الموضوع: صيانة الألف للشارك في دايموند موتورز

السلام عليكم جميعا
و كل عام و حضراتكم بخير
و رمضان كريم عليكم كلكم

انا معايا لانسر EX اللي هيا الشارك موديل 2009
العربية عملت الالف كيلو و عديتها كمان

كنت محتار الصراحة اعمل الصيانة في قليوب ولا اعملها في دايموند موتورز التوكيل الجديد

التوكيل الجديد لسه ما اعلنش عن نفسه رسمي و عمل افتتاح رسمي ,فقولت اكيد معندوش صيانة لسه

المهم قولت اروح بعد الشغل,اشوف النظام ايه في التوكيل الجديد و اعرف منهم حيبدأوا امتى و اخبار الصيانة و كده و لو معندوش صيانة اروح قليوب

روحت التوكيل الثلاثاء الموافق 19/7/2011
دخلت و سألت على مسئول الصيانة,رجل الأمن وجهني للمسئولة عن خدمة العملاء او ال customer relation

الصراحة الاستقبال منها او من رجل الأمن كان في منتهى الذوق و الاحترام
المهم قولتلها اني عاوز اعمل صيانة للعربية و اخدت مني الرخصة عشان تأخد بيانات العربية من رقم الشاسيه و الماتور و هكذا
و قالتلي احب احجز امتى,,قولتلها الخميس الموافق 21/7/2011
قالتلي اوك و حيبقى يوم الخميس الساعة 10 ان شاء الله و استنى مني تأكيد يوم الأربعاء,قولتيلها اوك
و مشيت

جه يوم الأربعاء و محصلش اتصال منها الصراحة او من التوكيل عامة
جه يوم الخميس الصبح و قولت اتصل بيهم اشوف النظام ايه
اتصلت و حولوني عليها,,قولتلها اني كنت عامل حجز النهاردة (يوم الخميس),و عاوز اتأكد من الحضور او لا
سألتني على الاسم و نوع العربية و قالتلي حتصل بحضرتك كمان 5 دقايق,تأكد عليا,,قولتلها اوك
فعلا مفيش 5 دقايق و لقيتها اتصلت بيا و قالتلي اتفضل حضرتك تعال و ان هما اسفين جداا انهم ما اتصلوش بيا يوم الأربعاء عشان يردوا عليا بالتأكيد سواء بالرفض او القبول للحضور

اخدت العربية و روحت التوكيل و كان الطريق فيه زحمة شوية في الوصلة الجديدة و ده اخرني حوالي ربع ساعة او تلت ساعة عن الميعاد المحدد و هو الساعة 10

ركنت العربية بره,قدام التوكيل و دخلت جوه,و رحتلها,
الاستقبال منها برده كان في منتهى الاحترام و الذوق
و اعتذرت ليا عن عدم التأكيد للحضور
و عرفتني على المهندس أحمد اللي حيستلم عربيتي,المهندس أحمد برده في منتهى الذوق و الاحترام

اخد مني الرخصة عشان بيانات العربية برده من رقم شاسيه و ماتور و موديل العربية و اللون
و هو استغرب من موديل العربية انها 2009,,و انا فهمته القصة
و كمان اخد كتيب الضمان,بس كان فيه حاجة مكنتش في بالي و هو ان صيانة الألف المصنعية بتاعتها مجانا عند المصرية(الوكيل القديم),المهندس قالي اني حدفع ثمن المصنعية عشان مجانا عند المصرية بس
قولتله ماشي و في نفس ما كان بيقولي على ثمن المصنعية,كان فيه مهندس واقف معاه,محترم جداا و ذوق جداا,(الصراحة معرفتش اسمه,بس المرة الجاية ان شاء الله حعرف اسمه لانه كان مشغول و معرفتش اكلمه)المهم المهندس اللي كان واقف ده,قال للمهندس احمد,متكتبش فلتر الزيت عشان ميحسبش عليه
و انا حدهوله مجانا من عندي
الصراحة شكرته جداا على ذوقه
المهم المهندس احمد طلع معايا و شاف العربية و شيك على العربية من خلال ورقة الأمر اللي قدامه,كان فيها حاجات بيعلم عليها صح,زي مثلا ان الاشارات شغالة و ان التكييف شغال و هكذا و بعد كده يشيك على العربية عشان لو فيها خبطة او خربوش و هكذا
اخد العربية و دخلها الورشة و قالي الوقت حيكون ساعتين ان شاء الله
اقعدت في صالة انتظار العملاء و الصراحة المكان نضيف جدااا و كمان حيجيبوا بلاي ستيشن قريب جدااا
الصالة وسعها كويس و فيه كمان زجاج تبص منه على الورشة على عربيتك و هما شغالين فيها

العربية اتغيرلها زيت 10 الف كيلو(زيت توتال) و فلتر زيت و اتغسلت

دفعت الفلوس و استلمت العربية,العربية ما شاء الله
صوت الماتور بقى اهدى,العفشة اتربطت و هما شيكوا على العربية كلها

الصراحة طلعت سعيد جداا,اولا باستقبال الناس كلهم
من احترامهم و ادبهم و ذوقهم
ثانيا,ان العربية طالعة ما شاء الله كويسة جداا
متحسس بفرق عن الاول الحمد لله

اسف للاطالة و اي خدمة انا تحت امركم