عملت صيانة ال5000 وياريتنى ما روحت التوكيل

**Mohamed.Ramah** · 18-08-2011 12:13 AM

اولا السلام عليكم ورحمة الله

ثانيا انا بعد يوم متعب فى التوكيل ابو رواش طريق مصر اسكندرية قبل داندى مول لعمل صيانة لسيارة قريبى نيو اكسنت 2011 وحدث الاتى مع انى نصحتة بلاش وهو صمم اللى حصل كانت بداية غير مبشرة وهرجلة وبطىء فى كل شىء من اول اجراءات الاستلام العجيبة واللى كانت مش مبشرة من البداية اولا بعد الدخول اماكن الانتظار وطبعا زحمة جدااا واول ما دخلت لمهندس الصيانة لاقيت واحد بيزعق علشان كان بيشتكى ان الاكسنت الrb لسة شاريها وواضح ان الموتور طلع بايظ وطبعا زعيق وجو توتر دخلت وانا متردد وبعد الذهاب لاملاء البيانات جة معايا المهندس وبعد اما شاف العربية كتب بيانات وقالى بالحرف خد الطفاية والولاعة لا تتسرق وشيك على حاجاتك وشيل لو فى حاجة مهمة الصراحة استغربت من الكلام دة هو انا داخل فين بالظبط !!! وبعدها قالى سيب المفتاج بقى فى العربية وخش ارتاح !!!! حاجات غريبة طب فين اللى حيستلمها لا ارتاح وفى حد حيجى ياخدها طبعا انا فضلت كل شوية اتابع اطلع واسال مفيش حد اخد العربية بعد اكتر من نص ساعة وانا سايبها مفتوحة وكمان المفتاج فى الكونتاكت موضوع مقلق فين وفين لما حد جة اخيرا اخدها قولت الفترة دة ادخل صالة عرض السيارات وحقيق لاترتقى للبنى ادمين حتى العربيات المعروضة مفصولة كهربتها وفى اللى بطارية متشالة منها !!! مش فاهم ايدة وشوفت العربيات المعروضة وكانت لا ترتقى للسعر المدفوع فيها وذهلت حقيقى لما شفت هيونداى سانتافية ب 525.000 وفاضية والانريور مثل الموجود ب i30 بدون اى اختلافات اتقفلت من العربية قولت يعتبر دة اعلى عربية معروضة وبالمنظر دة وكمان الجنوط بلاستيك !!! وكراسى مش كهرباء حتى طب على اية بقى السعر دة مدام حاجات بسيطة زى دة مش راكبة انا خفت لا تكون 2 زجاج كهرباء فقط !! خرجت وانا محبط وطلعت علشان اقعد فى الدور الاول وعلى اساس فى امكانية انى اشوف العربية وهى بيتعملها صيانة ولاكن كان الوضع غير مستحب زحمة وفى ناس قالعة الشوز وممددة على الكنب والكراسى وفى اللى نايم !!! فين وفين لما لاقيت مكان اجلس فية وبعد اما ندة اسمة ونزلنا نستلمها كانت الساعة 1.5 وانا رايح الساعة 10.5 التوكيل !! عمرى ماشفت بطىء زى دة فى كل الاجراءات نزلت وادور بقى على العربية فى مكان الانتظار مفيش نص ساعة من البحث فى الداخل على العربية لحد ما خلاص بجد فقدت الامل انى اشوف العربية تانى طبعا اتطلب انى لازم ادفع الاول واجيب وصل بدة بعد ذهابى مرة تانية علشان ندفع الاول !!!! مش المفروض اخش اشوف عملو اية ولا اية فى العربية لا مفيش لازم اخش ادفع الاول واجيبلة ورقة بالدفع وبعدها ادور على سواق بعد اما اسلمة ورقة يفيد بيها انى دفعت علشان يخش يجيبلى العربية مش عارف اية الاسلوب الغريب دة فى التعامل ولما طلعت بوصل الدفع ولاقيت سواق واخده منى دخل ومطلعش بالعربية وانا خلاص بجد اتشليت الجو حر وصيام سالت الامن قالى انت كل دة لسة مجابوهاش وطلع زوق وطلب منى الرخص ودخل جابها !!! طبعا مشاكل تانى وزعيق عند مكان الاستلام كل شوية زعيق وخناقات وشكوى كثر من الناس اللى واقفة مستنية عربياتها وملت زي واخيرا جت العربية بعد نص ساعة تانية ومشيت من التوكيل وانا حالف لو ادونى فلوس مش حعتبة تانى وهنا بقى بعد اما خرجت وابتديت امشى بيها ومكنش باين حاجة بسبب الزحمة الشديدة لحد ما جت الفرصة وابتديت اجرب لاحظت الاتى :

1/ البنزين ناقص بصورة ملحوظة من العربية
2/ الراديو ملعوب فى كل محطاتة ومتلخبطة
3/خربشة مكان المفتاح كتيرة جدااا
4/ ودة الاهم العربية بقت مكتومة ومش زى الاول فى السحب
5/فرامل اليد تقلت اكتر من الاول
6/دواسة البنزين يادوب امااضغط عليها بسيط بتعمل كيك دون وطبعا صوت عالى مش زى ما كانت الاول خالص كنت لازم اكبس لاخر الدواسة علشان تعمل كيك دون !!! وطبعا اختلاف فى الاداء مش بتجرى مكتومة
7/مشوار الفرامل بقت استجابتها مش زى الاول خفت وبقت متاخرة بشكل ملحوظ
النتيجة انا ندمت انى روحت هناك بجد ولو حقيم التوكيل حدية (-0) من (2) او( 5) اقصى تقدير لية

وياريت لو حد يعرف مكان افضل يروحة قريبى يعمل فية العربية بعد اللى عملو ة فيها دة ياريت يقول علية واسف على الاطالة وكل سنة وانتم طيبين ...

