رادياتير اللانوس 99 فيه تسريب

**mabdelrahim** · 07-09-2011 06:52 PM

السلام عليكم

أولا أنا اخوكم محمد و دي اول عربية ليا لانوس 99 ... امبارح حصل معايا موقف في وسط البلد اني كنت ماشي بالعربية و بعدين لقيت التكييف فصل و بقى مروحة بس و مؤشر الحرارة علي جدا وصل للآخر ، وقفت و نزلت فتحت القربة لقيتها فاضية خالص و قعدت ازود مية لقيتها بتتسرب من تحت من النص بس ناحية اليمين شوية و بتنقط على ماسورة الشكمان تقريبا ... الحمد لله فضلت امشي شوية و ابطل شوية و ازود مية لحد ماوصلت بيتنا في حدائق المعادي ...
أنا مش عارف هل الموضوع ده كبير و حايخشله في حوار و لا إن شاء الله بسيط
و ياريت تدلوني على واحد بتاع رادياتير كويس و نظيف في المعادي او حدائق المعادي ... انا ساكن قريب من جامع الخليل إبراهيم

**aagomaa** · 08-09-2011 10:04 AM

متهيألى دة مش ردياتير مخروم .. دى مادام بتقول يمين و بتنزل على الشكمان ممكن تكون طبه من طبب الموتور اتخرمت و هى اللى بتجيب ميه .. الموضوع دة حصل لى بالظبط زى ما انت بتقول كدة و طلع طبتين اتخرموا .. خلى اى ميكانيكى يكشف عليها

و بالنسبه للتكلفة مش كتير ... تمن الطبه اللى هتتغير حوالى 5 جنيه الواحدة .. بس خليه لما يفك يكشف على باقى الطبب و لو مصديين يغيرهم بالمرة ... و المصنعيه مش اكتر من 50 جنيه يعنى فى الحدود دى

**tarek_2005** · 08-09-2011 01:46 PM

وممكن تكون ماسورة الشجرة وممكن يكون كوعة المياه الكاوتش وممكن وممكن و .........
افضل حل اكبس دورة التبريد

**shaddadfalcon1** · 08-09-2011 09:19 PM

ان شاء الله يكون مفيش مشاكل كبيره

انا حصلي نفس الموقف بالظبط وكان بيسرب من فوق ناحية اليمين وغيرت الريداتير وكعيت 500 جندي

**محمد الشامي** · 09-09-2011 04:49 PM

كبس دورة التبريد لتحديد السبب بدقه , لانها ممكن تكون اكثر من حاجه في وقت واحد

**mabdelrahim** · 09-09-2011 08:10 PM

السلام عليكم

انا متشكر جدا لكل الناس اللي ردت عليا الف شكر يا رجالة

الحمد لله انا رحت للميكانيكي النهاردة و بصلي على التسريب و الحمد لله طلعت بسيطة ... قاللي ان خرطوم السخن مقطوع .. فكهولي و رحت جبت واحد جديد بالكوليهات بتاعته عمل 27 جنيه و دي صورة الخرطوم المقطوع

أنا لاحظت كمان ان صوت العربية عالي و الميكانيكي كان شاكك في جوان الشكمان بس بعد ما كشف لقى ان الشكمان مخروم ... فبكرة إن شاء الله حاقولكم لو في جديد في حوار الشكمان

**tarek_2005** · 10-09-2011 11:49 AM

مبروك علي الاصلاح

**khaled_Saga** · 10-09-2011 10:43 PM

متقلقش من الحاجات البسيطة دى مش بتتكلف حتى لو الرادياتير نفسه هيتغير كله على بعضه ب 300 جنيه

الخراطيم والطبب دى بتبوظ بعد فترة من الاستهلاك والحرارة لانهم بيسببوا صدأ وتآكل وتشقيق