الموضوع: نقل ملكية سيارة مستعملة

الحمد لله نقلت ملكية عربيتي من كام يوم و عايز أقول على الخطوات عشان لو حد عايز يستفيد
أنا عربيتي ماتريكس 2006 و كنت بنقلها من مرور النزهة لمرور العجوزة و كانت الرخصة منتهية و النمر بتاعة مرور النزهة كانت حروف و أرقام
قبل ما تتحرك لازم يكون معاك بطاقتك +الرخصة + التوكيل و صور من كل دول, إحتياطي خد صورتين من كل واحدة و دوسيه كبير تحط فيه الورق
1. أول خطوة رحت مرور النزهة بدري (الساعة 7:50) هم بيشتغلوا من الساعة 8 و طلعت شهادتين بيانات واحدة موجهة للشهر العقاري عشان تسجل بيها (لأن الرخصة منتهية) و واحدة موجهة لمرور العجوزة
وأنا بطلع الشهادات دفعت 230 جنيه في الخزنة أنا كنت فاكرهم رسوم الشهادات لكن طلعوا الضريبة لمدة سنة واحدة
لو عايز تدفع ضريبة أكتر من سنة قول للموظف عند الخطوة دي عشان أنا ما كنتش أعرف و محبيتش بعد كده ألخبط الورق بتاعي
2. تاني خطوة جبت بيان صرف لوحات, أنا مش فاهم ده بتاع إيه بالظبط بس عشان أطلع شهادة المخالفات لازم تقدمه مع الرخصة
3. طلعت النيابة و قدمت الرخصة و بيان صرف اللوحات و التوكيل, خد بالك إن لازم تقدم أي مستند رسمي فيه الرقم القومي بتاع المالك الأصلي وده كان في التوكيل اللي معايا,
الحمد لله خلصت الساعة 9:30 يعني الموضوع خد ساعة و نص بس المهم تكون في المرور قبل الساعة 8
كده خلصت مشوار مرور النزهة و بقى معايا شهادتين بيانات+شهادة المخلفات, على فكرة شاهدة المخالفات كانت لمدة 15 يوم بس
يا ريت أي ورقة تطلعها تصورها لأني إحتجت صورة شهادة البيانات في الشهر العقاري
4. بعد كده رحت الشهر العقاري سجلت و مخدش وقت الحمد لله, دفعت 1100 جنيه و خدوا شهادة بيانات و خرجت معايا التوكيل + العقد المسجل + وصل فلوس التسجيل (موظفة الشهر العقاري قالتلي إنه مهم جدا و هايخدوه في المرور إوعي تضيعه)
خلصت كده مرور النزهة و الشهر العقري و رحت مروح لأني كنت عايز أروح المرور بتاعي من بدري
على فكرة أنا رحت يوم السبت و ده أزحم يوم بس لو رحت الساعة 8 هتلاقي المرور فاضي و هتخلص بسرعة إن شاء الله
سألت في التليفون على مرور العجوزة إشتغل ولا لسه لأنه كان إتحرق بعد الثورة لقيته لسه في بين السرايات
5. السبت اللي بعده كنت في مرور بين السرايات الساعة 8 الصبح, مكان الفحص كان بيفحص للعجوزة و بين السرايات مع بعض, إشتريت ورق فحص سنة 35 جنيه و فحصت, كل اللي حصل إن جه واحد خد رقم الموتور أو الشاسيه و بعدين جه واحد تاني فحص الطفاية و كل واحد راح كاتبله كلمتين في الورق اللي معايا بعد كده إشتريت شنطة إسعافات و مثلث ب 75 جنيه (تاخد وصل تحطه مع الورق) و بعدين المهندس مضي الورق و رحت ماضيه من الظابط اللي في وحدة الفحص, كده الفحص خلص بس ناقص تختمه من ظابط تاني اللي هو رئيس الوحدة
6. رحت أمنت سنة واحدة بردو و دفعت 108جنيه و بعدين فكيت لوح الأرقام و خليتهم معايا عشان معدش طالع نازل
7. طلعت على مرور العجوزة و سألت قالولي لو هتنقل ملكية تطلع مرور الدقي (الدور اللي فوقيه) رحت طالع سألت هوديه فين, طبعا مفيش علاقة بين اللي مكتوب على الشبابيك و اللي إنت بتعمله, المهم واحد خد مني الورق و قاللي روح سجل البطاقة في شباك كذا رحت و رجعتله تاني قعد يكتب حبة بيانات هو و موظف تاني و بعدين إداني ورقة سلمت بيها النمر القديمة ختمتها ورجعتله إداني ورقة تانية ب 145 جنيه دفعتهم في الخزنة
8. بعد نص ساعة إستلمت الرخصة بحمد الله و رحت مخزن اللوحات إستلمت اللوح الجديدة بالرخصة الجديدة
و طلعت جبت واحد ركب لي النمر (موجودين كتير) و خد 10 جنيه وأنا موجود لأي إستفسار و تحياتي للجميع

ال 1100 جنيه دول رسوم التسجيل في الشهر العقاري, كل عربية بيتحسب رسوم تسجيلها حسب الماركة و سنة الصنع, كان في جدول طويل كده مع الموظفة بصت فيه و حسبت المبلغ