الموضوع: " ارمي زبالتك قدام الحي "

ركبت مع سواق تاكسي قالي فكره جباره سألت نفسي ازاي الراجل دا مش مسئول و اليكم الحوار كما هو
انا : ايه رايك يا اسطي في اللي بيحصل في مصر و الثوره
السواق : والله يا باشمهندس مقدرش اقولك غير عليه العوض و منه العوض
انا : ليه بس يا اسطي اكيد طبعا علي العوض منه العوض بس ليه متشائم دا مصر بتتغير .
السواق : بص يا باشمهندس صلي علي النبي الاول , الثوره جميله شالت الفساد بس دا القشره انما الفساد وصل لكل حته كل واحد فينا لازم يتحاكم مش بس مبارك انما كمان اللي سابه يبقي كدا قال يا فرعون ايش فرعنك ملقتش حد يردني و انا مش شايف في تغيير
انا : ليه يا اسطي اديك شايف اهو دلوقتي بتمشي براحتك و الشرطه مش بتضايق الناس زي الاول يعني الوضع بيتغير اكيد
السواق : معاك ان الوضع بيتغير انما ابسط الحقوق بتاعتي مش قادر اخدها
انا : بصيت للسواق في ذهول وقولتله ازاي يعني ابسط حقوقك مش قادر تاخدها
السواق : يعني دلوقتي يا باشمهندس اديك مثال اول امبارح كنت بنتكلم مع الناس علي القهوه و قولتلهم مش دلوقتي احنا بندفع فلوس الزباله مع النور و اديكم اهو شايفين الزباله في كل مكان ايه المانع نجيب عربيه نقل و نحط فيها زباله الشارع و نرميها عند الحي طالما هما مش عاوزين ينضفوا الشوارع خلاص نعيشهم ولو يوم واحد من اللي احنا بنشوفه
انا : سكت شويه وقولتله فعلا عندك حق وفجأه لقيت نفسي عديت المكان اللي المفروض انزل فيه فقولتله علي جنب الله يخليك يا اسطي و حاسبته و مشيت

الكلام اللي قاله السواق رغم انه مش مسئول انما كلام مهم و علشان كدا نفسي يوصل لكل الناس و بحلم انه يوم31-12يبقي يوم مختلف علي العشوائيات ولو مجرد بداية ارجوكم ادعوا الناس للحمله و نفذوها و خلونا نغير المستقبل بايدنا و كل المطلوب انك و انت نازل الصبح او بالليل او بأي وقت لو ملقتش صندوق زباله و لقيت الزباله في كل حته قدامك ارمي زبالتك قدام مجلس الحي علشان يتحركوا . احنا من حقنا نعيش احسن من كدا طالما بندفع فلوس علشان الزباله ليه بنشوفها في وشنا ولا هي اتكتبت علينا يعني ولا ايه . ليه ميبقاش كل احياء القاهره و احياء مصر كلها زي حي جاردن سيتي ايه المانع يعني واللي فاكر ان دا مستحيل اسأل اهل محافظة قنا ازاي قدر عادل لبيب المحافظ السابق انه يحول قنا لقطعه من اوروبا بامكانيات بسيطه الموضوع مش محتاج اجتماعات و دراسات و اجندات ومفيش تغيير و انما احنا نجبرهم علي التغيير و دا ابسط حقوقنا و اكرر تاني من فضلك لو ملقتش صندوق زباله قدام بيتك
" ارمي زبالتك قدام الحي "

انا من حقي احلم و من حقي انفذ حلمي و من حقي اعيش في بيئه نظيفه خصوصا لو بدفع فلوس النظافه دي الي جانب الضرايب شاركوني حلمي و عرفوا الناس بيه انتم كمان من حقكم تعيشوا كويس و اقولها للمره الاخيره لو نازل بكيس زباله او جردل زباله او عربيه دبش و هدد عماره ومش لاقي المكان اللي الحي موفره علشان ترمي زبالتك اوعي تضر جارك او تضر نفسك و ترمي الزباله قدام بيتك و انما
" ارمي زبالتك قدام الحي "

شاركوني الحلم حلم اكتر من60 مليون مصري عايشين في العشوائيات

Log In | Facebook

دى حمله بدأت على الفيس بوك شفت فكرتها فكرت اشارككم فيها
يا ريت اسمع رأيكم فيها وفى مدى اضرارها وفوائدها وهل فعلا ممكن تكون وسيله فعاله ام سبب لزياده الفوضى

لو عايز الفكرة تسمع فعلا وتعمل هزة كبيرة
ارمي زبالتك قدام مبنى المحافظة