أخبار النمر الجديدة فى مرور العجمى إيه؟

**mabdelaziz** · 02-08-2011 01:35 PM

السلام عليكم

كنت رخصت عربيتى فى مرور العجمى بعد الثورة, والوحدة دى كانت اتحرقت وعشان كده كانوا بيطلعوا نمر قديمة ويدوا تصاريح, وأنا أخدت تصريح 6 شهور ينتهى فى 15 أغسطس إن شاء الله.

ياريت أى حد فى نفس الظروف وراح مرور العجمى قريب يشرح لى المفروض إيه اللى يحصل؟
هل خلاص بقوا يطلعوا نمر جديدة ولا تصاريح تانى؟
وهل ينفع أروح قبل يوم 15 ولا لازم أروح يوم 15 بالتحديد؟
وياريت لو فى مصاريف تانى فى الموضوع عشان أبقى عارف وعامل حسابى

كل سنة وانتم طيبين

وشكراً

**mabdelaziz** · 04-08-2011 02:55 AM

يارب ألاقى إجابة قريب

**mohamed2002** · 04-08-2011 03:02 AM

الامور غير مستقرة وغالبا طالما الوحدة اتحرقت يبقي حيقولو لك تعمل ملف جديد وربما تفحص من جديد والله اعلم

**mabdelaziz** · 04-08-2011 04:09 PM

العربية كانت زيرو وكده كده فحصت وعملت ملف جديد, والكلام ده كان فى شهر فبراير وأخدت تصريح ب 6 شهور
مشكلتى مش فى الفحص ولا الملف, أنا عاوز أعرف هل بقوا يسلموا نمر جديدة ولا لسه, ولا حيدونى تصريح تانى؟
وهل فى مصاريف تانى ممكن أدفعها ولا كده خلاص؟

**Tarek_Swelm** · 08-08-2011 03:19 PM

انا برضة نفس الموضوع بس مرور محرم بك و ادوني 3 شهور و الكمبيوتر و النمر الجديدة اشتغلو تاني و بعد كدة وقفوهم تاني
واحد قالي حتروح المرور يختم علي الرخصة الكارتون المؤقتة بمدة اطول و خلاص بس انا مش عارف الكلام دة صح ولا لأ

**mabdelaziz** · 10-08-2011 06:04 PM

المشاركة الأصلية كتبت بواسطة tarek_swelm

انا برضة نفس الموضوع بس مرور محرم بك و ادوني 3 شهور و الكمبيوتر و النمر الجديدة اشتغلو تاني و بعد كدة وقفوهم تاني
واحد قالي حتروح المرور يختم علي الرخصة الكارتون المؤقتة بمدة اطول و خلاص بس انا مش عارف الكلام دة صح ولا لأ

أشكرك لردك على السؤال
الموضوع فعلاً مش واضح وأنا كان نفسى أبقى عارف إيه اللى هيحصل عشان أكون عامل حسابى وعارف الوقت المتوقع لتخليص المهمة دى قد إيه
عموماً أنا رايح إن شاء الله يوم 16 وياخبر النهارده بفلوس بكره يبقى ببلاش

**Tarek_Swelm** · 13-08-2011 01:37 PM

السلام عليكم , ازيك يا باشا
انا روحت النهاردة مرور محرم بك و قدمت الرخصة الكرتون و قالتلي هات اذن صرف من كشك التصوير و دفعت 125 جنية تمن النمر الجديدة و استنيت ساعة و بعد كدة اخدت الرخصة الجديدة بالكمبيوتر و روحت مخزن اللوحات سلمت القديمة و اخدت الجداد
بس خد بالك فية ناس تانية طلبوا منهم شهادة مخالفات , لو تحب تخليها معاك احتياطي هاتها احسن .

**mabdelaziz** · 13-08-2011 02:33 PM

ألف مبروك النمر الجديدة ياباشا :)
أشكرك على التفاصيل المهمة دى, وخصوصاً ال 125 جنيه عشان العملية اليومين دول على الشعرة زى ما بيقولوا :)

سؤال بس عشان الوقت ملخبط معايا شوية, التصريح بتاعى يخلص يوم 15 أغسطس إن شاء الله, يبقى المفروض أروح امتى؟ لازم يوم 15 ولا لو رحت يوم 16 يبقى فيها غرامات أو مشاكل؟

**Tarek_Swelm** · 14-08-2011 02:53 PM

انا تصريحي كان ميعادة يوم 13 و روحت 13 ,اعتقد انك لو روحت قبلها بيوم او اتنين مش مشكلة
ربنا معاك ان شاء الله

**mabdelaziz** · 16-08-2011 06:47 PM

رحت النهارده يوم 16, يعنى تانى يوم انتهاء التصريح.
زودوا المدة 6 شهور تانى على نفس التصريح, وبدون أى مصاريف, والسبب مفيش نمر جديدة لسه فى مرور العجمى.