**Screenplays** · 18-08-2011 12:24 AM

شوف فرع مش رئيسي زي فرع قليوب مثلا بس ايه اللي اتحكي ده ؟ يعني احنا شلنا النظام باكمله مش عارفين نتصرف مع غبور ؟

**TeMoON** · 18-08-2011 03:17 PM

انا حصل معايا فى ابو رواش كدا بردو فى عربية الفيرنا بتاعة جوز اختى وفعلا توكيل سيئ ومابيفهموش حاجة فية فا انت يا تروح الفرع الرئيسى بتاع قليوب او تروح لاى مركز صيانة معتمد زى الى وجود على طريق المطار قبل توكيل جاجوار وانت اجى من الحرفييين فا انا جربت هناك وجربت ابو رواش وجربت قليوب فا نصيحة لو العربية فيها عيوب صناعة روح الرئيسى مفيش فيها عيوب صناعة روح لاى مركز معتمد احسنلك وانضفلك لانى انا هعمل كدا ان شاء الله لان الفيرنا كان فيها عيوب واتصلحت الحمد لله وبعد كدا هروح لاى مركز معتمد احسن

**mshmshm3** · 18-08-2011 06:30 PM

مراكز الخدمة ناس زي الفل ومعاملة غير كدة خالص يتمنوا الرضا ومراكز خدمة هيونداي مشهورة اوي زي مودرن سيرفيس وتكنو وان و غيرهم لكن التوكيل نجحوا في اثبات فشلهم

**Mohamed.Ramah** · 18-08-2011 06:42 PM

شكرا ليكم جميعا على المساعدة جزاكم الله كل خير

**Screenplays** · 18-08-2011 08:07 PM

العفو يا فندم

**Ashraf_Ibrahim** · 19-08-2011 09:29 PM

المشاركة الأصلية كتبت بواسطة mohamed.ramah

1/ البنزين ناقص بصورة ملحوظة من العربية

*المفروض انه في الاستلام بيعملك مؤشر البنزين كان فين بالظبط ومن حقك تشتكي لو لقيته ناقص كتير عن اذن الدخول بتاع العربية!؟

2/ الراديو ملعوب فى كل محطاتة ومتلخبطة

دا مش لعب فيه
هتلاقيهم فصلوا البطارية اثناء الكشف على كهربة العربية او كانوا بيقيسوها او بيعملوا اي حاجة فيها وطبيعي جدا ان المحطات كلها تتلغي

3/خربشة مكان المفتاح كتيرة جدااا

مشتكيتش منها ليه وانت بتستلم العربية؟!

4/ ودة الاهم العربية بقت مكتومة ومش زى الاول فى السحب

ممكن من البنزين على فكرة مش شرط من الصيانة لأن الطبيعي في الصيانة انهم بينضفوا بوابة الانجكشن وبالتالي السحب يكون احسن!

5/فرامل اليد تقلت اكتر من الاول

طبيعي جدا نتيجة رجلاش الفرامل اللي بيتعمل
شوية وهتلاقيها مظبوطة معاك
كون ان فرامل اليد تقيلة دا معناه ان رجلاش الفرامل بتاعك مظبوط

6/دواسة البنزين يادوب امااضغط عليها بسيط بتعمل كيك دون وطبعا صوت عالى مش زى ما كانت الاول خالص كنت لازم اكبس لاخر الدواسة علشان تعمل كيك دون !!! وطبعا اختلاف فى الاداء مش بتجرى مكتومة

منين استجابة دواسة البنزين عالية ومنين العربية مكتومة؟!
مش فاهمها دي معلش؟!

7/مشوار الفرامل بقت استجابتها مش زى الاول خفت وبقت متاخرة بشكل ملحوظ

يا استاذي دا حضرتك لسة قايل فرامل اليد تقيلة
يعني اتعمل رجلاش فرامل
ومستحيل يعمل رجلاش لفرامل اليد وينسى يعمل رجلاش للفرامل الخلفية!

النتيجة انا ندمت انى روحت هناك بجد ولو حقيم التوكيل حدية (-0) من (2) او( 5) اقصى تقدير لية

وياريت لو حد يعرف مكان افضل يروحة قريبى يعمل فية العربية بعد اللى عملو ة فيها دة ياريت يقول علية واسف على الاطالة وكل سنة وانتم طيبين ...

في الحقيقة انا مش شغال في غبور او حاجة
بس انا حبيت ارد على النقاط دي واحدة واحدة
ولو عندك ملاحظات اتصل قدم شكوى او اطلع على فرع غبور وهما هيظبطولك العربية بدون اي مصاريف تانية خالص
انا كنت بعمل كدة !