الموضوع: حادثة مووت بالفيات بونتو..

بس ما شاء الله العربية ديه عفية جداً ....كنت ماشى على 120 وواحد زنق عليه فى اليمين بغشومية علشان مقطورة جتله من الشمال ..كنت هنزل من على الأسفلت وبعدين أفتكرت حادثة نيو أكسنت نزلت من على الأسفلت أتقلبت كذا قلبه فقلت لأ أحدف شمال بسرعة فالعربية عامت منى ومعرفتش أعدلها خالص لغيت ما دخلت فى الجزيرة فى رصيف عالى على سرعة 120 وبعديها العربية طارت ودخلت فى الشجر ....ونزلت جرى عشان ألحق العيال.....ونجرى خفت للعربية تنفجر.....
لكن ربنا ستر....
مش هقولك بقه طبعاً شيلتها على كساحة وطلب منى 850 جنيه عشان يرجعها القاهرة قولتلوا لأ خلاص دخلها اسكندرية أخد 400 جنيه...وبعديها لقيت العربية جابت ما تعدش ...
الجنوط بالكاوتش مع الشمعدان بالمساعد بالكبالن بالمقصات بالاسكترا بالقنطرة بالريداتير بالسربنتينة بالمروحة بحامل السربنتينة بالاكصدام بالفوانيس بالبربريز "بس ده مش من الخبطة كان تقريباً من فرع شجرة"بالرفرف الشمال من تحت ........................وسبحان الله والحمد لله السيارة سليمة من الخارج بالكامل مافيش غير الرفرف الشمال من الاخر......
والسيارة طلع فيها حساس بيفصل السيارة بالكامل كهربائياً عشان ما تولعش .....
ومحدش كان عارف مكانه لا الميكانيكى ولا الكهربائى بس الحمد لله سـألت وعرفت مكانه لأن الكهربائى كان بيقولى هنمشى مع الدفيرة لغاية ما نلاقيه وطبعا هيشيل الفرش قولتلوا لأ أستنى أنا هسأل وأقولك ووصلتلوا الحمد لله....
ربنا يكفيكوا شر الحوادث ...بس الميكانيكى قالى الخبطة ديه لو عربية تانية كانت زعلتك قوى قوى قوى وما كنتش طلعت منها سليم.......الحمد لله الحمد لله الحمد لله

شكر واجب للشركة الايطالية (الفراهدة "الاسكندرية") لأستاذ / وائل الذى أمدنى بكل قطع الغيار ....."أستيراد"
وما كنش عايز ياخد فلووس لما عرف انى مزنوق وقالى لما تظبط نفسك أبقه هاتهم ....
حقيقى أخ عزيز وغالى ...وربنا يكرموا ...

حمد لله على سلامتك و سلامة الأولاد و المدام, لو حضرتك عندك وقت ممكن تقولنا أسعار قطع الغيار اللى جبتها و العربية خدت وقت تصليح قد اية ؟

1- الجنط بتاعها الأصلى سليم استيراد = 90 جنيه
2- قنطرة كاملة بالاسكترا = 500 جنيه والحمد لله ده سعر محصلش لانك هتسمع فيها 1000 لغاية 800 جنية "بدون المقصات"..الرشيدى -صلاح الدين
3- مساعد أصلى بالشمعدان بالكوبلن القصير "بيقولوا عليه عكاز شمال = 300" وده بردوا هتسمع فيه من 750 لغاية 450 جنيه الحمد لله.."وأخذت عليهم كمان جوز طنابير هديه جداد بحالتهم" ..الرشيدى صلاح الدين
4- مقص يمين + كوبلن يمين = 250 بس دول كان الميكانيكى هو اللى جابهم ولما حس انوا خدمنى فى اللى فات فتقريباً ظبط بس فى حدود 50 جنيه بعد ما سألت عرفت. "الرشيدى"
5- ريداتير + سربنتينه تكييف + مروحة = 800 جنيه ودول هتسمع فيهم بردوا من 1350 لغاية 1000 جنية "الشركة الايطالية" بس جداد لانج
6- فوانيس البونتو 2003 الجوز = 400 جنيه هتسمع من أول 350 ل 300 فى الواحد..الايطاليه-الفراهدة..أ / وائل
7- بيت البيئة (بتاع الشكمان)+ جزء من الشكمان +حساس الشكمان + السوستة+تقريباً بيت حريق الموتور مش فاكر "هو بيجى حتة واحدة مع بيت البيئة" = 400 جنيه ...الايطاليه
أ / وائل طلع جدع أوى واعطانى الحديدة اللى بتتركب عليها السربنتينة والريداتير هديه ديه لوحدها = 250 جنيه "
8- قواعد موتور ديه جديدة = 600 جنية "قاعدتين اليمين والشمال واللى فى النص جت مع القنطرة"
9- عدد 2 كاوتش جديد 14/185/60 كومهو = 680
10- فيبره بتتركب تحت الفتيس لأن دواسة البنزين اتكسرت منها ودنة فبتقلب على الفرامل وديه مصيبة "تيجى تفرمل تدوس على البنزين والفرامل"=200 جنيه وطبعاً ديه كان صعب جداً تلاقيها لكن أ/ وائل قعد يفك فيها من نص بونتو حوالى 3 ساعات ربنا يكرمه لان مكانها صعب جداً...وأخذت عليها ماستر دبرياج مش عارف سفلى ولا علوى.
11- استوب الفرامل = 100 جنيه "ودية بتركب تحت دواسة الفرامل عشان تنور النور الخلفى"

طبعاً لسه فى حاجات كتير بايظة ووقفت لسه ما غيرتهاش يدوبك رجعتها من اسكندرية بالراحة للقاهرة منها البربريز الأمامى والمروحة وقفت والفيبرة ديه مش عارف أركبها عند مين...لسه..والتكييف معرفش هيشتغل ولا لأ...... وفى جنطين كمان باظو ...وربنا يستر ده غير المصنعيات من ميكانيكى لسمكرى لعفشجى لكهربائى لشكمانات ..يا رب هوون

حركة الامان اللي عملينها هيا ان عند حدوث التصاااادم السيارة بالكامل تفصل كهرباء وبالتالى طلمبة البنزين تفصل لانها كهرباء والسيارة بالكامل تفصل ...وده عرفتوا لانهم بعد ما وصلوا كل حاجه العربية ما اشتغلتش لغاية ما اكتشفوا ان فى حساس وقالولى 10/10 ....
وده كمان ممكن تستخدموا عشان تفصل العربية بالكامل لعدم السرقة ومكان زرار الحساس لو حد قعد يدور عليه استحاله هيلاقيه صعب جداً جداً جداً.... بس فى حاجة اسهل أكتشفوا فيوز لو شيلتوا بردوا العربية مش هتشتغل خالص .....