الموضوع: كيفية الكشف عن الجير الاوتوماتيك عند شراء عربية مستعملة

أنا لاقيت الكلام ده في منتدي اجنبي .. حبيت انقله هنا للاستفادة.


طرق الكشف عن الجير الاوتوماتك:



1- وانت عال N هات ال D المفروض تحس بالتعشيق في اقل من ثانية .. لو التعشيق اتاخر يبقي الجير مش مظبوط.

2- جرب نفس الكلام من ال D لل R وارجع لل D مباشرا ... شوف هيتاخر في التعشيق ولا لأ,. الكلام ده كله وانت كابس الفرامل طبعا.

3- امشي بالراحه خالص .. يعني دوس بنزين بالتدريج الممل وعلى اقل من مهلك لحد ما توصل لسرعه 25 35 كيلو كده .. المفروض تحس ان العربية غيرت تلت مرات .. من الاول للتاني .. ومن التاني لحركة انغلاق lock لل torque convertor .. ومن lock للتالت . والمفروض ما تحسش باي رزعه او خبطه فالتلت غيارات دي نهائي.. وخلي بالك رزعات الغيارات ما بتظهرش وانت دايس جامد بنزين .. فامشي بالراحة خالص.

4- وانت على سرعة 30 مثلا .. اكبس بنزين بسرعة .. لو الجير سليم هيعمل كيك دون وتلاقي الار بي ام علي.

5- بالراحه خالص عالبنزين وبالتدريج الممل برضو .. شوف الجير هينقل مثلا من التاني للتالت عند سرعه كام .. ارجع شيل رجلك تدريجي خالص لحد ما يرجع ينقل عالتاني .. وقارن السرعتين .. المفروض النقل العكسي يبقي عند سرعه اقل 10 كيلو من النقل الاعلى. يعني لو غير من التاني للتالت عند 30 .. يبقى المفروض يغير من التالت للتاني عند 20.

6- في اي سرعه بعد torque convertor lock - واللي بتحصل تقريبا في نص التاني ... العلاقه بين RPM والسرعه علاقه خطيه طرديه داخل الغيار الواحد... لو في لحظه لاقيت ان RPM بيعلى مثلا وانت دايس بنزين والسرعه ثابته ما بتعلاش ... يبقى الجير في مشكله على طول. وبالعربي بيفوت.

7- وانت على 60 او 70 .. شيل رجلك من ع البنزين ... وافتح ال overdrive .... الجير الصح لازم يعمل غيار اعلي اوتوماتيك ... وارجع تاني واقفل زرار اال overdrive .. الجير لازم ينقل للسرعه الاقل اوتوماتيك ... ماعملش كده يبقى معيوب.

8- اخر حاجه اعمل الكلام اللي فوق ده مره والجير بارد ... الصبح مثلا ... ومرة والجير سخن ... بعد مشوار طويل. وفي الحالتين الجير الصح هيعمل الصح.

9- لو عملت كده وكله تمام .. أدعيلي في سرك وتوكل عاللة.