة الشهيرة "صورة خيرٌ من ألف كلمة"

طبعاً مقدار الممانعة الي أتشالت من مسار خروج العادم بيان و واضح أوي !!!

========================================
طيب يا ترى كاتم الصوت الرياضي ده ،، بيتصنع من أيه ،، و هل ممكن أعمله ولا لا ؟؟ و ازاي ؟؟ و امتى يكون ليه صوت ،، و امتى لا ؟؟ و هل ممكن يكون فيه أنواع تقلل الأداء و تكتم الماتور وكاني يا أبو زيد ما غزيت ولا كاني شيلت كاتم الصوت الأصلي ولا ؟؟

طيب يا ترا لو صوته واطي و عايز اعلي صوته ... اعمل كده أزاي ؟؟

طيب يا ترا لو صوته عالي و عايز أكتم صوته أعمل أيه ؟؟

طيب أزاي أعرف من قبل مشتريه و أجربه و بالتقريب هل صوته عالي ولا ؟

كل ده ان شاء الله حنعرفه في الجزء القادم من الموضوع ..

يتبع أن شاء الله :)