الموضوع: اذا كنت تستطيع انا تقارن .. اتفضل ساعد .. رأي اللي بيفهم فقط يهمني

بص انا عشان اكون حيادي هتكلم عن الفلونس اللي جبتها بعد حيرة شديدة بينها و بين النيو النترا ... ماشاء الله تحس انك راكب طيارة .. انا لسا جايبها من شهرين و مقدرش استحمل مسوقهاش .. سواقتها لوحدها عالم تاني

دلوقتي لو همك الرفاهية و الاستمتاع و الفخامة و الرحابة خليك في الفلوانس .. لو انت بتقلق من قطع الغيار و كده .. احب اقولك ان في قطع غيار النترا الجديدة اغلى من الفلوانس .. يعني تقريبا مش هتلاقي فرق بين اسعار الفلونس والالنترا مثلا .. و متسمعش كلام الناس اللي بتقولك سعر اعادة البيع و مش عارف ايه .. انت هتجيب عربية ب 140 الف جنيه و المفروض انها فخمة و تبيعها على طول ليه يعني و برده العربية انتشرت جدا و بقت مطلوبة أوي عشان قضوا على كل المشاكل اللي كانت في الميجان فسعرها مش هينزل اوي .. هو طبعا مش هيكون زي اعادة بيع كورولا او لانسر مثلا مش عشان اوحش منهم لاقدر الله بس عشان دي ثقافة سوق و شعب .. الناس مش بتحب تجرب الا اللي عارفاه بس

و بالنسبة للامان فحدث ولا حرج .. السيارة مصفحة تماما من تحت و هيكلها موجود فيه قضبان فولاذ من الجوانب بالاضافة الى ال 2 ايرباج و abs و ebd ( بتنزل اساسي مش كماليات زي عربيات تانية ... )
و الثبات فانا اقدر اقولك اني عمر ماسوقت عربية بالثبات العالي ده ماشاء الله لدرجة انك ممكن تناور بكل سهولة على سرعات عالية زي 160 من غير ماتحس ان العربية هتعوم منك بل بالعكس بتحس ان العربية غارزة في الارض و انك مهما عملت فيها مش هتتقلب :)

و طبعا العربية بتلفت نظر اي واحد ماشي في الشارع من حيث شكلها .. تحس انها عربية رؤساء كده من فخامتها و كبر حجمها ماشاء الله ده غير الاوبشنز العالية اللي موجودة فيها مع الاحتفاظ بكلاسيكية التابلوة عشان متحسش انه زحمة و انك راكب عربية كلها عبارة عن زراير .. مرايات ضم و تكيف اوتوماتيك و مثبت سرعة و محدد سرعة و ستيبترونيك و بلوتوث و الباور الخفيف جداااااااااا على السرعة الهادية اللي بيتقل كل اما تزيد السرعة كوسيلة امان و التقفيل الداخلي و الخامات اكتر من ممتازة .. الخخخخ
بس عشان اكون حيادي اكتر .. العربية مش بتاعت شد و لا حرق و طلعتها تعتبر تقيلة شوية زي كل الاوروبي بس بمجرد انك تعدي ال 50 العربية بتتحول معاك حاجة تانية خالص و اعتقد دي حاجة مبتسببش مشاكل نهائيا بس حبيت اقولك بس

اخر حاجة احب اقولهالك ان توكيل رينو من احسن التوكيلات في مصر بشهادة معظم الناس و مفيش توكيل بيماثلة في الاحترام والكفاءة و الاهتمام بالعميل و دي حاجة اساسية من الحاجات اللي خلتني افاضل بينها و بين النترا عشان غبور اللي سمعته زي الزفت

و ياريت متقلقش و متحطش الموضوع في دماغك .. اعمل تحليل كويس للعربيات اللي حاططها في دماغك و صلي استخارة و توكل على الله و ان شاء الله ربنا مش هيخيب ظنك